Etiketë: Armë

  • Plagosje me armë zjarri në Prizren

    Pas një fjalosjeje në një Parking në Prizren, të mërkurën, më 29.01.2025, dy persona janë plagosur me armë zjarri – njoftoi Policia e Kosovës.

    Sipas Policisë personat e plagosur kanë kërkuar tretman mjekësor dhe po trajtohen aktualisht në Spitalin Rajonal të Prizrenit, teksa gjendja e tyre është stabile.

    Kurse pa specifikuar numrin, Policia në mes të tjerash njoftoi se disa të dyshuar të cilët ishin të përfshirë në këtë rast janë në kërkim.

    “Më 29.01.2025, rreth orës 02:00, në rrugën ‘Transiti i ri’ në Prizren disa persona të dyshuar janë takuar në Parkingun e një pike shitje të derivateve. Të dyshuarit menjëherë pas takimit  kanë filluar të fjalosen  dhe së paku një person ka shkrepur armën e zjarrit në drejtim të të dyshuarve të tjerë. Pas shkrepjes së armës  persona të përfshirë janë larguar nga vendi i ngjarjes e dy nga ata kanë kërkuar ndihmën e mjekut në Emergjencën e Spitalit Rajonal të Prizrenit. Me kohë janë njoftuar Sektori i Hetimeve të Stacionit dhe  hetuesit e Sektorit Rajonal të Hetimeve të cilët kanë dalë në vendngjarje dhe kanë mbledhur provat dhe dëshmitë. Dy nga të dyshuarit gjenden në trajtim  mjekësor. Gjendja e tyre sipas mjekut kujdestar është jashtë rrezikut për jetë, kurse të dyshuarit e tjerë janë në kërkim.” – thuhet në komunikatën e Policisë.

    Policia ka identifikuar personat e përfshirë dhe ka kryer kontrolle në disa vende – duke konfiskuar armë zjarri e automjete.

    “Policia gjatë natës ka bërë identifikimin e personave të përfshirë në rast. Janë kryer kontrolle në disa vende; tri armë zjarri (pistoleta) dhe dy automjete janë sekuestruar në cilësinë e provës materiale. Sektori Rajonal i Hetimeve i Drejtorisë Rajonale të Policisë në Prizren është duke e hetuar rastin. Në konsultim me Prokurorin kujdestar rasti është cilësuar si “vrasje në tentativë” dhe “mbajtje në pronësi, kontroll, posedim apo shfrytëzim i paautorizuar i armës.” – bëri të ditur Policia.

  • Arrestohet burri në Deçan, dyshohet se i shiti në treg të zi tri pistoleta

    Policia e Kosovës ka arrestuar një burrë në Deçan, pasi dyshohet se ka shitur në treg të zi tri pistoleta, të cilat i kishte me leje. 

    Rasti raportohet të ketë ndodhur në Deçan, dje më 28.01.2025. 

    Sipas Policisë, i dyshuari kur është intervistuar ka deklaruar se dyshon se dy të panjohur kanë depërtuar me forcë në shtëpinë e tij, me ç’rast edhe i kanë vjedhur armët e shitura. 

    “Me vendim të Prokurorit, i dyshuari është liruar në procedurë të rregullt. Rasti nën hetime.” – njofton Policia, sot më 29.01.2025. 

  • Mitrovicë e Veriut – Policia gjen armë e pajisje për prodhimin e kriptovalutave

    Policia e Kosovës ka gjetur, më 22.01.2025, armë, pajisje për prodhimin e kriptovalutave dhe pajisje të tjera të dyshimta në rrugën “Kollashini”, në Mitrovicë të Veriut.

    “Një armë e gjatë (pushkë ajrore), pesë kartela grafike për prodhimin e kriptovalutave me pajisje përcjellëse, dyzet e dy minera për prodhim të kriptovalutave me pajisje përcjellëse, një shtëpizë e kompjuterit, një karikator i revoles, katërmbëdhjetë fishekë të revoles kalibri 9 mm, një radiolidhje, një  kamerë vëzhgimi; divijar, vulë metalike dhe letërnjoftim.” – këto janë gjetur sipas njoftimit të PK-së.

    Sipas Policisë, aparatet për prodhimin e kriptovalutave do t’i dorëzohen Doganës së Kosovës. Ndonëse të arrestuar nuk ka ende, organet e rendit njoftojnë se është identifikuar një person.

    “Në vendin e ngjarjes nuk është hasur ndonjë person i dyshuar, mirëpo është identifikuar një person dhe i cili është me interes për Policinë që të intervistohet. Në lidhje me rastin, është njoftuar Prokurori i Shtetit, i cili ka urdhëruar inicimin e rastit ‘’mbajtja në pronësi, kontroll ose posedim i paautorizuar i armëve.” – thuhet në njoftim.

    Policia përfundon se vazhdon të mbetet e përkushtuar për ofrim të shërbimeve, ndaj të gjithë komunitetit pa dallim.