Etiketë: Komuna e Prishtinës

  • Unifikimi i Trafikut Urban nga komuna e Prishtinës, protestojnë kompani të Podujevës

    Pjesëtarë të shoqatës së autobusëve ‘Llapi’ të linjës Podujevë-Prishtinë po protesojnë në shenjë pakënaqësie ndaj vendimit të komunës së Prishtinës për sistem të unifikuar të trafikut urban, përfshirë operatorët privat që lidhin fshatra të komunës.

    Sipas tyre, ky vendim i komunës i dëmton ekonomikisht.

    Si shenjë proteste, pronarët e autobusëve të linjës Podujevë-Prishtinë nuk i kanë lejuar të qarkullojnë autobusët që janë të komunës së Prishtinës.

    Pronari i kompanisë ‘Besart Lines’ që mban linjën 15 Prishtinë-Sharban, e cila ka lidhur marrëveshje me komunën e Prishtinës, thotë se kompanive të Podujevës i’u bën konkurrencë çmimi i biletës kthyese 80 cent.

    “I dëmton Podujevën sepse Prishtina e ka bërë 80 cent biletën kthyese, e nuk hip manej askush me ta. Neve na paguan me kontratë komuna, ata biletën deri në Llugjan e kanë 80 cent, këtu është problemi. Dihet se ka konkurrencë, kjo është marrëveshje e komunës me BERZH”- tha Salih Asllani.

    “Linjat e Podujevës janë në vijë të Ministrisë, ne jemi me komunë. Podujeva është e vetmja që kanë hyrë deri në qytet, tash nuk i lejojnë”- shtoi tutje ai.

    Nga 02.01.2025 qytetarët e Kryeqytetit kanë sistem të unifikuar të transportit publik urban, me bileta të integruara ditore, javore dhe mujore për të gjitha linjat, përfshirë operatorët privatë që po ashtu operinë sipas këtyre kushteve.

    Çmimet e biletave sipas këtij vendimi që aplikohen edhe në linja që lidhin fshatrat me qytetin janë si në vijim:

    • 0.50 cent për një udhëtim të vetëm.
    • 0.80 cent për biletën ditore (vlefshme për të gjitha linjat).
    • 4 euro për biletën javore.
    • 12 euro për biletën mujore për studentë.
    • 13,50 euro për biletën mujore për qytetarë.

    Një biletë e tillë mund të përdoret brenda 12 orëve në secilën linjë të trafikut urban.

    Kallxo.com ka kërkuar deklarim edhe nga Komuna e Prishtinës si dhe përfaqësues të Trafikut Urban, por deri në publikim të këtij lajmi nuk është dhënë përgjigje.

  • Mustafa (LDK): Do ta ndërtojmë Centralin me gaz dhe Parkun teknologjik

    Kandidati për deputet nga radhët e LDK-së, Besian Mustafa, në “Debat Përnime”, ka folur për nevojën e bashkëpunimit mes sektorit privat dhe atij publik në Kosovë.

    “Ekonomia e tregut të lirë nuk bëhet pa sektorin privat. Pra, gjithmonë kemi paraparë dhe parashohim bashkëpunim të ngushtë mes sektorit publik, pra qeverisjes dhe sektorit privat, në këtë rast kompanive private.” – ka theksuar Mustafa.

    Ai ngriti shqetësimin e tij karshi Qeverisë aktuale, për mungesën e ekzekutimit të fondeve ndërkombëtare,

    “Nuk është problemi te mungesa e Marrëveshjeve ndërkombëtare dhe financimit ndërkombëtar, por është te mungesa e ekzekutimit të këtyre fondeve nga ana e kësaj Qeverie.” – tha Mustafa.

    Ky kandidat për deputet përmendi dy projekte që planifikojnë t’i realizojnë nëse e marrin pushtetin, e që janë: Centrali me gaz dhe Parku teknologjik.

    “Centralin me gaz të cilin do ta ndërtojmë në Komunën e Ferizajit do ta financojmë përmes Fondeve të Trustit Pensional, ndërsa Parkun Teknologjik, po ashtu në dalje të Prishtinës – ku do të ketë një sistem që përfshin të gjitha hallkat e zingjirit të këtyre teknologjive, pra të gjitha një lokacion fizik – do të bëhet me një investim prej 30 milionë eurove.” – ka theksuar Mustafa.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025.  Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim me partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

    Për më shumë, lexoni në linkun në vijim:

    https://kallxo.com/gjate/ldk-premton-ne-debat-pernime-reforma-ne-drejtesi-dhe-investime-kapitale-miliardeshe/

  • Gjoba digjitale të trafikut në Prishtinë, Rama nënshkruan Marrëveshje me Policinë e Postën

    Në kuadër të modernizimit të Kryeqytetit, kryetari i Prishtinës Përparim Rama nënshkroi Marrëveshje me Policinë dhe Postën e Kosovës për Gjoba digjitale të trafikut.

    Rama theksoi se ky është hap i rëndësishëm për sigurinë dhe rregullin në trafik.

    “Sot nënshkruam Marrëveshjen për gjobat digjitale të trafikut me Policinë e Kosovës dhe Postën e Kosovës. Një hap i rëndësishëm për sigurinë dhe rregullin në Kryeqytet – duke modernizuar mbikëqyrjen e rregullimin dhe duke minimizuar kundërvajtjet në trafik.” – shkroi Rama në Facebook.

    I pari i Prishtinës, më tej, shtoi se “Kryeqyteti po shkon me hapa të shpejtë drejt modernizimit”.

    Si pjesë e angazhimit për një Qytet të Mençur (Smart City), muaj më parë Kryeqyteti nisi vendosjen e shtyllave informuese, që tregojnë vendet e lira të parkimit, temperaturën, cilësinë e ajrit e informacione të tjera.