Kategori: Uncategorized

  • Zjarri në Fabrikën në Rahovec – Kryetari Latifi thotë se dëmet janë të mëdha

    Kryetari i Rahovecit, Smajl Latifi ka reaguar pas zjarrit që kaploi Fabrikën e Plastikës, më 21.01.2025, në fshatin Fortesë të kësaj Komune.

    Duke shprehur keqardhje për ngjarjen e rëndë, siç e ka cilësuar, Latifi shkroi se dëmet materiale janë të mëdha, por nuk janë vlerësuar ende.

    “Shpreh keqardhjen time të thellë për këtë ngjarje të rëndë, që ka prekur këtë biznes të rëndësishëm për Komunën tonë! Fatmirësisht, nuk ka pasur dëme në njerëz – gjë që është një lehtësim i madh për të gjithë ne. Megjithatë, dëmet materiale janë të mëdha dhe ende nuk janë vlerësuar plotësisht. Falë ndërhyrjes së shpejtë dhe profesionale të zjarrfikësve, zjarri është lokalizuar dhe është shmangur përhapja e tij në zonat përreth.” – shkroi Latifi.

    Kryetari i Rahovecit tha se biznesi i dëmtuar do ta ketë mbështetjen e Komunës.

    “Dua të shpreh mirënjohjen time për Njësinë e Zjarrfikësve të Rahovecit, si dhe për ndihmën e vyer të Njësive të zjarrfikësve nga Gjakova, Prizreni dhe Malisheva, të cilët dëshmuan solidaritet dhe përkushtim të jashtëzakonshëm! Po ashtu, falënderoj Policinë e Kosovës për angazhimin e tyre në sigurimin e rendit dhe mbështetjen në menaxhimin e situatës! Do të ofrojmë mbështetje për këtë biznes dhe do të bëjmë gjithçka që është në mundësinë tonë, për të ndihmuar në përballimin e pasojave të kësaj fatkeqësie!” – tha në mes të tjerash kryetari i Rahovecit, Smajl Latifi.

    Zjarri që kaploi Fabrikën në orët e para të mëngjesit, sipas Policisë është iniciuar si rast: “zjarrëvënie”.

    https://kallxo.com/lajm/digjet-fabrika-e-plastikes-ne-rahovec-dyshohet-per-zjarrevenie/

  • Fuqizimi i grave, Jaha: LDK-ja veçse e ka bërë hapin e parë

    Fatlume Jaha, kandidate për deputete nga LDK-ja, ka folur për fuqizimin e gruas gjatë emisionit “DebatPërnime”, më 12.01.2025.

    Ajo tha se nuk ka formë më të mirë për t’i fuqizuar gratë se sa t’i fuqizosh ato në aspektin ekonomik.

    E, sipas saj, LDK-ja veçse ka filluar ta bëjë këtë gjë.

    “Konsideroj se LDK veçse e ka bërë hapin e parë për ta bërë këtë [fuqizimin e gruas] përmes shkollës tërëditore, sepse e ka bërë një lehtësi shumë të madhe për nënat.” – tha ajo.

    Ndërsa, kandidatja tjetër për deputete, Sibel Halimi, e cila njëherësh është drejtoreshë e Kulturës në Komunën e Prishtinës, duke folur në nivel të konstatimeve tha se deri më tani nuk kanë parë asgjë konkrete nga partia në pushtet për ta parandaluar vrasjen e grave.

    Halimi tha që është ithtare e përfshirjes së një lënde specifike në sistemin parauniversitar, e cila do të bënte me njohuritë mbi gjininë. Po ashtu, ajo premtoi që gratë do t’i përfshijnë në tregun e punës, do t’u ofrojnë politika miqësore, do të përfshijnë Ligjin e Prindërimit dhe ta zhdukin hendekun mes sferës publike dhe private për jetën e grave në Kosovë.

    “Në këtë Sistem të Drejtësisë që është jashtëzakonisht i brishtë, me një diskurs publik i cili denigron të gjitha hallkat e funksionimit të Sistemit të Drejtësisë, natyrisht që gratë ndihen të pambrojtura dhe janë në një pozitë, ku më nuk u besojnë as institucioneve të sigurisë.” – tha Halimi.

    Se a do t’i largojnë nga puna policët e Kosovës që i kanë rrahur bashkëshortet, Halimi tha se “jo vetëm nëse ndodhë akti i dhunës, por edhe në qoftë se përdoret gjuhë denigruese apo atakim emocional do të merren masa”.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

    Për më shumë, lexoni në linkun në vijim:

    https://kallxo.com/gjate/ldk-premton-ne-debat-pernime-reforma-ne-drejtesi-dhe-investime-kapitale-miliardeshe/

  • Lufta kundër korrupsionit, LDK: Albin Kurti duhet ta pyes Martin Berishajn ku i ka të hollat?

    Kandidatja për deputete nga LDK-ja, Doarsa Kica- Xhelili, në emisionin “Debat Përnime” ka kritikuar Qeverinë Kurti për “mungesë serioziteti” në luftimin e korrupsionit.

    Sipas saj, qeveria aktuale i ka pasë të gjitha mundësit ligjore për luftimin e korrupsionit, mirëpo ka synuar “vetëm ushtrimin e kontrollit në sistemin e drejtësisë”.

    Ajo ka deklaruar se sikur të ishte serioze Qeveria aktuale në luftimin e korrupsionit, do të merrej me rastin e ambasadorit Martin Berishaj.

    “Po ta kishte seriozisht [Albin Kurti] kthimin e parasë publike, duhet me pyet ku i ka Martin Berishaj të hollat e veta. Kthej njëherë paratë e tij pa Byro fare, më pas flasim për Byronë”- tha Kica-Xhelili.

    Ndër tjera, ajo tha se pushteti ka pasur mundësinë e artë ta luftoj korrupsionin duke filluar nga hetimi i njerëzve të tyre, por se nuk e ka bërë një gjë të tillë.

    “E ka pasë mundësinë e artë në duart e veta duke filluar nga njerëzit e vet, duke filluar nga largimi i mentalitetit që personi i dyshuar për korrupsion duhet të mbrohet në mënyrë publike në foltoren e Kuvendit të Kosovës”- tha ajo.

    Ambasadori Martin Berishaj ishte intervistuar nga Prokuroria Speciale me 29.03.2024 nën dyshimin për veprat penale “Shpëlarja e parave”, “Shmangia nga tatimi” dhe “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.

    “DebatPërnime” është format i cili do të transmetohet për një muaj rresht deri një ditë para zgjedhjeve parlamentare të 09.02.2025. Kandidatët për deputetë nga partitë politike garuese përveç që prezantojnë programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometri”.

    Lëvizja Vetëvendosje (LVV) ka zgjedhur që gjatë fushatës për zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime”, prodhim i KALLXO.com.

    Mirëpo, për dallim me partia në pushtet, partitë tjera opozitare kanë pranuar të marrin pjesë në këtë debat dhe t’u përgjigjen pyetjeve të gazetareve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin”, ka deklaruar Jeta Xharra në hapje të debatit të parë zgjedhor në kuadër të “Debat Përnime”.

    Për më shumë lexoni në linkun në vijim:

    https://kallxo.com/gjate/ldk-premton-ne-debat-pernime-reforma-ne-drejtesi-dhe-investime-kapitale-miliardeshe/