Etiketë: Lufta

  • Disa rajone ruse raportojnë për sulme masive ukrainase

    Zyrtarët në disa rajone ruse kanë raportuar për sulme masive ukrainase me dronë gjatë natës që kanë pasur për shënjestër infrastrukturën e energjisë – përfshirë një Central bërthamor. Ndërkaq, Presidentët e Ukrainës dhe Rusisë kanë këmbyer akuza lidhur me mundësinë e negociatave të paqes.

    Zyrtarët qeveritarë në rajonet e Rusisë të Smolenskut, Nizhni Novgorodit, Tverit, Kurskut, Leningradit dhe Brianskut thanë se zonat e tyre janë goditur nga dronët e Ukrainës më 28-29 janar, ndërkaq aeroportet në Kazan dhe Shën Petersburg kanë ndaluar përkohësisht operimin për shkaqe sigurie.

    “Në disa zona në rajonin e Smolenskut, objektet civile ishin subjekt i një sulmi masiv” me dronë – shkroi në Telegram guvernatori, Vasily Anokhin.

    “Sistemet e mbrojtjes ajrore dhe ato të luftës elektronike të Ministrisë ruse të Mbrojtjes janë duke i shkatërruar dronët… Një nga dronët u rrëzua gjatë përpjekjes për të sulmuar një ndërtesë me energji bërthamore. Nuk ka viktima apo dëme.” – shtoi Anokhin.

    Informacione të tjera nuk u dhanë, por Centrali bërthamor në Smolensk është një ndërtesë e madhe për prodhimin e energjisë, që gjendet rreth 100 kilometra nga qyteti i Smolenskut.

    Ndërkaq, guvernatori i rajonit rus, Nizhni Novgorod, Gleb Nikitin tha se një dron ra në territorin e një kompleksi të karburanteve dhe energjisë në zonën industriale të Kstovskit, por nuk raportoi për viktima apo dëme të mëdha.

    “Shërbimet speciale po punojnë në vendngjarje dhe po përdoren të gjitha mjetet e nevojshme për të lokalizuar zjarrin në një nga Njësitë e rafinerisë së naftës.” – tha Nikitin.

    Guvernatorët rajonalë në rajonin Briansk, në kufi me Ukrainën dhe Tver, në afërsi të Moskës, po ashtu raportuan për sulme me dronë. Në këto dy rajone, zyrtarët nuk raportuan për viktima apo dëme.

    Autoritetet në Aeroportin e Kazanit – kryeqytetit të Republikës ruse të Tatarstanit – thanë se të gjitha fluturimet janë ndërprerë për shkaqe sigurie, ndonëse nuk njoftuan nëse Aeroporti ishte cak i ndonjë sulmi.

    Agjencia shtetërore e lajmeve TASS ka raportuar po ashtu se fluturimet në Aeroportin Pulkovo në Shën Petersburg janë ndërprerë për shkaqe sigurie, por nuk u dhanë më shumë detaje.

    Ministria ruse e Mbrojtjes tha se ka rrëzuar 104 dronë ukrainas në disa rajone gjatë natës. Ky pretendim i Rusisë nuk ka mundur të konfirmohet në mënyrë të pavarur.

    Të dyja palët e përfshira në luftë kanë intensifikuar përdorimin e dronëve muajve të fundit – fluturake që shpesh kanë pasur për cak infrastrukturën e energjisë së të dyja shteteve.

    Rusia ka shkaktuar dëme të mëdha në objektet civile ukrainase përmes sulmeve të kryera me dronë, raketa, artileri dhe lloje të ndryshme të bombave. Kremlini mohon se shënjestron zonat civile, pavarësisht provave se kryen sulme të tilla.

    Brenda Ukrainës, guvernatori rajonal Vitaliy Kim tha se dy gra janë vrarë gjatë një sulmi me raketa të kryer nga Rusia në qytetin e Mikolajivit.

    Përveç sulmeve në fushëbetejë, krerët e dy shteteve kanë këmbyer akuza. Presidenti ukrainas Volodymyr Zelensky tha se presidenti rus Vladimir Putin ka “frikë” që të hyjë në negociata për përfundimin e luftës, pasi udhëheqësi i Kremlinit refuzoi mundësinë e bisedimeve të drejtpërdrejta me homologun e tij ukrainas.

    “Sot Putini edhe një herë e konfirmoi se ai ka frikë nga negociatat, frikë nga udhëheqësit e fuqishëm dhe bën gjithçka që mundet për ta prolonguar luftën.” – shkroi Zelensky në X.

    “Çdo lëvizje që ai bën dhe të gjitha marifetet e tij cinike synojnë që kjo luftë të jetë e pafund.” – shtoi ai.

    Më herët Putin i tha televizionit shtetëror rus se bisedimet me Ukrainën janë të mundura, por jo me Zelenskyn, të cilin ai e cilësoi si “jolegjitim”, për shkak se mandati i tij presidencial i ka mbaruar, teksa shteti ende është në gjendje lufte.

    “Por në esencë, nëse ata duan të vazhdojnë përpara, ka rrugë ligjore për ta bërë këtë. Lejoni Kryetarin (e Parlamentit ukrainas) ta udhëheqë këtë gjë, në bazë të Kushtetutës.” – tha Putin.

    “Megjithatë, deri më tani ne thjesht nuk shohim se ka një dëshirë të tillë.” – shtoi ai.

    Ndërkaq, Axios ka raportuar se ushtria amerikane gjatë kësaj jave ka transferuar në Ukrainë rreth 90 Sisteme kundërajrore Patriot, që janë marrë nga depot në Izrael dhe në Poloni.

    Axios, duke cituar tri burime që kanë njohuri për këtë çështje, tha se Sistemet Patriot i ishin dhënë Izraelit mbi 30 vjet më parë gjatë Luftës së parë të Gjirit./REL

  • Mijëra palestinezë nisin të kthehen në veri të Gazës

    Dhjetëra-mijëra palestinezë janë nisur të hënën në rrugën kryesore që çon në veri të Gazës, pasi Hamasi është pajtuar që t’i dorëzojë tri pengje izraelite këtë javë dhe pasi forcat ushtarake izraelite kanë nisur të tërhiqen prej korridorit kryesor të enklavës.

    Hamasi – grup palestinez që udhëheq Gazën – është shpallur organizatë terroriste nga Shtetet e Bashkuara dhe Bashkimi Evropian.

    Një turmë e madhe njerëzish, disa duke mbajtur foshnje apo gjësende të domosdoshme nëpër duar, janë nisur në këmbë drejt veriut të Gazës.

    “Më duket sikur të kem lindur sërish dhe të jemi fitimtarë sërish.” – ka thënë një nënë palestineze për Agjencinë e lajmeve Reuters.

    Dëshmitarët kanë thënë se banorët e parë kanë mbërritur në qytetin e Gazës herët në mëngjes.

    Më vonë janë hapur edhe tri pikëkalime tjera, duke mundësuar edhe qarkullimin e makinave.

    “Zemra po më rrah fort. Kam menduar që nuk do të kthehem më kurrë.” – ka thënë Osama, 50 vjeç, shërbyes publik dhe baba i pesë fëmijëve, teksa ka arritur në qytetin e Gazës.

    “Pavarësisht se a do të ketë sukses armëpushimi, ne nuk do të largohemi më kurrë nga qyteti i Gazës dhe veriu, edhe nëse Izraeli sjell tanke për secilin prej nesh, nuk do të ketë më zhvendosje”.

    Duke pasur parasysh faktin se banorët e Gazës janë shpërngulur disa herë përgjatë 15 muajve të luftës, turma njerëzish janë larguar me gëzim prej tendave dhe kampeve kur kanë marrë vesh lajmin që pikëkalimet do të hapen.

    “Nuk kam fjetur, i kam bërë gati të gjitha gjërat për t’u nisur qysh në agim.” – ka thënë Ghada, nënë e pesë fëmijëve.

    “Të paktën jemi duke shkuar në shtëpi, tani mund të them se lufta ka përfunduar dhe shpresoj të jetë gjithçka qetë.” – ka thënë ajo për Reuters.

    Sipas Marrëveshjes për armëpushim, banorët e veriut të Gazës do të duhej të ktheheshin nëpër shtëpitë e tyre në fundjavë.

    Mirëpo Izraeli ka thënë se Hamasi e ka prishur Marrëveshjen, meqë nuk e ka liruar gruan e marrë peng, Arbel Yehud.

    Të dielën vonë ndërmjetësuesit e Katarit e kanë zgjidhur këtë mosmarrëveshje dhe Hamasi është pajtuar që ta lirojë Yehudin bashkë me ushtaren Agam Berger dhe një peng tjetër të enjten – dy ditë para lirimit të tri pengjeve të tjera.

    Izraeli më pas e ka dhënë dritën e gjelbër, që banorët e veriut të Gazës të mund të kthehen në vendbanimet e tyre prej të hënës.

    Rreth 650.000 njerëz janë zhvendosur nga veriu i Gazës përgjatë luftës, e cila është nxitur nga sulmet e Hamasit në jug të Izraelit, më 7 tetor 2023 – duke vrarë 1.200 njerëz dhe duke marrë peng mbi 240 të tjerë.

    Më shumë se 47.000 palestinezë janë vrarë në sulmet izraelite në Gazë – sipas autoriteteve shëndetësore palestineze.

    Një pjesë e mirë e Gazës është shkatërruar nga luftimet dhe autoritetet nën dirigjim të Hamasit. Kanë thënë se banorët e kthyer në veri të Gazës do të kenë nevojë për mijëra tenda dhe qendra strehimi – teksa tentojnë t’i rikthehen normalitetit.

    Sipas Marrëveshjes së armëpushimit, vetëm personat e paarmatosur do të mund të kthehen në zonën veriore. Makinat do të kontrollohen në hollësi, nëse kanë ndonjë armë apo lëndë shpërthyese./REL.

  • Putini i shqetësuar për ekonominë, derisa Trump i kërkon ujdi për Ukrainën

    Presidenti rus, Vladimir Putin është përherë e më i shqetësuar për telashet që ka shkaktuar lufta në ekonominë ruse, në kohën kur homologu amerikan, Donald Trump po i shtyn përpara përpjekjet për t’i dhënë fund konfliktit në Ukrainë – bëjnë të ditur për Agjencinë e lajmeve Reuters pesë burime të informuara me rrjedhat e situatës.

    Ekonomia e Rusisë, e bazuar goxha shumë në eksportet e naftës, gazit e mineraleve, kishte shënuar ngritje pavarësisht dy vjetëve nën sanksione të shumëfishta perëndimore, pas evazionit në Ukrainë më 2022.

    Por, aktiviteti i brendshëm ekonomik është tkurrur muajve të fundit, për shkak të shkurtimit të fuqisë punëtore dhe normave të larta të interesit për ta luftuar inflacionin, që ka shënuar ngritje të theksuar sherri i shpenzimeve ushtarake rekorde.

    Kjo ka kontribuar për krijimin e pikëpamjes në mesin e një hiseje të elitës ruse, se një marrëveshje e negociuar lufte do të ishte e dëshirueshme – bëjnë të ditur dy burime të informuara me qasjen që po dominon në Kremlin.

    Trump, i cili ka marrë të hënën, më 20.01.2025, timonin e Shtëpisë së Bardhë, është zotuar se do ta zgjidhë shpejt konfliktin në Ukrainë – më i madhi në Europë prej Luftës së Dytë Botërore. Gjatë javës, ai ka thënë se do të ketë më shumë sanksione dhe më shumë tarifa për Rusinë, nëse Putini nuk ulet në tavolinën e negociatave – duke shtuar se Rusia ka marrë udhë drejt “telasheve të mëdha” ekonomike. Një zyrtar i lartë i Kremlinit ka thënë të martën se Rusia deri tani nuk ka marrë ndonjë propozim specifik për bisedime.

    Reuters kishte raportuar më parë se Putini është i gatshëm të diskutojë opsionet për Marrëveshje armëpushimi me Trumpin, por që duhet të mbesin avancimet territoriale të Rusisë në Ukrainë dhe se Ukraina duhet të heqë dorë prej kërkesës për anëtarësim në NATO.

    Kremlini nuk e ka komentuar Raportin dhe Kërkesën e Reuters-it për gatishmërinë për bisedime, për shkak të ndikimit të luftës në ekonominë ruse.

    Përgatiti: Rexhep Maloku – Kallxo.com