Kategori: Ligji

  • Vrasja në “Bon Vivant”, avokati thirret në mbrojtje të nevojshme për veprimet e Andi Pajazitit

    Andi Pajaziti, i akuzuar për rastin e vrajses në “Bon Vivant”, më 04.08.2023, është ulur sërish sot, më28.01.2025, në bankën e të akuzuarit në Gjykatën e Prishtinës.

    Pajaziti akuzohet për “vrasje në gjendje të tronditjes së fortë mendore” në lokalin “Bon Vivant”, ku mbeti i varë K. R.

    Në seancën e sotme, avokati i të akuzuarit gjatë dhënies së fjalës përfunidmtare, deklaroi se veprimet e Pajazitit kanë qenë në mbrojtje të nevojshme.

    Avokati i të akuzuarit Pajaziti, Fanol Krasniqi në dhënien e fjalës përfundimtare, ka thënë se veprimet e Andi Pajazitit nuk janë bërë as nga pakujdesia e aq më pak me dëshirë.

    “Në rastin konkret mund të shtohet pyetja, a ka pasur mundësi Andi Pajaziti me i ik sulmit? Andi Pajaziti edhe po të donte s`ka mujt as me ik, as me iu shmang sulmit, mbrojta e Andi Pajazitit ishte proporcionale me mjetin e veprës, ishte i shënjestruar nga dy armë. Andit i është dashur me kusht ta shpëtojë kokën e vetë.” – ka thënë Krasniqi.

    Sipas avokatit Krasniqi, nëse veprimet konsistojnë me mbrojtje të nevojshme, nuk kemi vepër penale dhe nuk mund të dënohet dikush i cili nuk ka elemente të fajit.

    “Siç ka thënë edhe Monteskeu, e drejta e vetëmbrojtjes nuk është privilegj. Edhe ligji ynë e parasheh Dispozitën e Nenit 12: vepra e kryer në mbrojtje të nevojshme nuk është vepër penale.” – tha tutje Krasniqi.

    Krasniqi duke cituar fjalët e një juristi i cili kishte studiuar rolin e viktimave në rastet e vrasjes, tha se: “Të akuzuarit nuk janë çdo herë fajtor dhe viktimat nuk janë gjithmonë të pafajshëm”.

    Avokati i Pajazitit me të filluar dhënien e fjalës përfundimtare kërkoi nga gjyqtari që këtë rast ta gjykojë në bazë të provave, fakteve – duke mos u ndikuar nga emocionet e familjarëve të viktimës.

    Krasniqi tutje falënderoi mediat të cilat tha se kanë luajtur një rol të rëndësishëm në pasqyrimin e asaj se çka kishte ndodhur atë natë.

    Ndërsa prokurorja Bukurie Gjonabalaj në fjalën përfundimtare ka thënë se Andi Pajaziti është fajtor për veprën penale për të cilën akuzohet, në bazë të provave materiale dhe atyre personale të palëve që ishin të dëmtuara nga kjo ndodhi.

    https://kallxo.com/lajm/dosja-e-prokurorise-ndaj-andi-pajazitit-per-vrasjen-ne-bon-vivant/

    Prokuroria tha se Pajaziti vërtetohet se e ka kryer veprën penale për të cilën akuzohet, edhe duke u bazuar në incizimet që janë shikuar në shqyrtim gjyqësor. Madje sa i përket kualifikimit juridik, prokurorja tha se është bazuar në ekspertizën e psikiatrisë forenzike.

    “Se i pandehuri e ka kryer veprën penale vërtetohet përmes video-incizimeve, që janë lëshuar në shqyrtim gjyqësor, ku vërehet momenti se ka qenë i goditur me një shishe qelqi në kokë, e ka shtënë në drejtim të të ndjerit – gjë që nga mendimi i ekspertit për gjendjen shëndetësore dhe mendore për Andi Pajazitin, ku konstatohet se tek i pandehuri në momentin e kryerjes së veprës penale ka dominuar gjendja e konfuzionit emocional dhe vepra është kryer në gjendje të tronditjes së fortë mendore.” – tha prokurorja Bukurie Gjonabalaj.

    Prokurorja kërkoi që të dënohet Pajaziti dhe të merren parasysh rrethanat rënduese si: shkalla e dëmit që e ka shkaktuar dhe historiku si i dënuar për vepra të tjera penale.

    https://kallxo.com/gjate/ne-disa-prej-aktakuzave-te-prokurorise-te-ngritura-kunder-andi-pajazitit-permendet-se-ai-perdori-arme/

    I dëmtuari i këtij rasti Granit Zeqiri ka thënë se kërkon dëmshpërblim – lidhur me këtë rast.

    Ndërsa Arlind Jupolli, i cili përfaqëson të dëmtuarin Agim Zeqiri, tha se meqenëse vepra penale për të cilat akuzohet Pajaziti nuk ndërlidhet asgjë me klientin e tij, nuk i bashkëngjitet ndjekjes penale, por që bëjnë Kërkesë për dëmshpërblim.

    Shpallja e Aktgjykimit për këtë rast penal pritet të bëhet më 31.01.2025, nga gjyqtari i vetëm gjykues, Eroll Gashi.

    Andi Pajaziti më 18.07.2024 në seancën e shqyrtimit fillestar kishte deklaruar se e pranon fajësinë për “armëmbajtje”, por për “vrasje në gjendje të tronditjes së fortë mendore” nuk e pranon, pasi i njëjti ka vepruar në vetëmbrojtje.

    “Për veprën e parë penale ‘vrasje në gjendje të tronditjes së fortë mendore’ nuk ndihem fajtor, sepse ajo vepër është kryer në vetëmbrojtje, kurse për ‘armëmbajtje’ e pranoj.” – deklaroi i akuzuari Andi Pajaziti.

    Si ishte kryer vrasja sipas Prokurorisë?

    Sipas Dosjes së Prokurorisë, rasti kishte ndodhur më 04.08.2023, rreth orës 23:15, ku paraprakisht ishin të ulur i pandehuri, i cili gjendet në arrati, Dukagjin Likaj, bashkë më tani të ndjerin K. R.

    Dosja përshkruan se Likaj ishte ai që e kishte ftuar të akuzuarin Andi Pajaziti të ulet te tavolina e tyre.

    Pas tensionimit të situatës – sipas Prokurorisë – ishte sigurimi Hisni Gecaj ai që ishte munduar ta qetësojë situatën, por nuk kishte arritur.

    Dosja e Prokurorisë përshkruan se tashmë i ndjeri K. R. e kishte sulmuar me shishe dy herë në kokë të akuzuarin Pajaziti.

    Pas këtij sulmi, i akuzuari e kishte nxjerrë armën nga brezi nga ana e djathtë, për shkak të tronditjes së fortë mendore, siç përshkruhet në Aktakuzë “pa fajin e tij, pa menduar për pasojat”, shtie me armë zjarri, me ç’rast e godet tashmë të ndjerin K. R.

    Sipas Dosjes së Prokurorisë, armën e kishte nxjerrë edhe Dukagjin Likaj. Gjatë kësaj kohe ia kishte mbajtur dorën sigurimi Hisni Gecaj, kurse arma ishte e drejtuar në drejtim të të akuzuarit Pajaziti.

    Dosja thotë se Dukagjin Likaj ka shtënë me armë në drejtim të të pandehurit Pajaziti, me ç’rast e “ka lënduar në bërrylin e dorës së majtë” dhe si të tilla bëjnë pjesë në lëndime të rënda trupore, me pasoja të përhershme shëndetësore.

    Vdekja e K. R. – sipas Prokurorisë – ka ardhur si pasojë e gjakderdhjes së brendshme dhe të jashtme, e cila ka çuar në shok hemorragjik, si pasojë e predhës së armës së zjarrit.

    Arma e cila është përdorur – sipas Prokurorisë – është tip “Smith” e kalibrit 9mm.

    Për këtë, i akuzuari përveç kryerjes së vrasjes, akuzohet edhe për “armëmbajtje pa leje”.

    Pajaziti është duke qëndruar nën masën e paraburgimit. Pajazitit i ishte shqiptuar masa e paraburgimit më 07.08.2023, së bashku me të dyshuarit, Hisni Gecaj dhe Gëzim Zakuti.

    Por Gecaj dhe Zakuti ishin liruar nga kjo masë, pas kërkesës së Prokurorisë.

    Sipas Prokurorisë në këtë rast në rrezik ishin jetët e personave të tjerë, të cilët kishin pësuar lëndime trupore nga predhat e armëve të zjarrit.

    Të plagosur të tjerë kishin mbetur edhe Andi Pajaziti e Hisni Gecaj, ndërsa plagëve të armës së zjarrit nuk kishte arritur t’u mbijetonte K.R., i cili kishte vdekur në QKUK.

    13 persona sipas Prokurorisë ishin lënduar nga gotat e thyera të qelqit, gjatë përpjekjes për t’u larguar nga vendi i ngjarjes.

    Të gjitha raportimet e tjera lidhur më këtë rast, mund t’i lexoni në këtë LINK.

  • Plagosja e policit në poligon – Gjykata vendos për të miturin

    Paraqitja në Stacion të Policisë është masa që ka vendosur Gjykata ndaj të miturit, i cili dyshohet se plagosi zyrtarin policor brenda një poligoni privat në regjionin e Gjilanit, përkatësisht në fshatin Pasjak, më 26.01.2025.

    Kurse për instruktorin e poligonit i cili ishte arrestuar pas incidentit, KALLXO.com mëson se të njëjtit ende nuk i është vendosur masa e sigurisë.

    Sipas Dosjes që ka siguruar KALLXO.com, i mituri në bazë të vendimit të gjyqtarit Sahit Borovci, për shkak të veprës penale “shkaktim i rrezikut të përgjithshëm” duhet të lajmërohet në Polici një herë në javë, deri më 25.02.2025.

    Gjykata nuk ka aprovuar Kërkesën e Prokurorisë në Gjilan për masën e paraburgimit ndaj të miturit, i cili brenda një poligoni në regjionin e Gjilanit qëlloi një zyrtar policor, i cili ishte duke ushtruar në një pistë tjetër të këtij poligoni.

    KALLXO.com raportoi nga vendi i ngjarjes për incidentin në poligonin privat në fshatin Pasjak të Novobërdës.

    Gjyqtari kishte konstatuar edhe se “me rastin e vendosjes se cilën nga masat do ta zbatojë për të siguruar praninë e të pandehurit, Gjykata detyrohet t’i marrë parasysh kushtet e përcaktuara për masat konkrete dhe të sigurojë që të mos zbatojë masë më të rëndë kur mjafton masa më e butë”.

    Në Dosjen që ka siguruar KALLXO.com thuhet edhe se i mituri ka qenë këmbëngulës që të gjuajë dhe të mësojë përdorimin e armës.

    “Sipas të dhënave, dëshira për përdorim dhe mësim të përdorimit të armëve në një moshë të mitur, siç ka vepruar i mituri, mund të ndikojë jashtëzakonisht keq në formimin e personalitetit të të miturit. Po ashtu kur kemi parasysh këmbëngulësinë e treguar për faktin se i mituri disa herë ka tentuar të gjuajë me armë zjarri në pistë, përkundër se nuk ka mundur. Nuk heq dorë duke tentuar përsëri, ku edhe arrin të shkrepë armën e zjarrit, që për pasojë e lëndon rëndë në nofull të dëmtuarin.” – thuhet në Dosjen e Gjykatës.

    Me këto veprime Gjykata ka konstatuar se edhe këto veprime të të miturit tregojnë rrezikun se i njëjti mund të përsërisë veprën penale.

    Mbi këto vlerësime, gjyqtari ka vendosur që të shqiptojë masën – atë për paraqitjen në Stacion Policor për të miturin.

    Më 27.01.2025, KALLXO.com raportoi se Prokuroria e Gjilanit kishte kërkuar masën e paraburgimit prej një muaji për të miturin i cili dyshohet se ka plagosur zyrtarin policor në një poligon qitjeje, në Pasjak të Novobërdës, më 26.01.2025, si dhe të inspektorit i cili ka qenë duke punuar në poligon, kur ka ndodhur rasti.

    Të dy ishin ndaluar të dielën nga organet e rendit, pak pasi ndodhi incidenti me armë.

    Policia konfirmoi se dyshohet se të miturit aksidentalisht i ka shkrepur arma dhe ka plagosur policin.

    Të hënën Policia e Kosovës në Raportin 24-orësh njoftoi se rasti është iniciuar, si: “vrasje në tentativë nga pakujdesia” dhe “rrezikim i sigurisë në vendin e punës”.

    Sipas detajeve të PK-së, rreth orës 19:00 është raportuar se në një poligon të gjuajtjes, të dyshuarit dyshohet se i është bllokuar arma dhe po ashtu dyshohet se nga pakujdesia aksidentalisht i ka shkrepur arma dhe ka qëlluar zyrtarin policor.

    “Viktima është dërguar në QKUK për trajtim mjekësor. Me vendim të Prokurorit është arrestuar personi i dyshuar dhe instruktori i poligonit për gjuajtje, i dyshuari mashkull kosovar dhe të njëjtit janë dërguar në mbajtje.” – thuhej në Raport.

    Si prova materiale lidhur me rastin, Policia tha se janë sekuestruar tri armë zjarri.

  • Bashkëpunimi i monitoruesve shqiptarë dhe serbë në gjykimet e krimeve të luftës: i dobishëm dhe sfidues

    Si pjesë e projektit “Lehtësimi i Bashkëpunimit Ndëretnik përmes Monitorimit dhe Raportimit të Rasteve të Krimeve të Luftës”, dy monitorues të Gjykatave, njëri nga komuniteti shqiptar dhe tjetri nga komuniteti serb, bashkuan forcat për të monitoruar dhe bashkëprodhuar artikuj mbi rastet e krimeve të luftës në Kosovë, me synimin për të forcuar transparencën, nxitur pajtimin dhe kontribuar në drejtësinë tranzicionale.

    Për gjashtë muaj, Sllobodan Stoshiq, monitorues i Gjykatave nga Mitrovica e Veriut, udhëtoi në Prishtinë për t’u bashkuar me kolegen e tij shqiptare, Adile Agushi, në monitorimin e gjykimeve për krime lufte. Së bashku, ata ndoqën 15 seanca gjyqësore që trajtonin raste ende tejet të ndjeshme për të dy komunitetet, shqiptar dhe serb në Kosovë, më shumë se një çerek shekulli pas përfundimit të luftës.

    Teksa reflektoi mbi përvojën, Stoshiq theksoi rëndësinë e profesionalizmit në punën e tyre.

    “Përvoja ime në lidhje me bashkëpunimin profesional ishte në nivel të lartë me stafin e KALLXO.com. Rastet e monitoruara përfshinin serbë të Kosovës, shqiptarë të Kosovës dhe pjesëtarë të komunitetit goran. Të gjithë këta faktorë duhet të trajtohen për të siguruar një proces monitorimi të duhur dhe raportim të paanshëm.” – tha ai.

    Kjo përvojë për Stoshiq u mundësua falë partneritetit mes Internews Kosova (I/KS) me bazë në Prishtinë dhe Organizatës Joqeveritare, Qendra e Avokimit për Kulturë Demokratike (ACDC) me bazë në Mitrovicën e Veriut, që ilustron misionin e projektit për promovim të bashkëpunimit profesional dhe ndërtim të urave mes grupeve etnike.

    Një perspektivë e veçantë

    Adile Agushi, kolegia shqiptare e Stoshiqit, e cila mbulon raportimin mbi krimet e luftës për KALLXO.com, thotë se përvoja e bashkëpunimit me një monitorues serb ishte sfiduese, por e dobishme.

    “Ka qenë përvojë e jashtëzakonshme, sepse gjatë raportimit jam bazuar në dëshmi dhe asnjëherë në anën emocionale, edhe pse kam monitoruar krimet e luftës kur rastet kanë qenë jashtëzakonisht të ndjeshme. Siç e dimë,  kemi një histori të dhimbshme në raport me serbët. Në këto raportime jam munduar që anën emocionale asnjëherë të mos e përdori në raportimin tim, por të bazohem në dëshmitë që janë prezantuar në Gjykatë nga prokurorët, dëshmitarët e rasteve në fjalë.” – u shpreh ajo.

    Agushi theksoi gjithashtu rëndësinë e punës me kolegët serbë dhe vazhdimin e një praktike të tillë në të ardhmen.

    “Këtë mirëkuptim e kam gjetur edhe te kolegët serbë dhe gjithmonë e kemi raportuar atë çfarë është thënë në Gjykatë, pa bërë dallime. Mendoj që është shumë e rëndësishme që raportimi i këtyre seancave të bëhet prej dy etnive, pasi që e tregojmë atë çka ka ndodhur në Kosovë gjatë luftës së fundit”.

    “Raportimi i seancave nga dy etnitë nuk do të linte vend për dyshime, për anshmëri, pasi që raportimi do të bëhej nga dy etnitë.” – shtoi më tej Agushi.

    Stoshiq konsideron po ashtu se kjo praktikë duhet të vazhdojë në të ardhmen, pasi tregon bashkëpunimin ndëretnik mbi këto çështje të ndjeshme.

    “Besoj se kjo duhet të vazhdojë për një periudhë më të gjatë, në mënyrë që të kemi fleksibilitet dhe të trajtojmë çështjet gjyqësore me përkthim dhe interpretim. Shumica e rasteve ishin kundër serbëve të Kosovës, por jo të kufizuara në një etni të vetme, prandaj duhet të jemi gjithëpërfshirës në monitorim dhe raportim për të siguruar pjesëmarrje dhe prezantim të barabartë.” – shtoi ai.

     Dimension i ri në monitorim

    Gjykimi ndaj Dragisha Millenkoviq, i akuzuar për “krime lufte”, më 08.11.2024 / FOTO: Adile Agushi – KALLXO.com

    Dushan Radakoviq, drejtori i ACDC-së, e përshkroi këtë qasje si inovative dhe transformuese.

    “OJQ ACDC ka histori të gjatë në monitorimin e gjykimeve, por kjo është hera e parë që është realizuar në një format ku procesi vëzhgohet bashkërisht nga dy perspektiva.” – deklaroi ai.

    Radakoviq shtoi se vëzhgimi i gjykimeve nga dy perspektiva është praktikë shumë efektive, veçanërisht në kontekstin e gjykimeve për “krime lufte” në Kosovë.

    “Gjykimet për ‘krime lufte’ shpesh perceptohen shumë ndryshe nga anëtarët e komuniteteve të ndryshme, të ndikuara nga përvojat dhe narrativat historike. Trajtimi i këtyre perceptimeve të ndryshme përmes një perspektive të dyfishtë përmirëson transparencën e proceseve gjyqësore.” – theksoi ai.

    “Vazhdimi i aktiviteteve të tilla do të kishte një ndikim pozitiv, pasi thekson këto perceptime të ndryshme.” – shtoi Radakoviq.

    Faik Ispahiu, drejtor i Internews Kosova, e cilësoi Programin si një model që duhet ndjekur vazhdimisht për raportimin mbi çështje specifike, veçanërisht krimet e luftës.

    ”Ky Program është vazhdimësi e Programeve që Organizata i ka realizuar në krijimin e grupeve të përbashkëta multietnike përgjegjëse për monitorim, gazetari hulumtuese dhe Programe të Fact Check.” – deklaroi Ispahiu.

    Ai theksoi se përveç ndërtimit të urave ndërmjet komuniteteve, Programi ka kontribuar ndjeshëm në luftimin e dezinformatave dhe lajmeve të rreme për krimet e luftës.

    “Fatkeqësisht, përmes Programit të verifikimit të fakteve, kemi identifikuar mbi 100 lajme të rreme që lidhen me krimet e luftës. Besoj se është thelbësore që iniciativa si kjo, e fokusuar në prodhimin profesional të përmbajtjes për krimet e luftës, të vazhdojnë.” – tha ai, duke iu referuar Krypometrit, platformës së verifikimit të fakteve të KALLXO.com.

    Rastet e monitoruara përfshinin gjykime të profilit të lartë, si rasti i Muhamet Alidemaj (i akuzuar për pjesëmarrje në masakrën e Izbicës), Ekrem Bajroviq (i akuzuar për krime lufte gjatë viteve 1998-1999) dhe Gavrilo Milosavljeviq (i implikuar në masakrën e burgut të Dubravës).

    Më shumë se dy dekada pas luftës, Kosova ende përballet me çështje të pazgjidhura – duke përfshirë personat e zhdukur, vrasjet dhe krimet e tjera kundër civilëve. Ky projekt theksoi rolin e transparencës gjyqësore dhe raportimit të balancuar për të adresuar këto krime dhe për të hapur rrugën drejt pajtimit.

    Internews Kosova, që monitoron aktivisht Sistemin Gjyqësor të Kosovës që nga viti 2008, ka vëzhguar mbi 13,000 seanca gjyqësore – përfshirë 300 vetëm gjatë vitit 2023. Ndërkohë ACDC, me fokusin e saj në aktivizmin shoqëror dhe qeverisjen transparente, solli përvojë të gjerë në monitorimin e proceseve zgjedhore dhe nxitjen e angazhimit qytetar.

    Artikulli fillimisht është publikuar në Prishtina Insight.