Etiketë: koalicioni per familjen

  • Koalicioni për Familjen e konsideron të pabazuar Vendimin e PZAP-së që i gjobiti me 4500 euro për gjuhën kundër komunitetit LGBTI+

    Paneli Zgjedhor për Ankesa dhe Prapashtesa (PZAP) ka dënuar me 4,500 euro Koalicionin për Familjen pas Ankesës së organizatave CEL Kosova dhe Dylberizëm, me pretendimin se anëtarët e koalicionit kanë përdorur gjuhe fyese e diskriminuese ndaj komunitetit LGBT+, promovimin e përçarjes, frikë ndaj qytetarëve dhe nxitje të urrejtjes.

    Ketë Vendim, Koalicioni për Familjen përmes një Konference për media e ka quajtur veprim pa bazë ligjore.

    “Ai (Eman Rrahmani) e konsideroi Vendimin e PZAP-it për të dënuar një veprim pa bazë ligjore, si një shkelje të drejtpërdrejtë të të drejtave politike të qytetarëve dhe një kërcënim për angazhimin e koalicionit në mbrojtje të vlerave të familjes.”- thuhet në njoftim.

    “Ky veprim është i paargumentuar dhe i pabazuar.”- tha Rrahmani, duke shtuar se koalicioni po përballet me një situatë që cenon angazhimin dhe kauzën e tij për mbrojtjen e familjes.

    Në Vendimin e PZAP thuhet se deklaratat e kontestuara në Ankesë janë: Deklarata e kandidatit Fatmir Smajli, i cili promovimin e të drejtave të komunitetit LGBTI+ e përshkruan si “marrëzi” dhe “kundër natyrës njerëzore”.

    Deklarata e kandidatit Eman Rahmani, i cili promovimin e dashurisë mes personave LGBTI+ e paraqet si “turp”- duke përdorur shembullin e Festivalit Anibar për të përhapur dezinformata dhe për të nxitur frikë ndaj komunitetit LGBTI+ dhe se angazhimi për të drejtat e këtij komuniteti është një kërcënim për traditat dhe kundër figurave historike të kombit shqiptar.

    Deklarata e kandidatit Visar Korenica, i cili pretendon se të drejtat e komunitetit LGBTI+ janë “kundër natyrës njerëzore” dhe “nuk janë në interesin e përgjithshëm të shoqërisë”.

    Ndërsa, në Konferencën e mbajtur më 23.01.2025, Rrahmani ka theksuar, po ashtu, se spoti televiziv i tyre është në përputhje me vlerat e shoqërisë, nuk përmban asnjë gjuhë urrejtjeje dhe nuk mund të ndalohet.

    “Ne nuk mund të ndalojmë asnjëherë gjuhën tonë, ku flasim për vlerat e familjes.”- tha Rrahmani.

    Paneli Zgjedhor për Ankesa dhe Parashtresa (PZAP) u ka shqiptuar gjoba në vlerë 125 mijë euro subjekteve politike për shkelje të rregullave zgjedhore që nga fillimi i fushatës zgjedhore, e cila ka nisur më 11.01.2025 e deri më 22.01.2025.

    Fushata pёr Zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.

    Për këto Zgjedhje janë certifikuar 28 subjekte politike, me 1,280 kandidatë.

  • Përmes performancës artistike drejt Kuvendit të Kosovës

    Aktori Sokol Plakolli është kandidat për deputet të Kuvendit të Kosovës i Koalicionit për Familjen.

    I veshur me rroba tradicionale, Plakolli e ka gjetur një vend në sheshin “Skënderbeu” në Prishtinë, në të cilin thotë se çdo ditë, për një orë, deri në fund të fushatës zgjedhore, do të ulet e të bisedojë me qytetarët në sofrën e vendosur aty.

    Duke i qerasur me nga një kafe, në odën e tij të improvizuar, ai shpalos para kalimtarëve arsyet dhe synimet e tij për deputet të Kuvendit të Kosovës në zgjedhjet e 09.02.2025.

    Plakolli ka thënë në një prononcim për KALLXO.com se e ka nisur kampanjën “Shqiptari në parlament” që të marrë opinionet e qytetarëve rreth platformës së tij për deputet. Ai thotë se do të jetë zëri i qytetarëve, pasi sipas tij, ai do të veprojë si një deputet i pavarur.

    “Dua që t’i pyes qytetarët se a kanë qejf me pa një kësi shqiptari në Parlament, herë është bari, herë Adem Jashari, e herë intelektual. Unë kam vetëm një premtim për qytetarët, telefoni im do të jetë i hapur 24 orë për shqetësimet e qytetarëve. Secili qytetar që ka një shqetësim dhe dëshiron ta ngritë në Kuvend përmes meje”- tha ai për KALLXO.com.

    Mënyra e Plakollit për të bërë fushatë përmes performancës artistike është pëlqyer nga qytetarët.

    Blerim Saramati tha për KALLXO.com se po i pëlqen mënyra e Plakollit për të bërë fushatë zgjedhore. “Mënyra kaq origjinale e odës shqiptare është një ide kaq kreative e Sokolit e cila besoj se duhet të mbështetet nga të gjithë”- ka thënë Saramati për KALLXo.com.

    Ndërkaq, Milazim Krasniqi thotë se Plakolli është një kandidat serioz me edukatë dhe nëse zgjidhet deputet ai e mban atë që thotë.  “Është edhe regjisor i mirë dhe shteti nuk i ka dhënë asnjëherë mundësi me punu dhe jam i lumtur që Sokolin me pa në Parlament (deputet) me këto rroba, sepse njerëzit që frikohen apo e ndjejnë veten të ofenduar prej origjinës apo autoktonisë së vet ata janë të zhveshur nga jeta njerëzore”- tha Krasniqi.

    Plakolli është pjesë e listës zgjedhore të Koalicionit për Familjen.

    Zgjedhjet për Kuvendin e Kosovës do të mbahen më 09.02.2025.

    Foto: KALLXO.com.
    Foto: KALLXO.com.

     

     

  • Eman Rrahmani në Mitrovicë premton nga 500 euro në muaj për gratë lehona

    Koalicioni për Familjen më 15.01.2025 ka mbajtur tubim elektoral në qytetin e Mitrovicës duke vazhduar fushatën për zgjedhjet e 09.02.2025.

    I pari këtij Koalicioni, Eman Rrahmani, ka thënë se garantojnë që do të realizojnë projektin për mbështetjen e nënave.

    Ai ka premtuar se për secilën grua që lind fëmijë do të ketë mbështetje financiare prej 500 eurove çdo muaj për dy vite.

    “E keni pa se çka është provu të bëhet në vendin tonë. Ju në Mitrovicë keni edhe probleme për shkak të aktiviteteve të strukturave paralele në veri. E di që e keni edhe më të domosdoshme dhe më të nevojshme që të angazhohemi që kjo kauzë të shkojë përpara sepse nuk mundemi që në 2025 nataliteti të jetë më i lartë në vendet fqinje se në Mitrovicë”- ka thënë ai.

    Ai ka shtuar se ky Koalicion nuk lejon martesat mes personave të gjinisë së njëjtë.

    Ndërsa, kandidati për deputet i këtij Koalicioni, Selim Pacolli, ka thënë se këto subjekte politike janë bërë bashkë me qëllimin për të mbrojtur familjen e traditave.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.