Etiketë: zgjedhjet 2025

  • Plani i Koalicionit për Familjen: Digjitalizim e Vetting në drejtësi dhe fabrika brenda burgjeve

    Kandidati për deputet nga Koalicioni për Familjen, Asdren Bytyqi, në emisionin “Debat Përnime” ka prezantuar programin zgjedhor për fushën e drejtësisë.

    Në kuadër të këtij programi, ky koalicion parasheh një serë reformash për sistemin e drejtësisë në Kosovë, përfshirë digjitalizimin, fuqizimin e institucioneve ndërmjetësuese, Vetting-un në sistemin gjyqësor e prokurorial si dhe reformën në Shërbimin Korrektues.

    Ndër reformat e para që parashihen të bëhen në sistemin e drejtësisë, sipas Bytyqit, është Vetting-u për krerët e lartë të sistemit gjyqësor dhe prokurorial.

    “Do të vazhdojmë Vetting-un në sistemin gjyqësor dhe prokurorial për krerët e lartë të këtyre institucioneve, sipas rekomandimeve të Komisionit të Venecia”- tha ai.

    Më pas parashihet edhe krijimi i një sistemi digjital që do të lidhë institucionet e drejtësisë me qëllim të efikasitetit më të madh në punë dhe lehtësimit të një varg procedurash.

    Kostoja e këtij sistemi, pritet të jetë rreth 1 milion euro.

    “Ne zotohemi se do të ndërtojmë një sistem digjital të komunikimit mes të gjitha institucioneve të drejtësisë, përfshirë edhe qytetarët e thjeshtë, i cili sistem i komunikimit do të mundësojë që të gjitha lëndët, të gjitha shkresat, të gjitha komunikimet e të gjitha taksat të paguhen online. Ky sistem ka koston 1 milion euro dhe është i gatshëm”- tha Bytyqi.

    Zgjidhje u premtua se do ofrohet edhe për “mungesën juridike në mbrojtjen e trashëgimtarëve ligjor nga shmangia e trashëgimisë nga vëllezërit ose nga motra”.

    Ndërsa me reformat e institucionit të ndërmjetësimit, sipas tij, parashihet që gjykatat të mos ngarkohen më shumë lëndë, mirëpo ato të kenë një institucion që do t’i ndihmonte në zgjidhjen e problemeve pa kaluar në nivele gjykuese.

    “Do ta shtojmë numrin e psikologëve me pagesë nga ana e buxhetit të shtetit të cilët do të ndërmjetësojnë raste kur kanë konflikte bashkëshorte, në mënyrë që mos të mbushen burgjet vetëm me njerëz që kanë dhunë në familje, por në rast se ka nevojë me u ripajtu ose me u rikthye, ta vendosem ndërmjetësimin”- tha Bytyqi.

    Ndërkaq për përshpejtimin e shqyrtimi të lëndëve, sipas tij, parashihet shtimi i buxhetit dhe shtimi i numrit të prokurorëve dhe gjyqtarëve.

    Si reformë në shërbimin korrektues, ai ka paraqitur planin për ndërtim të fabrikave dhe punëtorive brenda burgjeve me qëllim të angazhimit të burgosurve, për t’ju mundësuar atyre edhe marrjen e pagës.

    Stimulimi për leximin e një libri për një muaj nga të burgosurit, nga Koalicioni për Familjen, konsiderohet si metodë që e ulë analfabetizmin. Kjo metodë, sipas Bytyqit, më pasë ju ofron benifite shtesë të burgosurve.

    “Parashohim një herë në muaj me i stimulu të burgosurit me lexu nga një libër, dhe me punëtorë socialë me diskutu edhe me marrë benefite të qëndrimit në ‘skype‘ nga dy orë ekstra në javë dhe një herë në 3 muaj 48 orë vikend…”- tha Bytyqi.

    Ndërsa, për gardianët, ai premtoi përmirësim të kushteve duke e shtuar buxhetin, uniforma të reja, reforma administrative dhe infrastrukturë shtesë.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. 

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com. 

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.

    Për më shumë lexoni në linkun në vijim:

    https://kallxo.com/gjate/futja-e-lendes-fetare-ne-shkolla-ndalimi-i-martesave-te-gjinise-se-njejte-dhe-krijimi-i-ministrise-per-banim-planet-e-koalicionit-per-familjen/

     

  • Akuzat ndaj Prokurorisë, posterët e videot në Kuvend – PZAP gjobit disa subjekte politike

    Të dielën e 26.01.2025, Paneli Zgjedhor për Ankesa dhe Parashtresa ka publikuar disa vendime për ankesat e dorëzuara aty nga disa parti politike.

    Gjoba për partitë politike janë dhënë për posterë e video të tyre në institucione publike.

    Lëvizja Vetëvendosje është gjobitur me 6 mijë euro nga Paneli Zgjedhor për Ankesa dhe Parashtresa pas ankesave së Partisë Demokratike të Kosovës.

    PDK u ankua për një video të kandidatit për deputet Haxhi Avdyli brenda Klinikës së Neurokirurgjisë. Po ashtu u ankua për një video të Albena Reshitajt në hapësirat e Kuvendit të Kosovës dhe për një foto të Agon Batushës po ashtu në Kuvend. Një ankesë tjetër u drejtua për Besim Muzaqi për një video të tij në Kuvendin e Kosovës.

    PZAP ka gjetur se u shkel neni 34, paragrafi 1 i Ligjit për Zgjedhjet e Përgjithshme.

    1 mijë e 500 euro është gjoba ndaj Koalicionit për Familjen pas ankesës së LVV-së e cila u ankua për posterin e kandidates Dorentina Kokollari në Suharekë.

    PZAP ka gjetur se kandidatja Kokollari ka shfrytëzuar jashtëligjshëm shtyllën elektrike në rrugën ‘Xhavit Bajraktari’.

    3 mijë e 500 euro është gjoba për koalicionin AAK-NISMA-Intelektualët-Konservatorët.

    LVV u ankua për posterët e Albana Bytyqit dhe Driton Maliqit. PZAP gjeti se posterët e tyre ishin vendosur pa leje nga Komuna e Suharekës.

    LVV-së iu refuzua ankesa për posterët e Doruntina Malokut në Prishtinë, kjo për shkak se PZAP gjeti se Maloku kishte pëlqim nga Parking Center Publike.

    5 mijë euro është gjoba për LVV-në pas ankesës së PDK-së se kandidatja për deputete Albena Reshitaj ka shpërndarë një fotografi në një nga tubimet e VV-së, në fotografi gjendej një parullë që mes tjerash shkruante ‘Prokuroria e Kosovës e kapur nga hajnat, Qeveria Kurti i qoi në Gjyakta 250 lëndë’.

    PZAP ia hodhi poshtë ankesën e LDK-së ndaj LVV-së, saktësisht kandidatit për deputet Hajrulla Çeku. LDK u ankua se Çeku ka përdor gjuhë nxitëse e provokuese kur në një postim në facebook ku mes tjerash shkruante ‘Lodhja demokratike nuk kalon’.

    Në vendim thuhet se pretendimet janë të pabazuara dhe nuk mund të thuhet se kandidati Çeku ka shkelur nënin 34, pika 1.11 të Ligjit për Zgjedhjet e Përgjithshme.

    3 mijë e 700 euro iu dha gjobë koalicionit AAK-NISMA-Intelektualët-Konservatorët.

    Kjo për shkak se LVV u ankua për posterë të Nuredin Lushtakut në Skenderaj. PZAP gjeti se posterët janë vendosur në hapësira publike, ndërtesa publike, në kundërshtim me nenin 34, paragrafi 1, nënparagrafi 1.2 i Ligjit për Zgjedhjet e Përgjithshme.

    PZAP ia refuzoi një ankesë LVV-së për posterë të kandidatit të PDK-së Xhevahir Geci. Sipas PZAP-së ankesa se posterët janë të vendosur në hapësira publikë, ndërtesë të banimit kolektiv, për PZAP-në është e pabazuar.

    3 mijë e 500 euro gjobë është dhënë për LDK-në për shkak të posterëve të kandidates Arjeta Salihu Abazi në sheshin e Podujevës. Pas ankesës së LVV-së, PZAP gjeti se posterët ishin vendosur në ndërtesë kolektive dhe ka gjobitur LDK-në.

    Një ankesë e Partisë Liberale Egjiptiane ndaj Iniciativës së Re Demokratike është hedhur poshtë si e palejuar.

    PLE ishte ankuar se Elbert Krasniqi, kryetar i IRDK-së kishte shpërndarë një sport politik me fëmijë nën 16 vjeç.

    PZAP thotë se IRDK veçse është dënuar me 1 mijë e 500 në një vendim të më hershëm për këtë çështje.

  • Koalicioni për Familjen premton Vetting në Polici dhe rritje të buxhetit për FSK-në

    Kandidatët për deputetë nga Koalicioni për Familjen, në emisionin “Debat Përnime”, me 26.01.2025, kanë shpalosur programin e tyre për siguri, drejtësi, arsim, ekonomi e shëndetësi.

    Bejtush Gashi, gjatë prezantimit të programit për fushën e sigurisë tha se me ardhjen e tyre në pushtet, në fokus do të kenë kthimin e dinjitetit të zyrtarëve të uniformës që garantojnë sigurinë e Kosovës.

    Nga Koalicioni për Familjen, premtohen reforma në Policinë e Kosovës, në aspektin e kuadrove dhe digjitalizimin e dhënies së shërbimeve nga ky institucion i rëndësishëm.

    “Fokusi jonë sidomos te rendi dhe siguria do të përqendrohet tek reforma e Policisë së Kosovës, e cila ka nevojë në aspektin e kuadrove që të reformohet, ndërsa të digjitalizohet në aspektin e shërbimeve, të ulë fatkeqësitë në komunikacion, të rrit komunikimin me qytetarët dhe të ngrit shkallën e besueshmërisë”- tha Gashi.

    Ndërsa në fazën e parë, sipas tij, vëmendje do t’i kushtohet sigurimit shëndetësor dhe ngritjës së mirëqenies për policët.

    “Fokusi do jetë në fazën e parë për me i zgjidh disa probleme që ky institucion përballet; sigurimi shëndetësor, ngritja e mirëqenies së zyrtarëve të uniformës, pa përjashtim dhe familjes së tyre të cilët jetojnë dhe varën prej kësaj page”- tha Gashi.

    Koalicioni për Familjen përmes fuqizimit të Akademisë së Kosovës për Siguri Publike do të ofrojë shërbime për trajnime të përhershme për zyrtarët policorë me qëllim të adaptimit të nevojave të këtij sektori, si dhe ofrim të arsimimit të avancuar për policët.

    Reforma e parë që do të bëhet në Policinë e Kosovës, sipas tij, do të jetë Vetting-u.

    “Reforma në Policin e Kosovës do filloj prej Vetting-ut, përkatësisht hetimit të së kaluarës për të gjithë pa përjashtim. Sipas ligjit dihet cilat pozita duhet t’i nënshtrohen këtij procesi. Dhe, në të njëjtën kohë, sigurimi jetësorë. Ligji është në proces andaj edhe këtë çështje do ta adresojmë dhe do angazhohemi që ky ligj do të kalojë”- tha ai.

    Tutje, kandidati Gashi, premtoi se me ardhjen e tyre në pushtet nuk do të ketë ndërhyrje operacionale në institucionin e Policisë së Kosovës, siç pretendon ai se është bërë nga Qeveria aktuale, pasi që ministria e ka për detyrë hartimin e politikave dhe strategjive sipas tij.

    Pa u diskutuat nuk mbeti as çështja e policëve serbë që dhanë dorëheqje në vitin 2022, duke i dorëzuar uniformat e Policisë së Kosovës.

    “Ka procedura të kthimit. Ata që i kanë shkel të gjitha procedurat do t’i nënshtrohen hetimit të kaluarës së tyre dhe gjithë ata që nuk kanë qenë të involvuar në aktivitete kriminale që janë zhvillu në ato komuna do t’i nënshtrohen procedurave që parashihen me akte ligjore dhe në të njëjtën kohë do t’u jepet mundësia që të rikthehen në uniformën e Policisë së Kosovës”- tha ai.

    Ndërsa, për Forcën e Sigurisë së Kosovës(FSK), ky koalicion premton rritje të buxhetit si dhe krijim të parakushteve për raporte më të mira me misionin ndërkombëtarë.

    “Në Forcën e Sigurisë së Kosovës do të vazhdojmë me intensitet për të rritur buxhetin për këtë institucion dhe në të njëjtën kohë do të përmbushet procedura e obligimeve, përkatësisht planit gjithëpërfshirës në fushën e mbrojtjes. Në të njëjtën kohë të dinamizohet dhe të krijohet një parakusht për raportet më të mira me pranin e misionit ndërkombëtar në Kosovë”- është shprehur Gashi.

    Pjesë e rëndësishme e sektorit të sigurisë, pa dyshim janë edhe zjarrfikësit. Koalicioni për Familjen zotohet se do përmirësoj kushtet e kësaj kategori, jo vetëm në aspektin e rritjes së pagave, por edhe në rekrutimin e zyrtarëve të rijnë.

    “Do të angazhohemi që të krijohen kushtet dhe në të njëjtën kohë të rritet numri i atyre që punojnë në këtë shërbim. Jo vetëm pagat dhe nevojat elementare që këto struktura kanë, por edhe të pranohen zyrtarë të rijnë në shërbimin zjarrfikës …”- tha ai.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. 

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com. 

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.

    Për më shumë lexoni në linkun në vijim:

    https://kallxo.com/gjate/futja-e-lendes-fetare-ne-shkolla-ndalimi-i-martesave-te-gjinise-se-njejte-dhe-krijimi-i-ministrise-per-banim-planet-e-koalicionit-per-familjen/