Etiketë: zgjedhjet 2025

  • Koalicioni për Familjen parasheh themelimin e Institutit të Tërmeteve dhe Inxhinierisë Sizmike

    Kandidati për deputet nga Koalicioni për Familjen, Arsim Gërxhaliu, në emisionin “Debat Përnime”, më 26.01.2025, ka folur për infrastrukturën dhe planifikimin hapësinor.

    Ai konsideron se deri më tani kjo fushë nuk është trajtuar me prioritet nga qeveritë e shkuara.

    “Së pari duhet të bëhet riorganizimi i Ministrisë të Planifikimit Hapësinor, Mjedisit dhe Infrastrukturës. E dyta, Ligji i Planifikimit Hapësinor duhet t’i nënshtrohet reformës rrënjësore. E treta, legjislacioni i ndërtimit si dhe pjesa e banimit që ka qenë shumë pak e trajtuar në vitet e kaluara, ta merr trajtimin adekuat”- tha Gërxhaliu.

    Si të udhës, ai e sheh ndarjen e Ministrisë se Infrastrukturës dhe Planifikimit Hapësinor.

    Ndërsa të nevojshëm, kjo listë e sheh edhe ndryshimin e Ligjit për Planifikimin Hapësinor.

    “Pjesa e planifikimit hapësinor duhet të reformohet sepse ligji aktual, i miratuar diku në vitin 2013, nuk ka mundur akoma me jep efekte në këtë fushë. Ai ligj nuk është kompatibil me rrethanat shoqërore dhe kontekstin lokal të vendit tonë. Duhet të hartohet ligj i ri për planifikimin hapësinor që është në përputhje me kapacitetet tona ekonomike, shoqërore, politike, mjedisore dhe me resurset humane të cilat i kemi brenda institucioneve”- tha Gërxhaliu.

    Me një planifikim të mirëfilltë ligjor, sipas tij, parashihet edhe vënia e rregullit në industrinë e ndërtimit.

    “Na jemi dëshmitar që Ministria e Planifikimit Hapësinor në të shumtën e rasteve ka qenë një kusur politik mes koalicioneve të ndryshme pa përfaqësim kompetent. Unë kursehem me kategorizu si industri kriminale. Unë them që është një kapacitet i madh brenda industrisë së ndërtimit, mirëpo ka tendenca të kriminalizohet nëse nuk kemi një infrastrukturë të mirë ligjore dhe që është kompatibile me kapacitetet tona”- tha ai.

    Ndërkaq, hapi i parë që do bëjë në këtë drejtim, Koalicioni për Familjen, nëse arrin të vij në pushtet, është “ngritja e sigurisë së ndërtimit”.

    “Do të jetë themelimi i Institutit të Tërmeteve dhe Inxhinierisë Sizmike. Ky Institut do ta ushtrojë komplet kontrollin dhe do ta centralizojë sigurinë e ndërtimit të gjitha kushtet e strukturës dhe sigurisë të objekteve do të kalojnë në këtë objekt”- thotë Gërxhaliu.

    Pjesë e këtij instituti parashihen të jenë rreth 70 inxhinierë.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. 

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com. 

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.

    Për më shumë lexoni në linkun në vijim:

    https://kallxo.com/gjate/futja-e-lendes-fetare-ne-shkolla-ndalimi-i-martesave-te-gjinise-se-njejte-dhe-krijimi-i-ministrise-per-banim-planet-e-koalicionit-per-familjen/

  • Hamza: Kosova mundet ma mirë për veteranët e UÇK-së

    Kandidati i PDK-së për kryeministër, Bedri Hamza më 26.01.2025 ka mbajtur tubim me veteranët e Ushtrisë Çlirimtare të Kosovës para të cilëve ka thënë se asnjë luftëtarë i lirisë kurrë s’do të jetë vet.

    Hamza tha se janë mbledhur për të shprehur mirënjohjen e falendërimin për ta, ndërsa përseriti zotimin për 50 për qind rritje të mbështetjes për kategoritë e luftës.

    “Ne angazhohemi për ju, për familjet tuaja dhe për të gjithë qytetarët tanë. Përkrahja për familjet e dëshmorëve, invalidëve dhe veteranëve të Ushtrisë Çlirimtarë të Kosovës do të rritet për 50 për qind në muajt e parë të mandatit të qeverisë të udhëhequr nga unë dhe Partia Demokratike e Kosovës”- tha Hamza.

    Ai tha se asgjë dhe askush nuk do ta largojë Kosovën nga rruga që ata e nisën.

    “Historia jonë nuk mund të rishkruhet. E përsërisë, nuk mund të rishkruhet nga askush, ju nuk luftuat vetëm për pragun e shtëpisë, por për drejtësi, barazi dhe dinjitet për të gjithë qytetarët e vendit. Ishte trimëria juaj, ishte sakrifica juaj dhe e popullit tonë, ajo që ka bëri aleat të perëndimit dhe që solli një fitore të përbashkët me të gjitha vlerat që përfaqësojmë”- u shpreh ai.

    Fushata pёr zgjedhjet parlamentare nё Kosovё ka filluar zyrtarisht, mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet e tjera në fuqi.

    Këto do të jenë zgjedhjet e para të rregullta, që Kosova mban që nga shpallja e pavarësisë më 2008.

  • Çfarë reformash në arsim premton Koalicioni për Familjen?

    Koalicioni për Familjen, në kuadër të sektorit të arsimit parasheh zbatimin e një sërë reformash nëse arrin të jetë pjesë e qeverisjes pas zgjedhjeve të 9 shkurtit.

    Kandidatja për deputete e këtij koalicioni, Xheneta Venhari, njëherësh edhe mësimdhënëse, tha se arsimin e konsiderojnë si shtyllë të zhvillimit gjithëpërfshirës të vendit. Më këtë rast, ajo përmendi edhe reformën për përmirësimin e arsimit përmes “promovimit të vlerave fetare”.

    “Do ta përmirësojmë cilësinë e arsimit përmes promovimit vlerave fetare dhe të traditës së sistemit arsimor e kulturor. Aktivitete të veçanta për këto i kemi, si: ndalimin me ligj të promovimeve të çdo propagande apo nxitjen në sistemin arsimor të ideve dhe qëndrimeve që lidhen me orientimin seksual dhe identitetin gjinor në ndryshim nga ai biologjik”- tha Venhari.

    Ndryshime pritet të ketë edhe në kurrikulat shkollore të arsimit fillor dhe të mesëm.

    Zotim tjetër që u dha nga kandidatja Venhari, ishte edhe mësimi tërditor.

    “Mësimi do të implementimet në tri faza: faza e parë për klasat 1-5, në dy vitet e para të qeverisjejes ne e kemi paraparë ta përgatisim objektet… Në vitin e tretë ta pilotojmë këtë projekt në vende të ndryshme të Kosovës; ndërsa në vitin e katërt qe ne do të qeverisim, e kemi që këtë plan-program ta implementojmë në 50% të vendit”- tha Venhari.

    Ndërkaq, për arsimin parafillor, Koalicioni për Familjen ka menduar buxhet edhe për fëmijët që regjistrohen në çerdhet private, si pamundësi për të qenë pjesë e atyre publike.

    Gjithashtu, Koalicioni për Familjen, sipas saj, do të ju ofroj mbështetje edhe nënave që zgjedhin t’i edukojnë fëmijët në shtëpi.

    “Për nënat që dëshirojnë që edukimin e fëmijëve ta zhvillojnë në shtëpi, sigurisht duke e ndaluar vetveten me punu për shkak të kujdesit ndaj fëmijëve, atëherë sigurisht që kemi paraparë të ndahen mjete buxhetore për punën dhe kujdesin që e bëjnë për fëmijët”- tha Venhari.

    Koalicioni për Familjen, zotohet se do të përdor praktikat më të mira evropiane për zbatimin e arsimit në edukimin arsimor dhe në përfshirje të drejtës së pakicave fetare.

    Ndërsa, për mënyrën se si do trajtohet në aspektin ligjor për ndalimin e disa temave të caktuara që kërkojnë edhe ndryshime kushtetuese e ligjore, foli kandidati Asdren Bytyqi.

    “Kushtetuta e parasheh bazën e mosdiskriminmit të askujt mbi bazat e orientimit seksual, gjinisë etj. Mirëpo kjo ka të bëj me të drejtat kushtetuese të jetës, lirisë, punës”- tha ai.

    Tutje, Bytyqi tha së – “jo në Ligj të Arsimit me u mësua fëmija aty që me i shpjegu pjesët e trupit, ose dashuria është edhe mes një burri e një burri, ose që homoseksualët të dashurohen, të lidhen e të martohen me njëri tjetrin. Pra me i lehtësu këta terma brenda librave”.

    Ritestimi i mësimdhënësve është çështja tjetër që nuk do të ndodhë nëse, Koalicioni për Familjen vie në pushtet, me arsyetimin se nuk është e nevojshme të bëhet kjo, pasi mësimdhënësit veçse kanë kaluar nivele të studimeve të larta.

    “Nuk mendoj që ka nevojë për testime të tilla, përderisa ne e kryejmë një arsim Master e Doktor Shkence pse duhet të jetë një testim i tillë i mësimdhënësve. Nuk kemi nevojë për këtë e as nuk bëhet. Kosova nuk është vend i eksperimenteve”- tha Venhari.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. 

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com. 

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.

    Për më shumë lexoni në linkun në vijim:

    https://kallxo.com/gjate/futja-e-lendes-fetare-ne-shkolla-ndalimi-i-martesave-te-gjinise-se-njejte-dhe-krijimi-i-ministrise-per-banim-planet-e-koalicionit-per-familjen/