Partia Demokratike e Kosovës (PDK), në programin e saj zgjedhor ka paraparë një varg reformash që zotohet se do t’i zhvillojë në fushën e sigurisë dhe mbrojtjes, nëse e merr besimin e qytetarëve të Kosovës për të udhëhequr me vendin pas zgjedhjeve të 9 shkurtit.
Ndër reformat e para që planifikon t’i bëjë kjo parti, sipas kandidates për deputete, Besa Kabashi-Ramaj, është digjitalizimi i sektorit të sigurisë.
“[Do ta bëjmë] Digjitalizimin e sektorit të sigurisë dhe integrimin e platformave të ndryshme që i përdorin institucionet e ndryshme brenda sektorit të Policisë. Nuk e shohim sektorin e sigurisë vetëm në aspektin e institucioneve tradicionale të sigurisë, që janë: Policia, Agjencia për Inteligjencë, Forca e Sigurisë dhe Zjarrfikësit, por këtu hynë edhe Ministria e Arsimit, shëndetësia, infrastruktura, e kështu me radhë”- ka thënë Kabashi-Ramaj.
E pyetur nga kryeredaktori i KALLXO.com, Kreshnik Gashi, se si do ta bëjnë digjitalizimin e këtij sektori përderisa katër komunat veriore nuk kontrollohen nga FSK, Kabashi- Ramaj tha se ky projekt nuk mund të bëhet për katër vjet.
“[Duhet] Me i shiku krejt databazat aktuale që i kemi dhe me ia fillu me pilotu integrimin e databazave të institucioneve ekzistuese. Me i testu se si mund t’i mbledhim ato informata dhe si mund t’i shfrytëzojmë për parandalimin e kërcënimeve. Mandej, në momentin që funksionalizohen për këto, të mendojmë si t’ia bëjmë aty ku nuk kemi qasje”- tha ajo.
Ndërkaq, sipas Partisë Demokratike, çështja e dytë në vazhdën e transformimit të FSK-së, është plani 10 vjeçar që duhet të finalizohet përfundimisht.
Gjithashtu, sipas kandidates Kabashi-Ramaj, FSK-ja ligjërisht mund të operoj në gjithë territorin e Kosovës, mirëpo në pjesën veriore është një situatë e ndjeshme dhe në të tilla raste duhet koordinim me aleatët.
“[Duhet] Koordinimi me aleatët tonë, me NATO-n dhe SHBA-n në pjesë të ndjeshme të Kosovës për ta ruajtur stabilitetin… Nuk do të thotë që nuk jemi sovran, nuk do të thotë që ne nuk kemi të drejtë ta përdorim ushtrinë atje, por se ne koordinohemi me aleatët”- deklaroi Kabashi-Ramaj.
Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.
Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.
Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.
Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.
Për më shumë lexoni në linkun në vijim:
https://kallxo.com/gjate/garde-kombetare-dhe-njesit-te-helikoptereve-per-emergjenca-civile-zotimet-e-pdk-se-per-sigurine-dhe-mbrojtjen/