Kategori: Botë

  • Britania paralajmëron Putinin, pasi anija përgjuese ruse rikthehet në ujërat britanike

    Flota Ushtarake Mbretërore e Britanisë së Madhe ka monitoruar një anije përgjuese ruse, pas hyrjes së saj në ujërat britanike në fillim të javës – ka bërë të ditur të mërkurën, më 22.01.2025, Sekretari i Mbrojtjes – raporton BBC.

    John Haeley ka thënë se anija “Yantar” është përdorur për mbledhjen e informacioneve të inteligjencës dhe të hartëzimit të infrastrukturës nënujore kritike të Mbretërisë së Bashkuar.

    Ai ka thënë se incidenti është “një tjetër shembull i rritjes së agresionit rus”.

    “Dua gjithashtu që presidenti Putin të dëgjojë këtë mesazh: ne po ju shohim, ne e dimë çfarë po bëni dhe ne nuk do të sprapsemi prej veprimit të vendosur për ta mbrojtur këtë vend.” – theksoi ai.

    Rusia e përshkruan “Yantarin” si anije kërkimore shkencore oqeanore dhe se po operohej prej Ministrisë ruse të Mbrojtjes.

    Shtetet perëndimore shpesh kanë vërejtur anijen duke operuar në ujërat europiane dhe dyshojnë se pjesë e misionit të saj është krijimi i një harte të kabllove nënujore.

    Ato besojnë gjithashtu se Rusia ka rritur numrin e këtij aktiviteti, prej nisjes së agresionit të plotë kundër Ukrainës.

    Bashkë me pajisjet e përgjimit, anija mund të operojë edhe dronë nënujorë të aftë për të arritur deri në shtratin oqeanor.

    Infrastruktura nënujore është qenësore për furnizimin me energji të kabllove dhe tubave, derisa 95% e trafikut të internetit sigurohet gjithashtu nëpërmjet kabllove nënujore.

    Healey ka thënë se “Yantari” së fundmi ka lundruar në Detin e Veriut, pasi ka kaluar përgjatë ujërave britanike dhe ishte spikatur rreth 10 kilometra larg bregut britanik në Kanalin Anglez të hënën.

    Ai ka thënë se Qeveria britanike po fuqizon kundërpërgjigjen ndaj aktivitetit detar rus, në koordinim me aleatët e NATO-s. Ai ka thënë se Forca Ajrore Mbretërore e Britanisë do të ofrojë monitorim ajror për t’iu bashkuar një misioni të NATO-s, për mbrojtje të infrastrukturës kritike në Detin Baltik.

    Zhvillimi ka ardhur pasi një kabllo nënujore ndërmjet Estonisë dhe Finlandës u dëmtua në dhjetor, me Policinë finlandeze që po heton nëse në këtë punë kishte gisht një anije ruse.

    Përgatiti: Rexhep Maloku – Kallxo.com

  • Macja, që u harrua në aeroplan, i bëri tri fluturime brenda 24 orëve

    Një mace i ka bërë tri fluturime ndërmjet Zelandës së Re dhe Australisë brenda 24 orëve, pasi e kishin harruar në bordin e një aeroplani – raporton të mërkurën, më 22.01.2025, transmetuesi britanik BBC.

    Mittensm, një mace tetëmuajshe e racës “Maine Coon”, planifikohej të fluturonte nga Christchurch në Melburn  më 12 janar, por kafazi ishte harruar në bagazhin e fluturakes së “Air New Zealand”.

    Pasi kishte pritur rreth tri orë për Mittensin në aeroportin e Melburnit, pronares Margo Neas i ishte thënë prej personelit të aeroportit se aeroplani tashmë ishte kthyer në Zelandë të Re, me kafshën shtëpiake në bagazh.

    Gjatë fluturimit ishte lëshuar ngrohja, me qëllim që macja të ndihet rehat – ka thënë zonja Neas. Mittens, e cila ka humbur peshë, por nuk është lënduar, pastaj kishte kthyer me fluturim në Melburn që të bëhej bashkë me pronaren.

    Duke folur të mërkurën për NBC-në, zonja Neas ka thënë se ajo dhe i biri ishin informuar për keqkuptimin prej personelit tokësor të aeroportit në Melburn.

    “Ata thanë: ‘Shiko, e kemi gjetur macen tuaj, por aktualisht është rrugës së fluturimit kthyes në Christchurch’”.

    “Dhe, unë thashë: ‘Kur e morët vesh se macja nuk ishte shkarkuar nga aeroplani?’ Dhe, ata më thanë: ‘Porsa e morëm vesh tani’. Dhe, unë thashë: ‘Qysh ndodhi kjo?’”.

    Zonjës Neas i ishte thënë se piloti tashmë ishte njoftuar, që ta lëshonte sistemin e ngrohjes në bagazh, ku temperaturat ishin të ulëta nën 7 shkallë Celsius.

    Incidenti ende po hetohet, por raportohet se një karrocë mund t’ia ketë zënë pamjen përgjegjësit për menaxhimin e kafazit të Mittensit në bagazh.

    “Air New Zealand” ka kërkuar falje për stresin e shkaktuar – duke premtuar se do të rimbursojë të gjitha kostot e fluturimit.

    Kompania nuk pranon drejtpërdrejt rezervime biletash për kafshë shtëpiake nga publiku për fluturime ndërkombëtare, andaj pasagjerët duhet t’i kalojnë kafshët e tyre nëpërmjet firmave që kanë transportues kafshësh.

    Zonja Neas ka theksuar se ndihet e lehtësuar, që më në fund u bashkua me Mittensin.

    “Ajo më është hedhur në krahë e u struk aty dhe më dha përqafimin më të madh ndonjëherë.” – është cituar të ketë thënë ajo për Agjencinë e lajmeve AP, të mërkurën. “Ishte një lehtësim i madh.” – ka shtuar zonja Neas, e cila më parë kishte vendosur të zhvendosej në Australi. “Nuk ishte fillim i mbarë për jetën tonë të re në Melburn, sepse nuk e kemi familjen. Nuk ishim kompletuar të gjithë”.

    Fluturimi njëdrejtimësh ndërmjet Christchurchit dhe Melburnit zakonisht zgjat më pak se katër orë.

     

     

  • Delegacioni presidencial i Kosovës në inaugurimin e Trumpit thekson rëndësinë e bashkëpunimit me SHBA-në

    Presidenca e Kosovës ka njoftuar se delegacioni i saj ka marrë pjesë në aktivitetet e organizuara me rastin e inaugurimit të presidentit amerikan, Donald Trump.

    Siç thuhet nga Presidenca, ky delegacion ka marrë pjesë në “Ceremoninë e Betimit të Presidentit Trump në Capitol Hill, tubimin e mbajtur para Ceremonisë së Betimit në Capital One Arena, Ballon e Komandantit Suprem, Ballon Presidenciale ‘The Liberty Ball’, Ballon ‘Black Tie and Boots’ të organizuar nga Texas State Society, Midwest Galla, pritjen e organizuar nga Dr. Miriam Adelson, Tilman Fertitta, Sylvie Legere & Todd Ricketts e Mark Zuckerberg, si dhe në Shërbesën e Lutjeve Kombëtare në Washington National Cathedral”.

    Në komunikatën e Presidencës thuhet se delegacioni është takuar me disa zyrtarë të lartë, senatorë, kongresistë, njerëz të biznesit dhe nga sfera të tjera.

    Gjatë takimeve me zyrtarë amerikanë thuhet se u theksua edhe rëndësia e vizitave të ndërsjella dhe rëndësia e bashkëpunimit për ruajtjen e sigurisë në rajon.

    “Gjatë këtyre aktiviteteve, ata kanë pasur mundësinë të bisedojnë me: kryetarin e Dhomës së Përfaqësuesve në Kongresin amerikan, Mike Johnson; të nominuarin e presidentit Trump për Drejtor të CIA-s, John Ratcliffe; kongresistin dhe kryesuesin e Nënkomitetit për Evropë në Komitetin për Politika të Jashtme të Dhomës së Përfaqësuesve të SHBA-ve, Keith Self; kongresistin, Chip Roy; kongresistin, Ronny Jackson; senatorin, John Cornyn, kongresistin, Ted Cruz; guvernatorin e Teksasit, Greg Abbott; guvernatoren e Ioëa, Kim Reynolds; ambasodorin e nominuar të presidentit Trump në NATO, Matt Ëhitaker; zëvendësguvernatorin e Teksasit, Dan Patrick; prokurorin e Përgjithshëm të Teksasit, Ken Paxton; ish-sekretarin e Përgjithshëm të NATO-s, Jens Stoltenberg; senatoren e Teksasit, Angela Paxton; këshilltarin lokal, Gino Mulliqi dhe ish-kongresistin Jack Fields. Si dhe, përfaqësues të shumtë të mërgatës.” – thuhet në komunikatën e Presidencës.

    Tutje, thuhet se në takime u përcollen urimet e presidentes Vjosa Osmani për presidentin Trump dhe u konfirmua angazhimi i Kosovës për avancimin e raporteve bilaterale.

    Delegacioni i Presidencës që mori pjesë në këto aktivitete përbëhej nga ambasadori i Kosovës në SHBA, Ilir Dugolli; shefja e Stafit të Presidentes, Learta Hollaj dhe këshilltarja për Politikë të Jashtme, Rejhan Vuniqi.

    Presidentja e Kosovës, Vjosa Osmani nuk ka marrë pjesë në Ceremoninë e Inaugurimit të presidentit amerikan, Donald Trump më 20.01.2025.

    Bekim Kupina, këshilltar për media i presidentes Osmani, kishte thënë për KALLXO.com që Osmani ka marrë ftesë nga anëtarë të Kongresit të Shteteve të Bashkuara (Senati dhe Dhoma e Përfaqësuesve).

    Mirëpo, Kupina më 18.01.2025 pati deklaruar se duke u bazuar në traditën protokolare, shumica e vendeve përfaqësohen në këto Ceremoni nga ambasadorët e tyre të akredituar në Washington D.C, kështu që ka deleguar një delegacion nga Presidenca.

    “Duke e vlerësuar këtë ngjarje si një moment të rëndësishëm në marrëdhëniet në mes Kosovës dhe SHBA-ve, Presidentja ka vendosur ta dërgojë një delegacion të Kabinetit të saj, i cili së bashku me ambasadorin në SHBA, Ilir Dugolli do ta përfaqësojnë Kosovën në aktivitetet inauguruese të datave 19-21 janar.” – tha Kupina, më 18.01.2025.

    https://kallxo.com/lajm/mori-ftese-nga-tre-kongresmene-por-nuk-do-te-shkoje-osmani-dergon-delegacion-ne-inaugurimin-e-trumpit/