Etiketë: LVV

  • LVV për tubimin në Zvicër: Mërgata e mobilizuar si asnjëherë më parë

    Kryeministri i Kosovës, Albin Kurti, më 23.01.2025 ka zhvilluar tubim elektoral në Cyrih të Zvicrës gjatë qëndrimit të tij për Forumin Ekonomik Botëror në Davos.

    Lëvizja Vetëvendosje ka publikuar pamje nga takimi i Kurtit me mërgatën.

    “Mërgata e mobilizuar si asnjëherë më parë në misionin e përbashkët gjithëpopullor drejt 500 mijë zemrave që rrahin sikur një”- kështu e ka përshkruar LVV ketë takim.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

     

  • LDK-ja e thërret Kurtin për debat publik me Abdixhikun: Le t’i përgjigjet popullit

    Lidhja Demokratike e Kosovës përmes një Konference për media ka përsëritur ftesën drejtuar kandidatit të Lëvizjes Vetëvendosje, Albin Kurtit për të zhvilluar një debat publik me kandidatin e LDK-së për Kryeministër, Lumir Abdixhikun.

    Zëdhënësi i LDK-së, Besian Mustafa ka thënë se ky është momenti i duhur për një debat, për të diskutuar se kush do të kujdeset më mirë për të ardhmen e qytetarëve.

    “Po iu bëj thirrje të gjitha mediave dhe qytetarëve të Kosovës, që t’i bëjnë këtë pyetje Kurtit: Pse nuk iu përgjigj thirrjes së Lumirit për një debat publik? Në çfarëdo vendi, në çfarëdo kohe, në debat live vetëm rreth një teme: të ardhmen e Kosovës. Ky është momenti i duhur për një debat të vërtetë, për të diskutuar se kush do të kujdeset më mirë për të ardhmen e qytetarëve dhe kush ka planet më të mira, aftësinë për t’i realizuar ato, kush ka ekipin…” – ka deklaruar Mustafa, më 23.01.2025.

    Mustafa ka shtuar se, pavarësisht se ai e dinte përgjigjen, Kurti duhet të përballet për t’iu përgjigjur popullit.

    “Unë e di se përgjigja është e qartë, por Kurti duhet të paktën t’i përgjigjet popullit dhe ne i bëjmë thirrje edhe njëherë ‘Eja në debat kudo, kurdo’. Populli i Kosovës e meriton dhe po e kërkon këtë debat.” – ka deklaruar Mustafa.

    Lidhur me këtë çështje, KALLXO.com ka kërkuar informacione nga zëdhënësi i LVV-së dhe është në pritje të përgjigjes.

    Zgjedhjet parlamentare të 9 shkurtit 2025 përbëjnë procesin e parë të rregullt zgjedhor në Kosovë, pas shpalljes së pavarësisë më 2008.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Partia Lëvizja Vetëvendosje mori vendim bojkotimin e tri televizioneve në vend.

    Një grup prej dhjetëra Organizatave Joqeveritare kanë reaguar ndaj bojkotit të subjektit politik, Lëvizja Vetëvendosje për të mos marrë pjesë në emisionin “Debat Përnime” – prodhim i dy Organizatave: Rrjetit Ballkanik të Gazetarisë Hulumtuese (BIRN) dhe Internews Kosova.

    Në reagimin e tyre, OJQ-të kanë theksuar që bojkoti për mospjesëmarrje në “Debat Përnime” e cenon interesin publik dhe informimin e drejtë të qytetarëve në kohë Zgjedhjesh.

  • LVV: Ne dëshmuan se si qeveriset për gratë dhe vajzat

    Partia në pushtet, Lëvizja Vetëvendosje ka ftuar qytetarët për “mobilizim masiv për të arritur numrin rekord” të daljes së grave dhe vajzave në votime për Zgjedhjet e 9 shkurtit 2025.

    LVV ka thënë se gjatë mandatit që po përfundon kanë dëshmuar se si qeveriset për gratë dhe vajzat – duke theksuar se kanë mbështetur nënat dhe do të vijojnë t’i mbështesim ato për çdo ditë.

    “Dëshmuam se si buxheti për Sportin bëhet i plotë, kur ai është buxhet edhe për vajzat sportiste; kur buxheti për Artin është dhe për gratë artiste; kur buxheti për Ushtrinë e Policinë është dhe për gratë në uniformë; kur buxheti për Shëndetësinë është dhe për vajzat e për gratë; kur buxheti për Arsimin është dhe për vajzat e kur mbështetja e biznesit është edhe për gratë ndërmarrëse.” – ka thënë LVV.

    Lëvizja Vetëvendosje ka ftuar përkrahësit e partisë, që të votojnë në listën e tyre sa më shumë gra e vajza kandidate.

    “Në këto Zgjedhje, në Listën tonë të përbashkët me Partinë Guxo dhe Alternativën, ne i kemi 41 gra kandidate. Secila prej tyre është figura e vajzës dhe gruas që angazhimin politik e ka krahas papërkulshmërisë përballë vështirësive të jashtëzakonshme, me të cilat përballen vajzat dhe gratë.” – thuhet në njoftimin e kësaj partie.

    LVV-ja ka njoftuar, po ashtu, se më 22.01.2025 do të mbajë tubim me gra në qytetin e Mitrovicës.

    Ndërsa, më 21.01.2025, ministrja e Drejtësisë Albulena Haxhiu, nënkryetarja e Kuvendit Saranda Bogujevci, ministri i Financave Hekuran Murati dhe kryetari i Podujevës Shpejtim Bulliqi mbajtën tubim me vajza e gra të kësaj Komune.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.

    Për këto Zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër – lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet e tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.