Etiketë: aak – nisma

  • Dreshaj (AAK): Do ta rishikojmë buxhetin për Shëndetësinë

    Aleanca për Ardhmëninë e Kosovës (AAK) së bashku me partnerët e saj të koalicionit: Nismën Socialdemokrate, Konservatorët, Forumin Intelektual E-30 dhe Listën Ideal kanë prezantuar në emisionin “Debat Përnime” planin e tyre për fushën e Shëndetësisë.

    Kandidati për Deputet, Shemsedin Dreshaj derisa ka folur për ato që ai i ka quajtur “dështimet e Qeverisë aktuale” në krijimin e Strategjisë për Shëndetësinë është zotuar se me ardhjen e tyre në pushtet, hapi i parë që do bëjnë do të jetë rishikimi i statusit të Shërbimit Spitalor dhe Klinik Universitar të Kosovës (SHSKUK).

    “Hapi i parë në Shëndetësi në situatën aktuale që e kemi është se duhet të merremi me statusin e SHSKUK-së. Praktikisht, kemi një centralizim ekstrem të kompetencave në nivel të Bordit, që e menaxhon SHSKUK-në.” – tha ai.

    Andaj lidhur më këtë, Dreshaj tha se “AAK rekomandon që Drejtori të ketë kompetenca dhe të jep përgjegjësi”, pasi aktualisht, sipas tij, Drejtorët nuk kanë kompetenca për sa kohë që përgjegjësitë i kanë të vogla.

    Nëse Aleanca vjen në pushtet, sipas tij, buxheti i ndarë për sektorin e Shëndetësisë për vitin 2025 nga Qeveria Kurti do të rishikohet, qysh në seancën e parë të Kuvendit.

    Premtimi i radhës nga Dreshaj në emër të partisë së tij ishte edhe heqja e TVSH-së për barna dhe pajisje mjekësore.

    Ndër tjera, ky koalicion e ka përfshirë në Programin zgjedhor edhe krijimin e Sistemit Informativ Shëndetësor (SISH), zgjerimin e Listës esenciale të barnave deri në funksionalizimin e sigurimeve shëndetësore, krijimin e një linje të veçantë buxhetore për Spitalet Rajonale dhe Klinika (QKUK), si dhe ndërtimin e një laboratori për analiza specifike për të arritur diagnostifikimin e saktë dhe të shpejtë për sëmundje specifike.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.

    Për më shumë, lexoni në linkun në vijim:

    https://kallxo.com/gjate/dyfishim-pagash-digjitalizim-dhe-zgjerim-te-listes-se-barnave-esenciale-plani-i-aak-se-per-shendetesine/

     

  • Limaj në Klinë: Kryeministri e ka humbur rrugën

    Kryetari i Nismës Socialdemokrate, Fatmir Limaj, gjatë një tubimi elektoral të mbajtur më 15.01.2025 në Klinë, deklaroi se Kosovës i duhet një kryeministër që i bashkon qytetarët e nuk harxhon energji në përçarje.

    Sipas Limajt, kryeministri Albin Kurti “e ka humbur rrugën”.

    “Kosovës i duhet një kryeministër që i bashkon qytetarët, shuan polarizimet, nuk harxhon energji kot në përplasje, në përçarje, në shpifje e mashtrime. Kryeministri jonë e ka humbur rrugën. E ka harruar punën që ia ka besuar qytetari i Kosovës. Në vend se ta ndërtojë vendin ai fuqishëm angazhohet me ta përçarë vendin”- u shpreh Limaj.

    Ai ka thënë se më shumë se kurrë Kosova ka nevojë për njerëz të pjekur, të ditur e për zëra racionalë.

    E kandidati i këtij koalicioni për kryeministër, Ramush Haradinaj, gjatë këtij tubimi ka thënë se ekzistojnë norma se si arrihet siguria e një shteti në mënyrë të përjetshme, duke thënë se formulë e sigurisë kolektive është bashkimi në NATO.

    “Ne jemi popull, kemi të drejta, duam të zhvillohemi si popujt e tjerë. Nuk duam të jetojmë në improvizime. Unë e kam ditur këtë herët që kur janë bërë ligjet e ushtrisë”- është shprehur Haradinaj.

    Aleanca për Ardhmërinë e Kosovës dhe partnerët e saj të koalicionit, Nisma Socialdemokrate, Konservatorët, Forumi Intelektual E-30, dhe Lista Ideal më 15.01.2025 e kanë vazhduar fushatën politike në Grabanicë të Klinës.

    Në zgjedhjet e shkurtit, dega e AAK-së në Klinë ka tre kandidatë në listë për deputetë të Kuvendit të Kosovës.

    Haradinaj ka takuar sot të Ngarkuarën me Punë në Ambasadën amerikane në Kosovë, Anu Prattipati, me të cilën tha se diskutuan për zhvillimet aktuale në Kosovë dhe rajon, me theks të veçantë në forcimin e partneritetit strategjik Kosovë-SHBA.

    “Konfirmova edhe një herë qëndrimin tonë të palëkundur për avancimin e vlerave demokratike dhe orientimin euro-atlantik të Kosovës. Bashkëpunimi me SHBA-të mbetet thelbësor për sigurinë dhe prosperitetin e vendit tonë, ndërsa anëtarësimi direkt në NATO përmes Planit Aksional është rruga më e mirë për ta arritur këtë objektiv”- ka thënë Haradinaj.

    Ndërsa gjatë ditës, Haradinaj njoftoi se koalicionit i është bashkuar Veli Kryeziu, intelektual i shquar për kontributin e tij në fushën shkencore të historisë.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.