Kategori: Lajme

  • Kryediplomatët e Gjermanisë dhe Francës vizitojnë Damaskun

    Ministrat e Jashtëm të Gjermanisë dhe Francës thanë se duan të krijojnë raporte të reja me Sirinë dhe bënë thirrje për tranzcion paqësor, teksa gjatë vizitës në Damask u takuan me liderin e ri de facto Ahmed al-Sharaa, në emër të Bashkimit Evropian.

    Kryediplomatja gjermane, Annalena Baerbock dhe ministri i Jashtëm francez, Jean-Noel Barrot janë ministrat e parë nga BE-ja që vizitojnë Sirinë, pasi rebelët morën kontrollin e Damaskut më 8 dhjetor dhe detyruan presidentin Bashar al-Assad të ikte për në Rusi pas më shumë se 13 vjetësh luftë civile – duke i dhënë fund sundimit dekadësh të familjes së tij.

    “Vizita ime sot… është mesazh i qartë për sirianët: se është i mundur një fillim i ri politik mes Evropës dhe Sirisë, mes Gjermanisë dhe Sirisë.” – tha Baerbock, para se të largohej nga Damasku.

    Barrot tha se shpreson për “për një Siri sovrane, të qëndrueshme dhe paqësore”. Ai në Damask, po ashtu, vizitoi Ambasadën franceze, e cila është e mbyllur që nga viti 2012.

    Që nga rrëzimi nga pushteti i Assadit, rebelët islamistë të udhëhequr nga Sharaa’s Hayat Tahrir al-Sham (HTS) – grup i shpallur organizatë terroriste nga Shtetet e Bashkuara – kanë kërkuar që të sigurojnë shtetet arabe dhe komunitetin ndërkombëtar se ata do të qeverisin në emër të të gjithë sirianëve.

    Qeveritë perëndimore kanë nisur gradualisht të hapin kanalet e komunikimit me Sharaa dhe HTS dhe po nisin debatin nëse duhet ta largojnë këtë grup nga lista e organizatave terroriste.

    Para vizitës në Siri, Baerbock tha se nga kjo vizitë kishte “pritje të qarta” nga sundimtarët e rinj, të cilët – sipas saj – do të gjykohen për veprimet e tyre.

    Qëllimi për Sirinë është që ky shtet të bëhet sërish një anëtar i respektuar i komunitetit ndërkombëtar – tha kryediplomatja gjermane.

    Ndërkaq, Barrot e cila u takua me patriarkun e Kishës Ortodokse Greke tha se Franca është e përkushtuar për një Siri, ku do të mbroheshin të drejtat e të gjithëve.

    Ai, po ashtu, qëndroi në ndërtesën e mbyllur të Ambasadës në Damask dhe tha se Parisi po punon drejt rivendosjes së pranisë diplomatike./REL.

  • Haradinaj premton funksionalizimin e Aeroportit të Gjakovës për fluturime emergjente

    Kandidati për kryeministër nga Aleanca për Ardhmërinë e Kosovës (AAK), Ramush Haradinaj, më 03.01.2025, ka thënë se Kosova duhet ta ketë patjetër një aeroport alternativ për fluturime emergjente.

    Ai ka thënë do ta përshtasin Aeroportin e Gjakovës, për të shërbyer si “pikë strategjike për funksionalitetin e trafikut ajror.”

    “Kosova patjetër duhet ta ketë një aeroport alternativ për fluturime emergjente, në mënyrë që udhëtarët e saj të mos vijnë në situatë – që në pamundësi për të ateruar në Aeroportin e Prishtinës – të aterojnë në Beograd dhe Shkup. Për këtë qëllim, ne do ta aftësojmë Aeroportin e Gjakovës, për të shërbyer si pikë strategjike për funksionalitetin e trafikut ajror.” – ka thënë Haradinaj.

    Ndërsa, ka thënë se kjo përshtatje do të arrihet me një investim të përballueshëm për buxhetin.

    “Angazhimi ynë për ta shndërruar këtë aset në një pikë të rëndësishme të infrastrukturës së sigurisë kombëtare është pjesë e vizionit të Kosovës Fituese.” – ka shkruar ai në Facebook.

    Në vitin 2019, me propozimin e ministrit të Mbrojtjes, Rrustem Berisha, Aeroporti i  Gjakovës ka kaluar nën kompetencat e Ministrisë për nevoja të FSK-së.

    Në ditët e fundit për shkak të mjegullës së dendur, në Aeroportin e Prishtinës “Adem Jashari” janë anuluar afër 50 fluturime – gjatë dy ditëve të fundit, kurse në disa të tjera ka pasur vonesa.

    Lidhur me këtë zhvillim ka shkruar ministri i Infrastrukturës, Liburn Aliu, më 02.01.2025.

    “Aeroporti i Prishtinës është në shërbim gjatë tërë kohës, pasi ka të instaluar dhe funksional Sistemin e Avancuar të Aterrimit ILS CAT IIIb, i cili mundëson aterrime edhe në kushte të mjegullës së dendur, deri në dukshmëri minimale prej 50 metrash.” – ka thënë ai.

    Fluturimet me pilotë të certifikuar për përdorimin e këtij Sistemi – sipas tij – kanë aterruar me sukses, ndërsa “fluturimet pa certifikimin e nevojshëm janë anuluar ose devijuar.”

  • Orbani nuk ftohet në ceremoninë e inaugurimit të Presidencës polake të BE-së

    Polonia ka vendosur që të mos e ftojë ambasadorin e Hungarisë në ngjarjen që do të mbahet më 3 janar, për nisjen e Presidencës polake të Bashkimit Evropian. Kjo pasi Budapesti i dha azil politik një ish-zëvendësministri i cili po hetohet për dyshimet për “keqpërdorim të fondeve publike” – tha një zyrtare e lartë.

    Kryeministri hungarez, Viktor Orban, po ashtu, nuk është ftuar në ceremoninë, që do të mbahet në Varshavë – tha zëvendësministrja për Çështje Evropiane, Magdalena Sobkowiak-Czarnecka.

    Varshava ka shprehur zemërim, pasi Hungaria muajin e kaluar i dha azil politik Marcin Romanowskit, ish-zëvendësministrit polak të Drejtësisë, i cili u ndalua në korrikun e vitit të kaluar si pjesë e një hetimi për “keqpërdorim të fondeve publike”.

    Romanowski u lirua shpejt pasi presidenti i Asamblesë evropiane për të drejtat e njeriut tha se ai kishte imunitet, pasi ishte anëtar i këtij trupi. Ish-zëvendësministri i mohon akuzat kundër tij.

    “Kur ne i ftuam mysafirët në galanë tonë para një muaji, ne e ftuam gjithë korpusin diplomatik.” – tha Sobkowiak-Czarnecka, gjatë një deklarimi televiziv të premten.

    “Por, pas situatës me zëvendësministrin Romanowski, ministri [i Punëve të Jashtme, Radek] Sikorski vendosi që ambasadori hungarez nuk do të ishte i mirëpritur në ngjarjen e sotme”.

    Kryeministri polak, Donald Tusk dhe presidenti i Këshillit Evropian, Antonio Costa pritet të mbajnë fjalime në ceremoninë e inaugurimit të Presidencës gjashtëmujore të Polonisë në BE.

    Hungaria e ka pasur kryesimin e BE-së në gjysmën e dytë të vitit 2024.

    Tusk ka qenë një kritik i Orbanit për qëndrimin e tij lidhur me luftën në Ukrainë, por edhe për politikat që Polonia i konsideron proruse. Orban i ka thënë një medias hungareze se Qeveria e Tuskut i konsideron hungarezët armiq. /REL