Etiketë: Zgjedhjet

  • Organizatat e shoqërisë civile reagojnë ndaj Vetëvendosjes për bojkotin e “Debat Përnime”

    Një grup prej dhjetëra organizatave jo-qeveritare kanë reaguar ndaj bojkotit të subjektit politik, Lëvizja Vetëvendosje për mos të marrë pjesë në emisionin “DebatPërnime”, prodhim i dy organizatave, Rrjetit Ballkanik të Gazetarisë Hulumtuese (BIRN) dhe Internews Kosova.

    Në reagimin e tyre, OJQ-të kanë theksuar që bojkoti për mospjesëmarrje në “Debat Përnime”  e cenon interesin publik dhe informimin e drejtë të qytetarëve në kohë zgjedhjesh.

    “Ne, organizatat e poshtëshënuara e kemi marrë me shumë shqetësim vendimin e Lëvizjes Vetëvendosje me të cilin kjo parti ka vendosur të bojkotojë debatin zgjedhor të organizuar nga organizatat e shoqërisë civile, Rrjeti Ballkanik për Gazetari Hulumtuese BIRN dhe Internews Kosova, organizata anëtare e International Fact-checking Network, IFCN dhe European Factchecking Standards Network, EFCSN dhe fituese të çmimeve ndërkombëtare për gazetari hulumtuese” – thuhet në reagim.

    Partia Lëvizja Vetëvendosje mori vendim bojkotimin e tre televizioneve në vend, duke përfshirë edhe formatin e debateve zgjedhore “Debat Përnime”.

    “Vendimi për të bojkotuar debatin e organizuar nga organizata të certifikuara të verifikimit të fakteve  dhe organizata me renome në gazetari hulumtuese cenon interesin publik dhe informimin e drejtë të qytetarëve për ofertën politike të partive politike dhe llogaridhënies” – thuhet tutje në reagim.

    Ndaj bojkotimit të “Debat Përnime” ka reaguar edhe drejtoresha e Rrjetit Ballkanik të Gazetarisë Hulumtuese dhe drejtuesja e emisionit “Debat Përnime”, Jeta Xharra.

    Reagimi i plotë:

    Reagim publik ndaj vendimit të Lëvizjes Vetëvendosje për të bojkotuar formatin e vetëm të programeve televizive zgjedhore të verifikimit të fakteve në Zgjedhjet Parlamentare 2025 në Kosovë.

    Ne, organizatat e poshtëshënuara e kemi marrë me shumë shqetësim vendimin e Lëvizjes Vetëvendosje me të cilin kjo parti ka vendosur të bojkotojë debatin zgjedhor të organizuar nga organizatat e shoqërisë civile, Rrjeti Ballkanik për Gazetari Hulumtuese BIRN dhe Internews Kosova, organizata antare e International Fact-checking Netëork, IFCN dhe European Factchecking Standards Netëork, EFCSN dhe fituese të çmimeve ndërkombëtare për gazetari hulumtuese.

    Janë pikërisht emisionet e këtij ekipi, programet “Jeta në Kosovë” dhe “Drejtësia në Kosovë” që janë përjashtuar nga televizioni publik pasi që kanë ekspozuar monopolin e oligarkëve duke ia shpëtuar kështu buxhetit të Kosovës 14 milion euro, andaj është absurde për VV-në të bojkotojë këto emisione në emër të bojkotit ndaj oligarkëve.

    Vendimi për të bojkotuar debatin e organizuar nga organizata të çertifikuara të verifikimit të fakteve  dhe organizata me renome në gazetari hulumtuese cënon interesin publik dhe informimin e drejtë të qytetarëve për ofertën politike të partive politike dhe llogaridhënies.

    Debatet politike të udhëhequra nga ekipi i Kallxo.com i kanë ofruar votuesëve të Kosovës sfidim të programeve partiake që nga viti 2005, duke na informuar neve qytetarëve për ofertën e partive politike në mënyrë të paanshme, ta balancuar dhe të pavarur. Në këto debate pyetjet e qytetarëve dhe të shoqërisë civile kanë qenë të përfaqësuara në mënyrë gjithpërfshirëse. Andaj bojkoti i VV-së, mbetet për ne i pakuptueshëm dhe brengosës.

    Bojkoti i formateve të debatit të cilat udhëhiqen nga standardet e Fact Check u pamundëson qytetarëve të Kosovës informim të saktë gjatë zgjedhjeve. Ky veprim i hapë rrugë mundësisë së abuzimit të informacionin dhe shprëndarjes së dezinformatës.

    Debat “Përnime” ofron një platformë të hapur edhe për barazinë gjinore dhe etnitë tjera në Kosovë. Ne vlerësojmë se refuzimi për tu bërë pjesë e organizimeve të tilla cënon hapsirën e grave në media.

    Ne organizatat e poshtëshënuara i bëjmë thirrje LVV-së të heqë dorë nga ky vendim dhe tu lejojë kandidatëve për deputet, sidomos kandidateve gra që lirshëm të marrin pjesë në debate të zhvilluara mbi standardet e verifikimit të fakteve.

    • Fourth Wave (FoW)
    • Qendra per Zhvillimin e Grupeve Shoqerore – CSGD
    • Asociacioni i Gazetarëve të Kosovës
    • Art Polis
    • KIPRED
    • Activism Roots
    • Rrjeti i Grave te Kosoves (RrGK)
    • KIPRED
    • Pishtaret
    • Forumi per Iniciativa Qytetare (FIQ)
    • Fondacionin per te Drejtat e Kafsheve
    • Community Building Mitrovica
    • Instituti Edutask
    • Instituti Sekhmet
    • Keshilli Rinor Kosovar (KYC)
    • YMCA Movement
    • NGO Voice of Roma, Ashkali and Egyptians
    • Youth Initiative for Human Rights (YIHR)
    • Democracy for Development (D4D)
    • Toka

  • Dyshimet për fletvotime të plotësuara në rrjete sociale – Prokuroria autorizon Policinë të nis hetimet

    Zyra e Kryeprokurorit të Shtetit ka njoftuar se ka autorizuar Policinë e Kosovës që të hetoj rastet e dyshuara për veprën penale ‘Cenimi i fshehtësisë së votimit’.

    Prokuroria thotë se do të ndaloj çdo qytetar që tenton të ndikoj apo të keqpërdorë votën e lirë.

    Përmes këtij njoftimi ftohen qytetarët që të bashkëpunojnë me Prokurorinë dhe t’i përcjellin informatat në lidhje me keqpërdorimin e votës së lirë.

    “Zyra e Kryeprokurorit të Shtetit informon opinionin publik se Prokurori i Shtetit ka filluar angazhimin në mbrojtjen e votës së lirë për qytetarët e Republikës së Kosovës, për zgjedhjet nacionale që do të mbahen më 9 shkurt 2025”– thuhet mes tjerash në komunikatë.

    Në rrjete sociale janë duke qarkulluar disa video dhe video në të cilat po mbushen fletvotime apo shfaqen fletvotime të plotësuara për zgjedhjet për Kuvendin e Kosovës që mbahen më 09.02.2025.

    Videot shpërfaqin mbushjen e fletvotimeve për parti politike të ndryshme.

    Videot dhe fotografitë mund t’i qasni këtu, këtu, këtu, këtu dhe këtu.

    Rreth kësaj çështjeje, KALLXO.com ka dërguar pyetje edhe në Komisionin Qendror të Zgjedhjeve por që deri në momentin e publikimit të këtij lajmi nuk ka pranuar përgjigje.

  • Kryetari i PDK-së takohet me Shefen e Misionit të BE-së për Vëzhgimin e Zgjedhjeve

    Kryetari i Partisë Demokratike të Kosovës, Memli Krasniqi është takuar me Shefen e Misionit të BE-së për Vëzgimin e Zgjedhjeve, Nathalia Loiseau.

    Sipas komunikatës së PDK-së, në takim u fol për angazhimin e Kosovës për Zgjedhje të lira, të ndershme dhe transparente, si dhe për përpjekjet për forcimin e proceseve demokratike në vend.

    “Ai theksoi rëndësinë e misioneve të mëparshme të BE-së në mbështetjen e reformave zgjedhore, rritjen e transparencës dhe fuqizimin e besimit publik në procesin zgjedhor.” – citohet të ketë thënë Krasniqi.

    Tutje, Krasniqi citohet se ka thënë se Kosova është krenare për organizimin e Zgjedhjeve demokratike dhe respektimin e rezultateve zgjedhore – gjë e cila sipas tij reflekton pjekurinë dhe vlerat demokratike.

    “Gjatë diskutimit u theksua gjithashtu Ligji i ri për Zgjedhjet e Përgjithshme, i cili përbën një moment historik në reformat zgjedhore të Kosovës. Kryetari Krasniqi theksoi se monitorimi dhe rekomandimet e misionit do të jenë thelbësore për vlerësimin e ndikimit të këtij Ligji, identifikimin e përparësive dhe adresimin e çdo mangësie të mundshme.” – thuhet në mes të tjerash në komunikatë.

    Krasniqi ka siguruar Luiseau për bashkëpunimin, për të garantuar suksesin e këtij misioni.

    Kryetari i PDK-së ka thënë se si parti do të promovojnë gjithpërfshirjen dhe do të luftojnë dezinformimin, për të siguruar mjedis zgjedhor të drejtë dhe të besueshëm.

    Loiseau citohet të ketë konfirmuar përkushtimin e BE-së, për të mbështetur Kosovën në rrugëtimin e saj demokratik.