Etiketë: zgjedhet 2025

  • Planet e PDK-së për tkurrjen e listës së pritjes së pacientëve dhe rregullimin e çmimit të barnave

    Lista e gjatë e pritjes për marrjen e shërbimeve mjekësore në Sistemin Publik Shëndetësor është një prej sfidave për qytetarët e Kosovës. Shkaku i pritjeve të gjata, shumë prej tyre detyrohen të zgjedhin një rrugë tjetër për trajtim.

    Kandidati për deputet nga Partia Demokratike e Kosovës (PDK), Pleurat Sejdiu, gjatë emisionit “Debat Përnime”, më 22.01.2025, përmendi faktorët që e bëjnë listën pritjes të gjatë.

    Me këtë rast, ai dha edhe propozimin për zgjidhjen e këtij problemi.

    Sipas tij, investimet në shërbime dhe risistematizimi i forcës së punës ndikojnë në zvogëlimin e kësaj liste.

    “E para, mungesa e stafit të mjaftueshëm të profesionalizuar; e dyta, mungesa e shërbimeve në nivel rajonal dhe konvertimi në Prishtinë; dhe, e treta aparaturat. Një pjesë e shërbimeve që duhet të kryhen në Spitale rajonale, por mungojnë furnizimet bazike të atij Spitali, e bën që të ngarkohen dhe niveli terciar. Kështu, shumica e intervenimeve janë në pritje. Atëherë, ndodh që i jepet prioritet një traume dhe shkaktohen këto pritje.” – tha Sejdiu.

    Ndërsa, Fatbardh Rexha foli edhe për Ligjin e Rregullimit të Çmimit të Barnave.

    “PDK e vlerëson se Kosovës i duhet një Ligj i tillë për Rregullimin e Çmimit të Barnave, megjithatë ai duhet të ketë një qasje më të kujdesshme – duke u siguruar që çmimi i barnave të jetë koherent në raport me çmimet e tregut në Kosovë.” – ka thënë Rexha.

    Ndër të tjera, ai tha se tregu i barnave farmaceutike duhet të ketë një qasje liberale dhe të rregullohet konform tregut të Kosovës, e jo të merren si referencë vendet e tjera.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Në hapje të Debatit të parë zgjedhor, në kuadër të “Debat Përnime”, Jeta Xharra ka deklaruar se askush në KALLXO.com nuk është pasanik, milioner, e le më oligark.

    “Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka theksuar ndër të tjera, Xharra.

    E, për kandidatët e LVV-së që kanë refuzuar të marrin pjesë në Debat, ajo e ka dhënë “diagnozën”: Politikus Arrogantis Totalis Mendjemadhijensis!

    Për më shumë, lexoni në linkun në vijim:

    https://kallxo.com/gjate/planet-e-pdk-se-digjitalizim-e-rritje-pagash-ne-shendetesi-dhe-memorial-te-gjenocidit-ne-prishtine/

  • PZAP gjobit PDK-në me 19 mijë euro

    Paneli Zgjedhor për Ankesa dhe Parashtresa (PZAP) ka dënuar Partinë Demokratike të Kosovës me 19 mijë euro gjoba.

    Lëvizja Vetëvendosje është ankuar në PZAP se PDK ka shkelur Kodin e Mirësjelljes për Subjektet Politike.

    Një Ankesë ka qenë për shkak të vendosjes së një posteri të kandidates për Deputete, Blerta Deliu-Kodra në rrugën ‘Osman Geci’ në Skenderaj. Një tjetër për posterin te rruga ‘Pazari i Vjetër’, po ashtu në Skenderaj. Ankesa e tretë ka qenë për posterin e Mërgim Lushtakut po ashtu te rruga ‘Pazari i Vjetër’ dhe e fundit për posterin e Lushtakut te rruga ‘Osman Geci’.

    Saktësisht është thënë se është shkelur Neni 34, Paragrafi 2 i Ligjit për Zgjedhjet e Përgjithshme.

    Partia Demokratike e Kosovës është përgjigjur në këto Ankesa – duke thënë se pretendimet janë pabazë.

    Sipas PDK-së, Blerta Deliu-Kodra dhe Mërgim Lushtaku, para fillimit të fushatës, kishte marrë pëlqimin dhe lejen e shfrytëzuesve të hapësirës publike.

    PDK thotë se Deliu- Kodra dhe Lushtaku kanë nënshkruar Kontratë me ‘Foto Kabashi’, për shfrytëzimin e hapësirave reklamuese.

    PZAP ka gjetur se Ankesa është e bazuar për shkak se është konstatuar vendosja e bilbordeve të dy kandidatëve për Deputetë dhe se ka vlerësuar Kontratat e bashkëngjitura nga PDK-ja.

    Kontratat nuk ishin nënshkruar nga Deliu-Kodra, por vetëm nga qiradhënësi ‘Foto Kabashi’ dhe ato nuk kanë vulë të protokolimit.

    Kontratat e Mërgim Lushtakut nuk kanë po ashtu vulë të protokolimit.

    Paneli Zgjedhor për Ankesa dhe Parashtresa (PZAP) për këto Kontrata thotë që mungesa e vulës së protokolimit nuk jep mundësi të vërtetimit, që ka të bëjë me subjektin që ushtron veprimtari të caktuar dhe rrjedhimisht edhe të drejtën për të dhënë në shfrytëzim hapësirat reklamuese.

    Njëri rast i Deliu-Kodrës i kushtoi PDK-së 4 mijë euro, tjetri 5 mijë e 500 euro. Ngjashëm, njëri rast i Lushtakut i kushtoi PDK-së me 4 mijë euro gjobë dhe tjetri 5 mijë e 500 euro.

    PDK ka afat prej 15 ditësh për të paguar gjobat.

    Vendimin e plotë me numër A48, A49, A50 dhe A51 të PZAP-së mund t’i qasni në këtë vegëz.