Kategori: Lajme

  • Reduktimet e rrymës po vazhdojnë ende në disa rajone të Kosovës

    Reduktimet me energji elektrike po vazhdojnë ende në disa rajone të Kosovës. Të prekur nga reduktimet janë edhe qytetarë nga Gjilani, Vushtrria e Ferizaj.

    Sipas Kompanisë për Distribuimin e Energjisë Elektrike në Kosovë (KEDS), kjo po ndodhë për shkak të konsumit të lartë të rrymës, i cili është rritur me uljen e temperaturave në Kosovë.

    KEDS thotë se rajonet të cilat janë përballur më mungesë të energjisë elektrike këto ditë janë: Ferizaj, Gjilani, Gjakova dhe Prizreni.

    “Për shkak të konsumit të lartë, i cili është rritur me uljen e temperaturave në vendin tonë, janë shkaktuar mbingarkesa në asetet e rrjetit të shpërndarjes dhe të transmisionit. Mbingarkesa të tilla në nivelin e transmisionit – KOSTT-it janë shfaqur dhe vazhdojnë të shfaqen në rajonin e Ferizajit, Gjilanit, Gjakovës dhe Prizrenit.” – ka deklaruar zëdhënësi i KEDS-it, Lulzim Krasniqi për KALLXO.com.

    Nga KEDS-i, gjithashtu, njoftojnë se është duke u punuar nga ekipet e Korporatës Energjetike të Kosovës (KEK) për të garantuar stabilitetin e sistemit dhe për të shmangur dëme të mundshme në pajisjet kritike, “në vazhdimësi janë ndërmarrë dhe po merren masa për optimizimin e ngarkesës.”

    Ndërsa, reduktimet e rrymës në zona të caktuara – sipas KEDS-it – po bëhen me qëllim që të tejkalohen mbingarkesat dhe këto kërkesa po bëhen nga KOSTT-it në periudha të caktuara kohore.

    “Rrjedhimisht, bëhet fjalë për ndërprerje të energjisë elektrike për zona të afektuara, me qëllim të tejkalimit të mbingarkesave, të cilat kërkesa po bëhen me kërkesë të KOSTT-it në periudha të caktuara kohore.” – ka thënë Krasniqi.

    Gjithashtu, telashe të shumta me reduktimin e rrymës janë paraqitur në qytetin e Ferizajit dhe sipas raportimeve nga qytetarët reduktimet në këtë qytet po vazhdojnë edhe sot, më 03.01.2025.

    Lidhur me këtë, KEDS-i njofton se brenda pak ditësh do të bëhet energjizimi i Nënstacionit “Kastrioti” në Ferizaj dhe do të mundësohet furnizimi i qëndrueshëm me energji elektrike.

    “Ju njoftojmë se brenda pak ditësh do të bëhet energjizimi i Nënstacionit ‘Kastrioti’ në Ferizaj, me çka konsumatorët tanë në rajonin e Ferizajit do të kenë furnizim të qëndrueshëm me energji elektrike.” – ka njoftuar Lulzim Krasniqi nga KEDS-i.

    Reagim, për reduktimet e rrymës, ka pasur edhe nga kryetari i Komunës së Vushtrrisë, Ferit Idrizi.

    “Me shqetësim të madh po e përcjell situatën me ndërprerjet e shpeshta dhe të gjata të energjisë elektrike në qytetin e Vushtrrisë. Në këto ditë festash dhe në këto ditë dimri, është e papranueshme që qytetarët të mbesin pa energji elektrike deri në 8 orë. Ndërprerja e energjisë elektrike po pengon edhe funksionimin normal të bizneseve të qytetit tonë – duke iu shkaktuar dëme të mëdha.” – ka shkruar kryetari Idrizi.

    Ndërsa, lidhur me këtë nga KEDS, thonë se nuk është raportuar ndonjë ankesë.

    “Sa i përket Vushtrrisë, nuk është raportuar ndonjë ankesë për mungesë të energjisë elektrike dhe aktualisht konsumatorët tanë aty kanë furnizim me energji elektrike.” – thotë Krasniqi nga KEDS-i.

    Lidhur me këtë gjendje, para disa dite kryeministri i Kosovës, Albin Kurti tha se rrjeti i transmetimit nuk ka kapacitet të bartë gjithë konsumin e energjisë.

    “Nuk e kemi problemin që në treg ka mungesë të energjisë elektrike, por problemi është që rrjeti i transmetimit dhe i shpërndarjes nuk ka kapacitet për ta bartur këtë konsum. KOSTT merret me KEDS dhe KESCO. Tash sa po merret suksesshëm unë nuk e di.” – u shpreh Kurti, në një emision në Kohavision.

    “Transmetimi dhe shërndarja nuk kanë kapacitet që në 5 në mëngjes, kurrë s’ka ndodh, më 25 dhjetor, konsumi të jetë 1 gigawat. Të gjitha njësitë në Kosovën A dhe Kosovën B mbërrijnë 900 mgw. Peak-u i konsumit është afër 1,5 mgw.” – shtoi më tej Kurti.

    Kurti shtoi se rrjeti është i vjetëruar, “njëri termocentral është mbi 60 vjet, tjetri mbi 40 vjet. Në treg ka energji sepse ne importojmë, mirëpo nuk kemi kapacitete për transmetim që do të furnizonin më rrjetin ekzistues.” – tha ai.

    Derisa po vazhdojnë reduktimet ne disa Komuna të Kosovës, KEDS iu bën thirrje konsumatorëve që të kursejnë energjinë elektrike sa më shumë që munden – në mënyrë që të mos rrezikohen asetet elektroenergjetike, nga mbingarkesa të tilla.

  • Mbi 90 aksidente u regjistruan në 24 orët e fundit në Kosovë

    Në rrugët e Kosovës, në 24 orët e fundit, janë regjistruar 98 aksidente – tregojnë të dhënat e Policisë.

    Nga këto aksidente, 31 janë regjistruar me të lënduar, ndërsa 67 me dëme materiale.

    Policia në ditët e fundit ka bërë apel edhe për kujdes në komunikacion, për shkak të mjegullës.

    Në një Raport të përgjithshëm, Policia ka nxjerrë edhe statistikat e numrit të aksidenteve, që u regjistruan gjatë vitit 2024.

    Vetëm aksidente me fatalitet gjatë vitit 2024 janë regjistruar 88 të tilla. Nga këto aksidente, 96 persona kanë vdekur.

    Në Raportin e Policisë është përmendur edhe se gjatë vitit 2024 janë shënuar 7 mijë e 896 aksidente me lëndime.

    Tutje, në Raport, përmenden edhe aksidentet me dëme materiale, të cilat janë 13 mijë e 854 të tilla – vetëm për vitin 2024.

    Në total, numri i aksidenteve që u regjistruan në vitin që lamë pas është 21 mijë e 838. Policia e Kosovës me njësitet e saj të trafikut kanë shqiptuar gjatë vitit 2024 711 mijë e 953 gjoba, për ata që nuk kanë respektuar rregullat e trafikut.

  • Tragjedia në Vardar, Prokuroria e Shkupit thotë se po hetohen shkaqet e aksidentit

    Nga vetura që ka rënë më 02.01.2025, në lumin Vardar në Maqedoninë e Veriut, në rrugën Rashqe-Saraj janë nxjerrë tre trupat e pajetë të tri grave, për të cilat është lëshuar urdhëri për autopsi – transmeton Portal.mk.

    Prokuroria Themelore Publike në Shkup ka kumtuar, sipas informacioneve fillestare, se automjeti drejtohej nga njëri prej të ndjerave dhe se do të lëshohet urdhër për ekspertizën e makinës.

    Sipas Portal. Mk, Prokuroria ka bërë të ditur se pavarësisht kushteve jashtëzakonisht të vështira e të paarritshme në terren janë ndërmarrë të gjitha veprimet për sigurimin e gjurmëve dhe provave, me qëllim të përcaktimit të shkaqeve të aksidentit. 

    “Sipas udhëzimeve të Prokurorit publik janë intervistuar dëshmitarët okularë të ngjarjes, si dhe familjarët e familjes në automjet për zbardhjen e të gjitha rrethanave.” – thuhet në kumtesën e Prokurorisë Themelore – transmeton Portal.mk.

    Një person tjetër është në kërkim, ndërsa në makinë udhëtonte edhe një fëmijë, i cili është gjetur me lëndime jashtë automjetit dhe është dërguar në Qendrën Klinike – raporton TV21 në Maqedoni të Veriut.

    Siç raportoi Alsat M, fëmija 5 vjeçar ka shpëtuar dhe është gjetur nga disa kalimtarë të rastit.

    Ministria e Punëve të Brendshme të Maqedonisë së Veriut në njoftimin e saj ka thënë se aksidenti ka ndodhur rreth orës 16:00, më 02.01.2025.

    Për disa orë raportohet të ketë vazhduar kërkimi i personit tjetër i cili dyshohet se ka qenë në veturë, por që në orët e mbrëmjes kanë pushuar kërkimet për të vazhduar të premten, më 03.01.2025.

    Ndërprerja e kërkimit të personit tjetër që ishte në veturë – sipas raportimit – ka ndodhur për shkak të kushteve atmosferike dhe vështirësive për të parë.