Etiketë: AAK

  • AAK: Me marrjen e mandatit qeverisës do ta nënshkruajmë Planin për anëtarësim në NATO

    Aleanca për Ardhmërinë e Kosovës (AAK) qysh para nisjes së fushatës zgjedhore ka nisur të proklamojë idenë se me ardhjen e saj në pushtet, Kosova do të anëtarësohet në NATO.

    Në frymën e kësaj edhe fushatën zgjedhore të cilën po e zhvillon në koalicion me Nismën Socialdemokrate, Konservatorët, Forumin Intelektual E-30 dhe Listën Ideal po e bën me sloganin “Direkt në NATO” .

    Kandidati për deputet nga radhët e AAK-së, Besnik Krasniqi është zotuar në “Debat Përnime”, më 17.01.2025, se një nga punët e para që do të bëjnë nëse e fitojnë besimin e qytetarëve për të qeverisur vendin, do të jetë nënshkrimi i Planit për anëtarësim në NATO.

    “Do të fillojmë një dialog politik konkret dhe direkt me NATO-n, për anëtarësimin e privilegjuar, që është i mundshëm. Qysh në fillim të mandatit tonë do ta nënshkruajmë Planin për anëtarësim në NATO.” – tha Krasniqi.

    Për përmbushjen e këtij premtimi, ai deklaroi se me urgjencë do të fillojnë bisedimet me Shtetet e Bashkuara të Amerikës (SHBA) dhe NATO-n, për zhvillimin e planit konkret që Kosova të bëhet pjesë e NATO-s.

    Ndërsa kandidati tjetër për deputet, Ahmet Isufi foli për përgatitjet që parashihen të bëhen në FSK.

    Sipas tij, FSK është një kombinim i strategjisë së brendshme të shtetit tonë, por e ndihmuar nga NATO me misionin e KFOR-it në Kosovë.

    Tutje, Isufi tha se pa anëtarësim të Kosovës në NATO nuk mund të ketë as zhvillime të tjera si shkak i mungesës së sigurisë.

    “Ne e kemi në Programin tonë edhe sloganin, i cili është ‘Direkt në NATO’ dhe qëllimisht e kemi bërë këtë, sepse konsiderojmë që pa siguri nuk ka asnjë zhvillim tjetër që mund të jetë efikas për qytetarët e Kosovës dhe për vendin tonë.” – tha Isufi.

    AAK parasheh gjithashtu edhe krijimin e një ekipi me diplomat për akreditim në NATO, si dhe zhvillimin e Qendrës së Ekselencës Ushtarake për rajonin, me kapacitete të specializuara të FSK-së.

    Ndërsa, Krasniqi si shumë të nevojshme e ka parë edhe hapjen e Ambasadave në të gjitha shtetet e NATO-s, në të cilat Kosova ende nuk i ka të hapura.

    “Kosova duhet me urgjencë që të hapë Ambasada në të gjitha shtetet e NATO-s, ku nuk i kemi momentalisht të hapura. Në ato aktualet, duhet të shtohen diplomatët e fushëveprimit të sigurisë.” – tha Krasniqi.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanikë, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.

    Për më shumë, lexoni në linkun në vijim:

    https://kallxo.com/gjate/direkt-ne-nato-plani-i-koalicionit-aak-nisma-per-sigurine-ne-kosove/

  • Haradinaj në Rahovec zotohet për anëtarësimin e Kosovës në NATO

    Aleanca për Ardhmërinë e Kosovës bashkë me partnerët e saj të koalicionit, Nismën Socialdemokrate, Konservatorët, Forumin Intelektual E-30, dhe Listën Ideal, më 16.01.2025 e kanë vazhduar fushatën për zgjedhjet e 09.02.2025 me një tubim në Rahovec.

    Kandidati i koalicionit për kryeministër, Ramush Haradinaj, edhe një herë ka përsëritur zotimin se me ardhjen e tij në pushtet Kosova do të anëtarësohet në NATO.

    Situatën aktuale të sigurisë ai e ka quajtur improvizim.

    “Kemi një situatë të sigurisë që është një lloj improvizimi, jemi mbetë lajm për tema të sigurisë, jemi sulmu, na është vra një polic, jemi sulmu në objekte, në infrastrukturë. Është shkatërruese koncepti i tillë improvizues i sigurisë, bën shumë sherr. Kur atyre i duhet më shtu trupa të KFOR dhe EULEX i bie që ne nuk e kemi marrë veten mirë. Ne duhet me hy në NATO. Dhe mund të ju them që kam punu në këtë temë dhe rezultatin do ta kemi shumë shpejt lajmin e anëtarësimit të Kosovës” – ka thënë ai.

    Ndërsa kryetari i Nismës Socialdemokrate, Fatmir Limaj, ka thënë se partneriteti është fuqi dhe se secili nga ta duhet ta shohë si vlerë të shtuar rreshtimin për t’i sjellë Kosovën siguri, energji, të hyra, mirëqenie e të tjera.

    Ai ka ftuar qytetarët të votojnë këtë koalicion pasi, sipas tij, Kosova ka nevojë për politikanë të pjekur e zëra racionalë.

    “Ne refuzojmë përçarje, gjuhën helmuese që po dëgjojmë”- u shpreh ai.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • AAK gjobitet më 12 mijë euro për deklaratat e Ramush Haradinajt kundër Albin Kurtit

    Paneli Zgjedhor për Ankesa dhe Parashtresa (PZAP) ka dënuar me 12 mijë euro Aleancën për Ardhmërinë e Kosovës, pas Ankesës së Lëvizjes Vetëvendosje me pretendimin se kryetari i AAK-së, Ramush Haradinaj ka drejtuar akuza të pabaza dhe të pavërteta.

    Ankesa e LVV-së ishte se Haradinaj ishte drejtuar me fjalët “Duhet me hek mashtruesin” dhe “Dojmë me e rrit mbrojtjen, nuk dojmë me bo lojna me sigurinë nacionale, pas shpinës së aleatëve tanë, e në interes të Rusisë dhe Serbisë nga argati i tyre”.

    Sipas Ankesës së LVV-së, më tej, shkelja e Kryetarit të këtij subjekti vazhdon “Shko Albin te Prokurori, se nuk po dojmë me u vjedhë rezervat shtetërore, buka e ushtarit, as energjia. Shko te Prokurori, bashkë me hajnat se je Shef i hajnave.”, e duke vazhduar me shprehjet “A jeni për me e çu mashtruesin në shpi?”, “UÇK nuk ka mercenarë, ti dhe soji yt jeni mercenarë”.

    Tutje, në Ankesë parashtruesi thekson se në tubimin e njëjtë kandidati tjetër për Deputet nga radhët e AAK-së, Ardian Gini thotë “është Byro e Korrupsionit”.

    Për këtë rast, PZAP ka pranuar Ankesën e LVV-së dhe ka gjobitur AAK-në me 12 mijë euro.

    Sipas Vendimit, AAK-ja ka afat prej 15 ditësh që ta paguajë gjobën.

    Aleanca për Ardhmërinë e Kosovës, e gjobitur në këtë rast, ka kundërshtuar Ankesën – duke thënë se Ankesa është parashtruar mbi bazën e një lajmi të publikuar në Gazetën Nacionale.

    “Tutje, në përgjigje të Ankesës theksohet se Gazeta Nacionale në artikull përkatësisht ka parafrazuar. Pra, kryetari i subjektit politik AAK, Ramush Haradinaj, në asnjë pjesë të fjalimit të tij politik të datës 12.01.2025 nuk ka përdorur shprehjet e specifikuara në Ankesë. AAK thekson se nuk kemi të bëjmë me shkeljet e pretenduara nga Ligji për Zgjedhjet e Përgjithshme në Kosovë.” – thuhet në Vendim.

    Vendimin e plotë të PZAP-së, mund ta gjeni në këtë LINK.