Etiketë: zgjedhjet 2025

  • Abazi (AAK): Për blerjen e helikopterëve s’ka asgjë konkrete, raporti me SHBA-të në gjendje alarmi

    Haki Abazi, kandidat për deputet nga koalicioni AAK-Nisma, konsideron se raportet e Kosovës me Shtetet e Bashkuara të Amerikës (SHBA) janë në gjendje alarmi.

    Këtë bindje, ai e ka shprehur gjatë emisionit “Debat Përnime”, më 27.01.2025, duke u mbështetur në vizitën e fundit që ka pasur në ShBA së bashku me kandidatin për kryeministër, Ramush Haradinaj, me rastin e ceremonisë së inaugurimit të presidentit amerikan, Donald Trump.

    “Nuk mendoj që është vetëm çështje e debatit elektoral. Sot, me krejt përgjegjësinë po u them se nga vizita e fundit pesëditore me z.Haradinaj, në takime në Departamentin e Shtetit, në Kongres, Senat, Komisionin për çështje të politikës së jashtme të Amerikës dhe në Sekretarinë e Mbrojtjes, alarmi është shumë i madh. Nuk mundem t’ua shpjegoi se sa janë të hidhëruar e të dëshpëruar për raportin e keq që ka ndërtuar kjo qeveri me institucionet amerikane”- tha Abazi.

    Në kuadër të këtij raporti, diskutimi u ngrit edhe për çështjen e helikopterëve që Kosova ka blerë nga SHBA-ja. Mirëpo, sipas Abazit, as për këtë çështje nuk ka asnjë hapë konkret.

    “Çështja e helikopterëve është një kërkesë dhe zotim i ministrit të Mbrojtjes që është vendosë në tavolinë në vizitën e fundit të tij, por nuk ka asnjë hap konkret për çështjen e helikopterëve”- thotë ai.

    Sipas Abazit, raport i njëjtë qëndron edhe me Bashkimin Europian (BE). “Nuk mund të këtë hapa drejt heqjes se sanksioneve me një mendësi të tillë qeverisëse”, thotë ai.

    Derisa Kosova është nën masa ndërkombëtare, Abazi përmendi investimet që po behën në shtetet fqinje.

    “Investime marramendëse në të gjitha aspektet në Shqipëri, investime në Serbi, ndërsa Kosova nën sanksione të plota, përfshirë edhe mbylljen e dyerve për takime”, është shprehur Abazi.

    Kryeministri i Kosovës, sipas tij, nuk ka qenë në gjendje ta bëjë as edhe një shtrëngim dore me liderët e BE-së gjatë pjesëmarrjes në Davos.

    “Janë harxhuar 350 mijë euro në momentin e fundit sa për sy e faqe për popullzim, jo  për objektiva të qarta për politiken e jashtme”- tha ai.

    Ndërsa, Forca e Sigurisë së Kosovës (FSK) ka marrë dritën e gjelbër nga Shtetet e Bashkuara të Amerikës, në blerjen e helikopterëve, radarëve dhe mbrojtjes ajrore – kishte deklaruar Ministria e Mbrojtjes me 15.01.2025.

    Siç ka njoftuar Ministria, kjo është konfirmuar nga vizita zyrtare në SHBA e ministrit të Mbrojtjes, Ejup Maqedonci.

    “Mbështetja e SHBA-së përbën një shtyllë të rëndësishme për paqen, stabilitetin dhe zhvillimin e Kosovës, si një vend me vizion euroatlantik. Mirënjohje të thellë për aleatin tonë të përhershëm, SHBA-në, për ndihmën dhe besimin e vazhdueshëm.” – citohet ministri Maqedonci, në postimin e publikuar më 15.01.2025 nga Ministria e Mbrojtjes.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “DebatPërnime”, në nisje të debatit ku u diskutua për politikën e jashtme tha se “Donika Gërvalla si ministre e Punëve të Jashtme, Glauk Konjufca si Kryetar i Kuvendit, Vjosa si Kryetare, deri tani edhe komplet Qeveria Kurti 2, me gjithë respektin ndaj tyre, janë udhëheqësia e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në tekstin në vijim:

    https://kallxo.com/gjate/angazhim-te-emisareve-speciale-per-njohje-dhe-dergim-te-draftit-te-asociacionit-ne-kushtetuese-plani-i-koalicionit-aak-nisma-per-politiken-e-jashtme/

  • Koalicioni AAK-Nisma planifikon angazhimin e 10 emisarëve specialë për njohje të shtetit

    Kandidati për deputet, Haki Abazi, gjatë emisionit “Debat Përnime”, më 27.01.2025, ka ritheksuar premtimin më të madh elektoral të Koalicionit AAK-Nisma, për anëtarësimin e vendit “direkt në NATO”, përmes planit aksional. Ndër tjera, ai përmendi edhe synimet për anëtarësimin e Kosovës në Bashkimin Europian (BE) dhe në institucionet e tjera të rëndësishme ndërkombëtare.

    Këto zotime, sipas Abazit, do të përmbushën në saje të “reformës së thellë” që ky koalicion e ka pararparë për politikën e jashtme.

    “Reforma  e thellë në Ministrinë e Jashtme dhe përbrenda saj janë katër shtylla kryesore: njohjet e reja, siguria dhe mbrojtja, marrëdhëniet tregtare dhe zhvillimi ekonomik si pjesë e politikës së jashtme dhe diplomacisë kulturore”- tha Abazi.

    Pjesë e reformave të politikës së jashtme, sipas tij, do të jetë edhe emërimi i dhjetë emisarëve specialë të cilët do të angazhohen për njohje të reja dhe anëtarësimin e Kosovës në organizata ndërkombëtare.

    Pesë prej këtyre emisarëve parashihen të jenë ndërkombëtarë dhe pesë të tjerë vendor.

    “Ne planifikojmë t’i kemi 10 emisarë specialë për njohje, një për vendet e BE-së dhe [të tjerët] në kontinentet [tjera], pasi kemi vende që ende nuk e kanë njohur [Kosovën], e që duhet të kemi një angazhim special”- thotë Abazi.

    Krahas zotimeve për një politikë të jashtme më konstruktive, ai bëri kritika për ish-partinë e tij që aktualisht është në pushtet- Lëvizjen Vetëvendosje.

    Derisa tha se janë tejet të ‘brengosur’ për gjendjen e Kosovës në raport me ndërkombëtarët, Abazi shtoi se “për këto katër vite Ministria e Punëve të Jashtme, punoi me urdhëresa administrative dhe asnjë ligj të vetëm nuk e solli në parlament”.

    Edhe pse ishte premtuar se qysh në vitin e parë do të sillej në Kuvend, Ligji për Shërbime Diplomatike, i cili do të rregullonte funksionimin e Ministrisë së Punëve të Jashtme, sipas kandidatit Abazi, kjo nuk ka ndodhur.

    Ai pati kritika edhe për Komisionin parlamentar për punë të jashtme, i cili ishte nën udhëheqjen e tij për dy vite. Abazi pretendon se në këtë komision u votuan diplomat me ndikime politike dhe u refuzuan njerëz profesionist.

    “Vendimet që janë marrë për diplomat janë bërë me qelës politik, [përfshirë] edhe ata që kanë kaluar përmes Komisionit për punë të jashtme, të cilin e kam udhëheq unë për dy vite. Po ashtu kanë qenë njerëz politik, duke i eliminuar të gjithë profesionistët dhe si rezultat asnjë njohje dhe asnjë progres në anëtarësim në mekanizma ndërkombëtarë e institucione ndërkombëtare, siç janë UNESCO, INTERPOL”- tha Aabazi.

    Madje për punën e këtij komisioni, Abazi foli edhe më në detaje. “Kemi pasur raste të shkruara me dokumentacion në Komisionin e Punëve të Jashtme, që është i obliguar sipas ligjeve dhe Kushtetutës, që të bëjë intervistimin e kandidatëve të cilët nuk e kanë kaluar këtë procedurë dhe është tejkaluar vendimi i Komisionit për punë të jashtme për shkak të lidhjeve politike”- thotë ai.

    Në debat u diskutua edhe mungesa e kontratave me SHBA-në, që sipas Abazit, janë domosdoshmëri për ta mbajtur në fokus çështjen e Kosovës, qoftë për njohje të reja apo për anëtarësim të Kosovës në NATO.

    Tutje, Abazi përmendi edhe vizitën e fundit që kishte me kandidatin për kryeministër Ramush Haradinaj në SHBA për inaugurimin e presidentit amerikan, Donald Trump.

    “Kemi pas një vakum të plotë. Unë para disa ditësh u ktheva nga Shtetet e Bashkuara të Amerikës. Gjendja jonë atje është në alarm për shkak të vakumit të plotë, keqpërdorimit të marrëdhënieve që kemi pas me SHBA-në dhe mungesës së plotë të sinqeritetit me të cilën kryeministri  e ka udhëhequr politikën e jashtme bashkë me zonjën Gërvalla”- tha ai.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “DebatPërnime”, në nisje të debatit ku u diskutua për politikën e jashtme tha se “Donika Gërvalla si ministre e Punëve të Jashtme, Glauk Konjufca si Kryetar i Kuvendit, Vjosa si Kryetare, deri tani edhe komplet Qeveria Kurti2, me gjithë respektin ndaj tyre, janë udhëheqësia e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në linkun në vijim:

    https://kallxo.com/gjate/angazhim-te-emisareve-speciale-per-njohje-dhe-dergim-te-draftit-te-asociacionit-ne-kushtetuese-plani-i-koalicionit-aak-nisma-per-politiken-e-jashtme/

  • Tubimi i Vetëvendosjes në Skenderaj, reagon Hajrulla Çeku

    Lëvizja Vetëvendosje ka nisur sot, më 27.01.2025, në ora 18:00, një tubim zgjedhor në Skenderaj.

    Disa qytetarë janë mbledhur në qendër të Skenderajt dhe kanë protestuar kundër tubimit të LVV-së dhe pranisë së kryeministrit Albin Kurti.

    Ata kanë thirrur “Thaçi, Thaçi”, “PDK, PDK”, “Sami Lushtaku”, si dhe kanë hedhur mjete piroteknike drejt vendit ku po mbahej tubimi zgjedhor i LVV-së.

    Ndaj veprimeve të këtyre personave ka reaguar ministri i Kulturës, njëherazi kandidat i LVV-së për deputet, Hajrulla Çeku.

    Ai i ka quajtur ata “qyqanë të orkestruar nga partia”.

    “Disa qyqanë të orkestruar nga partia paskan tentu me e pengu tubimin e Vetëvendosjes në Skenderaj. Për çudi, komuna paralele e Serbisë atje nuk ju bënte fort përshtypje. Harroni që na ndalni. Po thyejmë bastione një nga një, cep më cep. Dje në Deçan, sot në Drenicë, e çdo ditë deri në 500 mijë zemrat e 9 shkurtit. Politika primitive nuk kalon.”- ka thënë ai.

    KALLXO.com ka kërkuar informacione nga zëdhënësi i LVV-së, Arlind Manxhuka, i cili ka thënë se tubimi po mbahet.

    “Po, po mbahet dhe nuk ka kush e ndalon LVV-në me mbajtë tubime. Askund, cep më cep të vendit”- u përgjigj ai.

    Lidhur me këtë çështje KALLXO.com ka kërkuar informacione nga Policia e Kosovës dhe është në pritje të përgjigjes.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.