Një burrë ka raportuar në Policinë e Kosovës se vajza e tij është zhdukur.
Sipas Policisë, prindi i viktimës ka njoftuar se vajza e tij nga data 13.01.2025 është larguar nga shtëpia dhe se nuk dihet më për vendodhjen e saj.
Rasti raportohet të ketë ndodhur në rrugën “Xhelal Hajda”, në Rahovec.
Policia e Kosovës ka kërkuar bashkëpunim nga qytetarët që mund të kenë informacion për vendndodhjen e qytetares Arianita Gajtani, e cila është raportuar e zhdukur nga data 20.11.2024.
Sipas njoftimit të Policisë, Gajtani është banuese në Lipjan dhe që nga koha kur është raportuar “e zhdukur” Policia ka ndërmarrë një varg veprimesh.
Policia ka bërë intervistime të personave të cilët mund të ndihmojnë në gjetjen e vendndodhjes së Gajtanit, kontrollimin e hyrjeve-daljeve në të gjitha pikat kufitare, kërkime në zona që ajo i kishte frekuentuar zakonisht – ambiente të mbyllura e të hapura, analizimin dhe hetimin e çdo lloj informacioni që lidhet me të.
“Edhe pse veprimet dhe kërkimet policore janë duke vazhduar, pas marrjes së autorizimit nga ana e Prokurorit të Shtetit, nga ana juaj kërkojmë kontributin tuaj qytetar. Të gjithë ata që kanë çfarëdo lloj informacioni, që ndërlidhet me të, t’i përcjellin ato Policisë përmes numrit 192.” – thuhet në njoftimin e Policisë, më 14.01.2025.
Kërkimet për 27-vjeçarin e zhdukur që dyshohet të ketë rënë nga Ura e Fshajt më 24.12.2024 kanë përfunduar pa sukses për këtë të premte, njoftoi zëdhënësi i Policisë në Rajonin e Prizrenit, Vesel Gashi.
Gashi tha se kërkimet do të vazhdojnë përsëri.
”Prej datës 25.12.2024 hetuesit rajonalë kanë vazhduar kërkimet në mënyrë intensive në kërkim të tij. Të njëjtit në mënyrë intensive dhe në bashkëpunim me qytetarët i kanë ndërmarrë të gjitha veprimet për gjetjen e personit në fjalë por ka rezultuar pa sukses. Me datë 4-5 janar, nga Ura e Fshejt deri te një pjesë e tunelit është kërkuar por ka rezultuar pa sukses, është kërkuar ndihma e FSK-së dhe sot kanë nisë me kërkim deri te Ura e Rugovës, por edhe këto nuk kanë rezultuar me sukses. Kërkimi do të vazhdojë nesër por për sot kanë përfunduar kërkimet për shkak te kushteve dhe dukshmërisë”- tha Gashi për KALLXO.com.
Personi i zhdukur me inicialet A.H. është nga komuna e Gjakovës.
Më 10.01.2025, FSK-ja njoftoi se ka angazhuar ekipe të Gardës Kombëtare të Forcës së Sigurisë së Kosovës në operacionin e kërkim-shpëtimit malor dhe ujor në kërkim të një 27-vjeçari.
FSK-ja theksoi se angazhimi i ekipeve erdhi me kërkesën e Qendrës së Situatave të Qeverisë së Republikës së Kosovës dhe në koordinim me Policinë e Kosovës të rajonit të Gjakovës.
https://kallxo.com/lajm/dyshohet-se-nje-27-vjecar-i-zhdukur-ka-rene-nga-ura-e-fshajt-fsk-angazhon-ekipe-per-kerkim/