Etiketë: LDK

  • Abdixhiku e vazhdon fushatën në Kaçanik e Han të Elezit, premton mirëqenie për qytetarët

    Kandidati për kryeministër i Lidhjes Demokratike të Kosovës, Lumir Abdixhiku më 12.01.2025 e ka vazhduar fushatën për Zgjedhjet e 9 shkurtit në Kaçanik dhe Han i Elezit.

    LDK-ja ka organizuar tubime elektorale me qytetarët e këtyre dy qyteteve.

    Abdixhiku ka falënderuar qytetarët e Kaçanikut, duke thënë se LDK dhe populli janë bërë një.

    “Ringritja ndodhi dhe këtu. Pas një kohe të gjatë, mblidhemi kaq shumë. E paparë! LDK dhe populli janë bërë tashmë një! Në këtë qytet fisnik, me familje punëtore e qytetarë plot vullnet, gjetëm shpresën për Republikën, siç e kishim projektuar me ta gjithherë.” – ka shkruar Abdixhiku në Facebook.

    Ndërsa, ka thënë plot ngrohtësi u priten edhe në qytetin e vogël të Hanit të Elezit.

    “Sërish, pas një kohe të gjatë, u pritëm me plot shpresë e vullnet. Hani i Elezit do të përfitojë nga gazifikimi i Kosovës – një projekt kyç ky i ‘Rrugës së Re’. Ky investim, i sjell banorëve të kësaj Komune punë, mirëqenie e plot mundësi. LDK ka rigjetur bazën e vet në këtë qytet të vogël jugor. Dhe them sot me bindje të plotë, se ndryshimi i madh po vjen tashmë.” – ka thënë ai.

    Fushata pёr Zgjedhjet parlamentare nё Kosovё ka filluar zyrtarisht sot, mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën e 9 shkurtit 2025.

    Për këto Zgjedhje janë certifikuar 28 subjekte politike, me 1280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime ose ndonjë aktivitet tjetër të ngjashëm, përmes të cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore dhe të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë Zgjedhjet e para të rregullta që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

  • Fuqizimi i grave, Jaha: LDK-ja veçse e ka bërë hapin e parë

    Fatlume Jaha, kandidate për deputete nga LDK-ja, ka folur për fuqizimin e gruas gjatë emisionit “DebatPërnime”, më 12.01.2025.

    Ajo tha se nuk ka formë më të mirë për t’i fuqizuar gratë se sa t’i fuqizosh ato në aspektin ekonomik.

    E, sipas saj, LDK-ja veçse ka filluar ta bëjë këtë gjë.

    “Konsideroj se LDK veçse e ka bërë hapin e parë për ta bërë këtë [fuqizimin e gruas] përmes shkollës tërëditore, sepse e ka bërë një lehtësi shumë të madhe për nënat.” – tha ajo.

    Ndërsa, kandidatja tjetër për deputete, Sibel Halimi, e cila njëherësh është drejtoreshë e Kulturës në Komunën e Prishtinës, duke folur në nivel të konstatimeve tha se deri më tani nuk kanë parë asgjë konkrete nga partia në pushtet për ta parandaluar vrasjen e grave.

    Halimi tha që është ithtare e përfshirjes së një lënde specifike në sistemin parauniversitar, e cila do të bënte me njohuritë mbi gjininë. Po ashtu, ajo premtoi që gratë do t’i përfshijnë në tregun e punës, do t’u ofrojnë politika miqësore, do të përfshijnë Ligjin e Prindërimit dhe ta zhdukin hendekun mes sferës publike dhe private për jetën e grave në Kosovë.

    “Në këtë Sistem të Drejtësisë që është jashtëzakonisht i brishtë, me një diskurs publik i cili denigron të gjitha hallkat e funksionimit të Sistemit të Drejtësisë, natyrisht që gratë ndihen të pambrojtura dhe janë në një pozitë, ku më nuk u besojnë as institucioneve të sigurisë.” – tha Halimi.

    Se a do t’i largojnë nga puna policët e Kosovës që i kanë rrahur bashkëshortet, Halimi tha se “jo vetëm nëse ndodhë akti i dhunës, por edhe në qoftë se përdoret gjuhë denigruese apo atakim emocional do të merren masa”.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

    Për më shumë, lexoni në linkun në vijim:

    https://kallxo.com/gjate/ldk-premton-ne-debat-pernime-reforma-ne-drejtesi-dhe-investime-kapitale-miliardeshe/

  • Sibel Halimi (LDK): Do të ndërtojmë Teatrin Kombëtar

    Kandidatja për deputete nga radhët e LDK-së, Sibel Halimi ka folur në “DebatPërnime” për projektet që i kanë paraparë për fushën e kulturës me Programin e tyre zgjedhor.

    Ajo tha se LDK planifikon të bëjë investime kapitale, që brenda një mandati 4 vjeçar “t’i rehatojë” institucionet e Kulturës.

    Në kuadër të këtij Programi, sipas saj, përfshihet edhe ndërtimi Teatrit Kombëtar.

    Derisa foli për këtë plan, Halimi përmendi grevën e aktorëve të Teatrit Kombëtar, duke thënë se ata po trajtohen jodinjitetshëm.

    “Derisa ne po qëndrojmë këtu, aktorët e Teatrit Kombëtar po qëndrojnë në grevë, pikërisht për shkak të mostrajtimit të dinjitetshëm nga  Ministria e Kulturës.” – është shprehur ajo,

    “DebatPërnime” është format i cili do të transmetohet për një muaj rresht, deri një ditë para Zgjedhjeve parlamentare të 09 shkurtit 2025.

    Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

    https://kallxo.com/gjate/ldk-premton-ne-debat-pernime-reforma-ne-drejtesi-dhe-investime-kapitale-miliardeshe/