Etiketë: zgjedhjet 2025

  • Zemaj (LDK): Do ta themelojmë Agjencinë për Mërgatën

    Kandidati për deputet nga LDK-ja, Armend Zemaj, ka bërë të ditur se në kuadër të programit zgjedhor kanë paraparë themelimin e Agjencisë për Mërgatën.

    Kjo agjenci, sipas tij, do të jetë nën përkujdesje të veçantë të kryeministrit.

    Roli i kësaj agjencie, siç thotë ai, do të jetë për integrimin e mërgatës në Kosovë, e krahas kësaj të mundësojë edhe tërheqjen e investimeve nga jashtë.

    “Një Agjenci që do të organizojë në mënyrë ekzakte, mos të them problemet, por pjesën e integrimit të tyre, lidhjes me Kosovën, thithjen e investimeve dhe kthimin e trurit”- tha Zemaj.

    Ai ka përkujtuar se në LDK edhe më herët ka pasur iniciativa të tilla.

    ”Në LDK kemi themeluar grup të veçantë politik për mërgatën dhe sigurisht organizimin e mësimit shqip, ambasadave kulturore dhe kornizën e investimeve”- tha Zemaj në “Debat Përnime”, më 29.01.2025.

    Ndër të tjera, ai përmendi edhe aktivitetet që do të organizohen përbrenda kësaj agjencie, me qëllim që t’i lidhin me Kosovën fëmijët që janë lindur e rritur jashtë vendit.

    Pjesë e aktiviteteve të kësaj agjencie, sipas tij, do jetë edhe dërgimi i librave për mërgatën.

    “Ne do ta rikthejmë jo si pjesë vullnetare, por institucionale dërgimin e librave në mërgatë”- tha Zemaj.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “Debat Përnime” tha në nisje të debatit për politikën e jashtme se “Donika Gërvalla si ministre e Punëve të Jashtme, Glauk Konjufca si kryetar i Kuvendit, Vjosa Osmani si presidente, deri tani edhe komplet Qeveria Kurti 2, me gjithë respektin ndaj tyre, janë udhëheqësi e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në linkun në vijim:

    https://kallxo.com/gjate/ldk-premton-agjenci-per-mergaten-rikthim-te-ministrise-per-integrime-dhe-moszbatim-te-marreveshjes-se-ohrit/

  • Hamza premton 25 milionë euro bursa studentore për çdo vit

    Kandidati i Partisë Demokratike të Kosovës për kryeministër, Bedri Hamza, më 29.01.2025 ka mbajtur takim me studentë në Prishtinë.

    Hamza ka thënë se e ka prioritet të lartë arsimin.

    Ai ka premtuar 25 milionë euro bursa studentore për çdo vit.

    “Unë, kryeministër, ju siguroj dhe ju garantoj që vajzë apo djalë, që nuk ka mundësi t’i realizojë ëndrrat e saj apo të tij për shkak të kufizimit financiar, nuk do të ketë më në Kosovë. Starti është 25 milionë Fond Shtetëror për Bursa çdo vit. Ne do t’i ndihmojmë startup-et përmes Fondit për Garantimin e Kredive, të cilit do t’ia rrisim fushëveprimtarinë dhe kapitalin, që ata ta marrin riskun, ndërsa kreditë t’i realizojnë të rejat edhe të rinjtë që kanë vizion, që kanë program me fizibilitet. Ne do t’ua garantojmë qasjen në financa”- ka thënë Hamza.

    Hamza ka thënë që beson te të rinjtë, sepse kanë vizion edhe për 40-50 vitet e ardhshme.

    Fushata për zgjedhjet parlamentare në Kosovë ka filluar zyrtarisht më 11.01.2025.

    Partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Haziri (LDK): S’ka zbatim të asnjë marrëveshjeje, pa zbatim të marrëveshjes gjithëpërfshirëse

    Kandidati për deputet nga LDK-ja, Lutfi Haziri, ka kritikuar Qeverinë Kurti për qasjen që ka ndjekur në dialogun për normalizim të marrëdhënieve me Serbinë, të ndërmjetësuar nga Bashkimi Europian.

    Ai e ka cilësuar Marrëveshjen e Ohrit, si “kthesën më të madhe” për të keq, që i ka ndodhur Kosovës gjatë katër viteve të fundit.

    Parim i LDK-së, sipas tij, është se “nuk vlen asnjë marrëveshje përderisa nuk ka marrëveshje gjithëpërfshirëse”.

    “Nuk vlen dhe nuk implementohet asnjë marrëveshje përderisa nuk implementohet marrëveshja gjithëpërfshirëse. Nuk kemi mbërri te një marrëveshje gjithëpërfshirëse”- tha ai në “Debat Përnime”, më 29.01.2025.

    Duke folur për parimet mbi të cilat, sipas tij, duhet të vazhdojë dialogu, ai tha se në radhë të parë duhet që bisedimet të vazhdojnë në vende neutrale, ndërmjetësi të jetë Bashkimi Europian me mandat të OKB-së, ndërsa garantues të jetë SHBA-ja, me rol të sforcuar.

    “Ne nuk jemi ne negociata me Serbinë, Kosova është në bisedime me BE-në dhe SHBA-në.” Ai ka shtuar se ” SHBA-ja është në anën tonë” dhe si e tillë ”ajo e lehtëson procesin”.

    Sipas Hazirit, Kosova nuk ka negociuar kurrë drejtpërdrejt me Serbinë, por ka negociuar me BE-në, ndërsa BE-ja ka negociuar me Serbinë.

    Ai ka shtuar se edhe pse në kuadër të kësaj Marrëveshje është hapur Kapitulli 35 për Serbinë, LDK ka kapacitete, mekanizëm dhe besim për t’i eleminuar nenet që e dëmtojnë Kosovën.

    “Zotëri Kurti i ka lënë Kosovës bomba të kurdisura në politikën e jashtme e në veçanti në procesin e dialogut”- tha ai.

    Haziri pretendon se raporti i Kurtit me Vuçiqin është personalizuar.

    “Vuçiqi dhe Serbia karshi Kosovës nuk kanë bërë asnjë lloj dallimi. Dhe, Republika e Kosovës nuk ka bërë asnjë lloj dallimi. Kosova nuk guxon me leju këtë raport që zotëri Kurti e ka ndërtuar. Ai raportin me Vuçiqin dhe Serbinë e ka përvetësuar, e ka personalizuar duke e ndarë si raport të tijin, që nuk është i vërtetë”- tha Haziri.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “Debat Përnime” tha në nisje të debatit për politikën e jashtme se “Donika Gërvalla si ministre e Punëve të Jashtme, Glauk Konjufca si kryetar i Kuvendit, Vjosa Osmani si presidente, deri tani edhe komplet Qeveria Kurti 2, me gjithë respektin ndaj tyre, janë udhëheqësi e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në linkun në vijim:

    https://kallxo.com/gjate/ldk-premton-agjenci-per-mergaten-rikthim-te-ministrise-per-integrime-dhe-moszbatim-te-marreveshjes-se-ohrit/