Kategori: Botë

  • Dhjetëra të vrarë nga sulmet izraelite në Gazë mes përpjekjeve të shtuara për armëpushim

    KAJRO – Mjekët palestinezë njoftuan të mërkurën për dhjetëra të vrarë nga sulmet izraelite në Rripin e Gazësndërsa bisedimet për një armëpushim të mundshëm vazhduan në Katar dhe forcat izraelite gjetën trupin e të paktën një pengu në një tunel në afërsi të Rafahut.

    Punonjësit mjekësorë palestinezë thanë se një sulm ajror izraelit shkaktoi vdekjen e të paktën 10 personave në një shtëpi shumëkatëshe në lagjen Sheik Raduan, në qytetin e Gazës, dhe 10 të tjerë u vranë në pjesë të tjera të qytetit.

    Në Deir Al-Balah, qytet në pjesën qendrore të Rripit të Gazës, ku qindra mijëra palestinezë të zhvendosur po strehohen, dhe në Xhabali, kampin më të madh të refugjatëve nga tetë kampe të tilla në Gazë, shtatë persona u vranë, sipas tyre.

    Ushtria izraelite tha se ka goditur militantët e Hamasit, të cilët po vepronin në një ndërtesë shkolle në kampin e Xhabalisë dhe theksoi se ndërmori masa për të minimizuar rrezikun ndaj civilëve.

    Shifra të tilla viktimash janë bërë përditshmëri në Gazë, ku rreth 46,000 palestinezë janë vrarë gjatë luftimeve 15 muajshe të Izraelit ndaj Hamasit, sipas zyrtarëve shëndetësorë në këtë territor.

    Ndërkohë që Izraeli po vazhdon bombardimet, Shtetet e Bashkuara, Katari dhe Egjipti po bëjnë përpjekje intensive për të arritur një marrëveshje armëpushimi. Një burim pranë bisedimeve vlerësoi se përpjekjet aktuale janë përpjekjet më serioze të bëra deri më tani për të arritur një marrëveshje.

    Administrata aktuale amerikane ka bërë thirrje për një përpjekje të fundit për arritjen e një marrëveshjeje para largimit të Presidentit Biden dhe shumë në rajon e shohin inaugurimin e Presidentit të zgjedhur Donald Trump më 20 janar si një afat jozyrtar për arritjen e saj.

    “Gjërat janë më mirë se në të kaluarën, por ende nuk ka marrëveshje”, i tha një burim agjencisë Reuters.

    I dërguari i posaçëm i zotit Trump për Lindjen e Mesme, Steve Witkoff tha gjatë orëve të vona se shpresonte që do të ketë lajme të mira për pengjet izraelite deri në ditën e betimit të zotit Trump si president. Një marrëveshje do të përfshinte edhe lirimin e palestinezëve që mbahen në burgjet izraelite.

    Ndërkohë që vazhduan bisedimet të mërkurën, forcat izraelite njoftuan se kanë gjetur trupin e pengut beduin Youssel Al-Ziyadna dhe prova të cilat sugjerojnë se edhe djali i tij, Hamza, që u mor peng në të njëjtën ditë, mund të ketë vdekur.

    “Do të vazhdojmë të bëjmë çdo përpjekje për t’i kthyer pengjet, të gjallë apo të vdekur”, deklaroi Kryeministri izraelit Benjamin Netanyahu përmes një deklarate.

    Spitalet nën kërcënim

    Organizata bamirëse Mjekët Pa Kufij paralajmëroi se tre spitale në Gazë janë buzë kolapsit për shkak të mungesës së karburanteve. Mbyllja e tyre rrezikon jetën e qindra pacientëve dhe të foshnjeve, sipas saj.

    Izraeli mohon se po pengon futjen e ndihmave humanitare në Gazë dhe thotë se po lehtëson shpërndarjen e ndihmave nga qindra kamionë me ushqime, ujë, ilaçe dhe tenda.

    Izraeli e filloi operacionin në Gazë pas sulmit të Hamasit ndaj vendbanimeve izraelite me 7 tetor të vitit 2023, që shkaktoi vdekjen e 1,200 personave dhe gjatë të cilit militantët morën 250 pengje, sipas të dhënave izraelite.

    Luftimet në Gazë kanë shkatërruar pjesën më të madhe të enklavës. Shumica e 2.1 milionë banorëve të Gazës janë zhvendosur disa herë dhe ata po përballen me mungesë të vazhdueshme ushqimesh dhe ilaçesh, sipas organizatave humanitare.

    Të mërkurën, Federata Ndërkombëtare e Kryqit të Kuq dhe Shoqata e Hënës së Kuqe thanë se shiu i rrëmbyeshëm dhe vërshimet kanë kapluar tendat e familjeve të zhvendosura, duke i mbushur deri me 30 centimetra ujë. “Ato mezi po mbijetojnë pa gjërat më bazike, siç janë batanijet”, sipas organizatave.

    Izraeli dhe Hamasi akuzojnë njëra-tjerin për bllokimin e marrëveshjes për armëpushim dhe lirimin e pengjeve duke mos bërë lëshime për kushtet e vendosura, duke i dështuar të gjitha përpjekjet gjatë këtij viti.

    Të martën, Hamasi këmbënguli ndaj kërkesës së tij, duke thënë se do t’i lirojë pengjet e mbetura nëse Izraeli pajtohet t’i jap fund luftës dhe të tërheqë të gjitha forcat e saj nga Gaza. Izraeli thotë se nuk do t’i japë fund luftës deri në shkatërrimin e Hamasit dhe deri në lirimin e të gjitha pengjeve./VOA

  • Fico thotë se siguroi furnizimin e Sllovakisë me gaz në bisedimet me Putinin

    Kryeministri Robert Fico tha të mërkurën se kishte siguruar furnizimin me gaz të Sllovakisë gjatë një takimi me Presidentin rus, Vladimir Putin, në Moskë muajin e kaluar, pak para se Ukraina të ndalonte kalimin e gazit nga Rusia në fillim të këtij viti.

    “Më duhej të siguroja minimumin e gazit të nevojshëm për konsum të brendshëm në Sllovaki, gjë që e kemi arritur”, tha zoti Fico në një video të postuar në rrjetin Facebook. Kryeministri sllovak nuk dha më shumë detaje ndërsa zyrtarë të qeverisë nuk iu përgjigjën menjëherë një kërkese për koment.

    Zoti Fico e ka akuzuar Kievin se e ka dëmtuar Sllovakinë duke mos zgjatur një marrëveshje tranziti për gazin rus që skadoi në fund të vitit 2024. Ai ka kërcënuar se do të shkurtojë nivelin e energjisë elektrike që shkon drejt Ukrainës dhe se do të reduktojë ndihmën për refugjatët ukrainas.

    Sipas të dhënave të operatorit sllovak të rrjetit të transmetimit të gazit “Eustream”, Sllovakia ka vazhduar të marrë gaz që vjen nëpërmjet Hungarisë, e cila furnizohet me gazin rus nëpërmjet tubacionit “Turk Stream”, që nga ndalimi i prurjeve nga Ukraina.

    Zoti Fico tha se ndalimi i gazit nga Ukraina i ka kushtuar vendit të tij rreth 500 milionë euro në tarifa tranziti dhe 1 miliard euro për çmimet më të larta të gazit. Ai do të takohet me zyrtarë të Komisionit Evropian në Bruksel të enjten për të diskutuar mbi ndalimin e transitit të gazit nga Ukraina.

    Kievi ka thënë se ndalimi i transitit të gazit e dëmton Moskën ekonomikisht për sa kohë që Rusia vazhdon të sulmojë Ukrainën. Presidenti ukrainas, Volodymyr Zelenskiy, e ka akuzuar Kryeministrin Fico për hapjen e një “fronti të dytë energjetik” kundër Ukrainës me urdhër të Rusisë./ VOA

     

  • Blinken: Ideja e Trumpit që SHBA-ja ta marrë nën kontroll Grenlandën s’do të realizohet

    Sekretari amerikan i Shtetit, Antony Blinken, ka thënë se bota “nuk duhet të humbë shumë kohë” me atë që është duke e thënë presidenti i zgjedhur amerikan, Donald Trump, rreth Grenlandës.

    Trumpi e bëri të qartë përsëri këtë javë se dëshiron që territori gjysmautonom i Danimarkës të vihet nën kontrollin e Shteteve të Bashkuara dhe tha se nuk e hedh poshtë as mundësinë e përdorimit të forcës ushtarake për ta arritur këtë.

    “Neve na nevojitet Grenlanda për qëllime të sigurisë kombëtare”, tha Trump.

    Megjithatë, sekretari në shkuarje i Shtetit tha se qëllimet e presidentit të ri amerikan me gjasë nuk janë asgjë më shumë se vetëm fjalë.

    “Ideja e shprehur për Grenlandën nuk është e mirë, natyrisht”, tha Blinken gjatë një vizite në Paris.

    “Mbase më e rëndësishme është, sigurisht, ideja se kjo nuk do të ndodhë. Prandaj, ne mbase nuk duhet të humbim shumë kohë duke folur për këtë”, tha ai.

    Ministri i Jashtëm i Francës, Jean-Noel Barrot, gjithashtu hodhi poshtë mundësinë që forcat amerikane të vendosen kundër Danimarkës, e cila është aleate e SHBA-së në aleancën ushtarake të NATO-s.

    Megjithatë, Barrot paralajmëroi se Evropa duhet të përgatitet për një periudhë turbulencash në të ardhmen.

    “A mendon dikush se Shtetet e Bashkuara do ta pushtojnë Grenlandën? Përgjigja është ‘jo’”, tha ministri francez.

    “Por, a mendojmë se po hyjmë në një periudhë ku ligji i më të fortit po kthehet? Përgjigja është ‘po’”, shtoi ai.

    Barrot theksoi se Evropa duhet të bëhet më e fortë ushtarakisht dhe më konkurruese ekonomikisht e komercialist për t’iu përgjigjur kësaj situate.

    “Duhet të shkojmë shumë më larg për ta ritheksuar se kush jemi dhe çfarë duam”, tha ai.

    Kryeministrja e Danimarkës, Mette Frederiksen, ka thënë se nuk beson se Shtetet e Bashkuara do ta përdorin fuqinë ushtarake ose ekonomike për ta marrë kontrollin mbi Grenlandën dhe i ka bërë thirrje SHBA-së të ketë sjellje më “respektuese ndaj popullit të Grenlandës”.

    Në Gjermani, kancelari Olaf Scholz theksoi të mërkurën se parimi i paprekshmërisë së kufijve vlen për çdo vend, pavarësisht sa i fuqishëm është ai, duke reaguar ndaj komenteve të Donald Trumpit, pa e përmendur presidentin e zgjedhur me emër.

    “Kufijtë nuk duhet të ndryshohen me forcë”, tha Scholz./REL