Etiketë: qeveria e kosovës

  • Rritja e pensioneve për kategoritë e dala nga lufta, Murati: Këtë do ta kishim edhe pa Zgjedhje

    Qeveria e Kosovës miratoi Vendimin për rritjen për 20% të pensioneve për kategoritë e dala nga lufta e fundit, derisa ministri i Financave Hekuran Murati para mediave u shpreh se kjo bëhet për shkak të rritjes ekonomike dhe jo Zgjedhjeve, që do mbahen më 09.02.2025.

    “Vendimi për rritjen e pensioneve të këtyre kategorive është për shkak të rritjes ekonomike dhe buxhetit. Ka qëlluar që Zgjedhjet të mbahen në muajin shkurt, po të mbaheshin në ndonjë muaj tjetër, përsëri do të ishte ky cikël, për shkak se buxheti miratohet në muajin tetor të vitit të kaluar e ekzekutohet në janar të vitit pasues.” – deklaroi Murati pas mbledhjes së Qeverisë së Kosovës, të mbajtur më 10.01.2025.

    Ai, po ashtu, shtoi se rritje të tillë nuk ka pasur që nga viti 2014.

    “Për herë të parë po bëhet ndryshimi apo rritja tash, pas më shumë se 10 vjetëve. Keni dëgjuar premtime të ngjashme e po dëgjoni edhe sot. Në dy mandatet e kaluara nuk ka pasur asnjë veprim, sa i përket këtyre kategorive e që do të ketë edhe në vijim – krahas rritjes ekonomike.” – shtoi më tej Ministri.

    Murati ndau edhe disa detaje për rritjet që do bëhen në kategori të ndryshme.

    “Janë disa kategori: familja që ka një dëshmor, pensioni ka qenë 448 euro, derisa do të rritet në 537 euro; familja që ka dhënë dy dëshmorë, pensioni ka qenë 537 euro, derisa do të rritet në 806 euro; familja me 3 dëshmorë do të marrë 1,075 euro; familja me katër dëshmorë ka qenë 627 euro, do të bëhet 1,344 euro dhe më shumë se katër dëshmorë do të bëhet 1,613 euro. Te kategoria për invalidët e luftës ka qenë 448 euro, për invalidin me dëmtim trupor prej 80%, derisa do të bëhet në 537 euro. E kështu me radhë do të rriten 20%, në krahasim me vlerën që kanë qenë.” – bëri të ditur Ministri.

    Në mbledhjen e mbajtur më 10.01.2025, Qeveria e Kosovës aprovoi rritjen prej 20% të pensioneve për familjet e dëshmorëve dhe të zhdukurve të UÇK-së, për invalidët dhe familjet e invalidëve të UÇK-së, për familjet e viktimave civile dhe të zhdukurve civilë të luftës dhe shtesat për përkujdesje për invalidët e luftës (UÇK dhe civilë).

    Derisa, ata që fitojnë mbi 20% janë familje që kanë më shumë se një dëshmor apo të zhdukur dhe viktima.

    https://kallxo.com/lajm/nje-dite-para-fillimit-te-fushates-zgjedhore-qeveria-rrit-pensionet-per-kategorite-e-dala-nga-lufta/

  • Qeveria e Kosovës ndan 100 mijë euro për familjen e veprimtarit Enver Hadri

    Qeveria e Kosovës ka miratuar Vendimin për Ndarjen e 100 mijë eurove për familjen e veprimtarit Enver Hadri, i cili është vrarë në Belgjikë në vitin 1990.

    “Propozimi në vlerë prej 100 mijë euro është për familjarët e veprimtarit të vrarë Enver Hadri, i cili u vra në Belgjikë në vitin 1990. Jemi në kontakt me familjarët, por edhe me autoritetet belge. Dy të akuzuarit janë shtetas serbë, se kanë kryer vrasjen. I treti i akuzuar, i cili ishte pjesë e institucioneve serbe akuzohet se ka urdhëruar vrasjen e Enver Hadrit.” – deklaroi ministrja e Drejtësisë, Albulena Haxhiu në mbledhjen e Qeverisë së Kosovës, më 10.01.2025.

    Ministri Hekuran Murati deklaroi se Ministria e Financave e mbështet ndarjen e mjeteve për familjen e Enver Hadrit.

    “Në këtë rast, këto mjete merren nga shpenzimet e paparashikuara dhe më pas do të bëhet ekzekutimi.” – deklaroi Murati në mbledhjen e Qeverisë.

    Enver Hadri, kreu i Komitetit për Mbrojtjen e të Drejtave të Njeriut në Kosovë, u vra në makinën e tij ndërsa priste në semafor në Bruksel më 25.02.1990.

    Në vitin 2016, Gjykata e Krimeve të Rënda në Bruksel dënoi Bozhidar Spasiq, ish-kreu i Operacioneve Speciale të Policisë sekrete jugosllave UDBA dhe anëtarët e një bande kriminale serbe, Andrija Drashkoviq e Veselin Vukotiq me “burgim të përjetshëm” për vrasjen e Enver Hadrit.

    Spasiq organizoi vrasjen dhe Drashkoviq e Vukotiq e kryen atë – tha Gjykata në Vendimin, derisa të tre burrat u gjykuan dhe u dënuan në mungesë.

    Enver Hadri kishte ikur në Belgjikë në vitin 1972. Ai ishte aktiv në Rezistencën Kombëtare të Shqiptarëve të Kosovës dhe më vonë themeloi Komitetin për Mbrojtjen e të Drejtave të Njeriut në Kosovë, i cili mblodhi të dhëna mbi shtypjen e shqiptarëve etnikë nga forcat jugosllave të sigurimit.

    Ai u vra disa ditë para se të ishte programuar të paraqiste një Raport të detajuar të vdekjeve të dhjetëra shqiptarëve etnikë në duart e Policisë jugosllave në Këshillin e të Drejtave të Njeriut të Kombeve të Bashkuara në Nju Jork.

  • Një ditë para fillimit të fushatës zgjedhore, Qeveria rrit pensionet për kategoritë e dala nga lufta

    Qeveria e Republikës së Kosovës në mbledhjen e 243-të të saj aprovoi rritjen e përfitimit dhe pensioneve për dëshmorët, invalidët, veteranët, pjesëtarët e UÇK-së, viktimave civile dhe familjeve të tyre.

    “20% është rritja e përfitimit të pensioneve dhe përfitimit të këtyre kategorive të dala nga lufta.” – u shpreh kryeministri Kurti.

    Ministri i Financave Hekuran Murati, në detajet që dha në mbledhje, bëri të ditur se familjet me më shumë se një dëshmor: të zhdukur, viktima civile – rritja është më e madhe.

    “Do të rriten pensionet e familjarëve të dëshmorëve, ata me një dëshmor rritje prej 20%. Familjet që kanë dy apo më shumë dëshmorë, rritja do të jetë përtej 20%. Për pensione invalidore e ata me të zhdukur do të rriten prej 20%. Derisa, ata me më shumë se një të zhdukur përtej 20%.” – u shpreh Murati.

    “Ngjashëm edhe për invalidët e UÇK-së, si dhe shtesa për përkujdes dhe ndihmë. Pensionet për familjet e viktimave civile me një viktimë është rritja prej 20%; me më shumë se një, rritja shkon përtej 20%. E njëjta është edhe për familjet e të zhdukurve, rritje do ketë edhe për viktimat e dhunës seksuale, pra me 20%.” – shtoi më tej Ministri i Financave.

    Tutje, në mbledhjen e Qeverisë u shqyrtua Propozim-vendimi për Ndarjen e mjeteve financiare për familjen e veprimtarit të vrarë Enver Hadri.

    “Propozimi në vlerë prej 100 mijë euro është për familjarët e veprimtarit të vrarë Enver Hadri, i cili u vra në Belgjikë në vitin 1990. Jemi në kontakt me familjarët, por edhe me autoritetet belge. Dy të akuzuarit janë shtetas serb se kanë kryer vrasjen, i treti i akuzuar i cili ishte pjesë e institucioneve serbe akuzohet se ka urdhëruar vrasjen e Enver Hadrit.” – deklaroi ministrja e Drejtësisë, Albulena Haxhiu.

    Ministri Murati deklaroi se Ministria e Financave e mbështet ndarjen e mjeteve për familjen e Enver Hadrit.

    “Në këtë rast, këto mjete merren nga shpenzimet e paparashikuara dhe më pas do të bëhet ekzekutimi.” – deklaroi Murati.

    https://kallxo.com/lajm/rritja-e-pensioneve-para-zgjedhjeve-ceshtje-votash-e-jo-mireqenie/