Etiketë: Lëvizja “Vetëvendosje”

  • Në kohë fushate, Komuna e Gjilanit shpërndan ndihma – pako ushqimore e higjienike

    Në muajin e fushatës zgjedhore, Komuna e Gjilanit më 15.01.2025 u ka shpërndarë ndihma 500 familjeve të kësaj komune. Ndihma përfshin pako me ushqime, miell e mjete higjienike. 

    Aktiviteti u zhvillua sot, më 15.01.2025, në Gjilan.

    Lidhur me këtë, KALLXO.com ka kontaktuar me ushtruesin e detyrës të drejtorit të Shëndetësisë të Komunës së Gjilanit, Hekuran Rapuca, i cili e ka konfirmuar këtë aktivitet.

    Ai tha se aktiviteti ka qenë i organizuar nga vetë Komuna për t’u dalë në ndihmë familjeve, të cilat janë përfituese të asistencës sociale.

    Sipas Rapucës, shpërndarja e ndihmave nga Komuna e Gjilanit për familjet nevojtare nuk është bërë për shkak të fushatës zgjedhore, duke mohuar se një organizim i tillë ka pasur qëllime politike. 

    “Jo vetëm miell, faktikish kanë qenë pako ushqimore dhe higjienike. Është organizim i njëjtë që mbahet për tri vite me radhë. Unë veç pash në disa shkrime që ka marrë konotacion tjetër. Komuna është siguru që në secilin prej viteve prej që jemi në qeverisje, me shpërnda pako të tilla edhe duke e ditë që janari dhe shkurti janë ndoshta muajt më të dobët financiarisht tek secili, e kemi planifiku në këtë kohë, nuk ka të bëjë me fushatën kjo”- ka deklaruar Rapuca.

    Më 11.01.2025 ka nisur fushata për zgjedhjet parlamentare që mbahen më 09.02.2025.

    Komuna e Gjilanit udhëhiqet nga Lëvizja Vetëvendosje.  

  • Kërkesa e prindërve drejtuar partive politike: Mos i përdorni fëmijët tanë për agjenda partiake dhe rrini larg shkollave dhe nxënësve!

    Pas raportimit të KALLXO.com se nxënësve të Gjimnazit “Kuvendi i Arbërit” në Ferizaj u ka shkuar një mesazh njoftues për mbajtjen e një mbledhjeje të Lëvizjes Vetëvendosje në këtë qytet, më 09.01.2025, ka reaguar Këshilli i Prindërve të Kosovës.

    Këshilli i Prindërve të Kosovës thotë se kanë pranuar ankesa nga disa këshilla komunalë të prindërve për disa raste të keqpërdorimit të këshillave të nxënësve në disa shkolla.

    “Këshilli i Prindërve të Kosovës reagon dhe shpreh shqetësimin lidhur me keqpërdorim e grupeve të këshillave të nxënësve, të cilat janë të krijuara si trupa të pavarur për të kontribuar për përmirësimin dhe mbrojtjen e të drejtave të nxënësve dhe kushteve të tyre të mësim-nxënies dhe jo për qëllime politiko-partiake” – thuhet në reagimin e Këshillit të Prindërve të Kosovës në Facebook më 10.01.2025.

    Si Këshill i Prindërve të Kosovës e kanë dënuar çdo keqpërdorim të tillë nga çdokush dhe u kanë bërë thirrje këshillave të nxënësve që të përdoren vetëm për qëllimin mbi të cilin janë themeluar, e po ashtu ata kanë një thirrje edhe për partitë politike.

    “KPK, bënë thirrje Këshillave të Prindërve dhe Këshillave të Nxënësve që t’i kryejnë detyrat e tyre konform qëllimit për të cilin janë themeluar dhe ekzistoj dhe mos të bien pre e agjendave partiake. Po ashtu KPK, bënë thirrje të gjitha partive politike që mos t’i përdorin fëmijët tanë për agjenda partiake dhe partitë të rrinë larg shkollave dhe nxënësve!” – ka theksuar Këshilli i Prindërve.

    Po ashtu, Këshilli i Prindërve të Kosovës u ka kërkuar edhe këshillave komunalë të prindërve në Kosovë që të jenë vigjilentë gjatë kohës së fushatës zgjedhore, duke ruajtur pavarësinë dhe paanshmërinë e tyre dhe të denoncojnë te ta çdo rast potencial të përdorimit të nxënësve për qëllime elektorale.

    Fushata elektorale pritet të fillojë të shtunën, më 11.01.2025.

    Në anën tjetër, mesazhi që iu dërgua nxënësve të Gjimnazit “Kuvendi i Arbërit” në Ferizaj, ka bërë bujë të madhe në gjithë qytetin.

    Pretendohej se mesazhi u dërgua nga kryetarja e Këshillit të Nxënësve të Gjimnazit “Kuvendi i Arbërit”, e cila është nxënëse.

    “Nesër me datë 09.01.2025 do të ketë një mbledhje në kafen X prej orës 18:30. është një lloj organizimi nga Lëvizja Vetëvendosje, ku do të jetë prezent edhe kryeministri i Kosovës. Do të ketë muzike dhe pije. Mundësisht dërgojeni këtë mesazh nëpër klasët e juaja dhe m’i dërgoni sot emrat e nxënësave të cilët do të jenë pjesëmarrës” – thuhet në mesazhin që pretendohet se u është dërguar nxënësve të Gjimnazit “Kuvendi i Arbërit”.

    Zëvendësdrejtori i Gjimnazit, Adnan Hashani, ka thënë për KALLXO.com se kanë mbajtur një mbledhje me Këshillin e Nxënësve, në të cilin është deklaruar kryetarja e këtij Këshilli në lidhje me dërgimin e mesazhit.

    Drejtori i Arsimit në Ferizaj, Afrim Llabjani, tha se është informuar në mbrëmje të datës 08.01.2025 se nga kryetarja e Këshillit të Nxënësve të Gjimnazit “Kuvendi i Arbërit” u është dërguar mesazhi nxënësve.

    Mëngjesin e të enjtes, më 09.01.2025, Llabjani tha se e ka takuar drejtorin e Gjimnazit  “Kuvendi i Arbërit”, Bajram Rexhepi. Nga ky takim, Rexhepi ka thënë se ishte informuar për këtë rast.

    “Kërkova nga drejtori [i Gjimnazit] që t’i thirrin kryetarët e këshillave të klasëve, secilës klasë, edhe kryetaren e Këshillit të Nxënësve, ta bisedojnë këtë çështje, pastaj duhet m’i shiqu edhe pjesët e tjera, aspektet e tjera ligjore, udhëzimet administrative se çka mund të bëjmë ne në këtë drejtim” – ka treguar Llabjani përmes telefonit për KALLXO.com.

    Sipas Llabjanit, nxënësit nëse janë në proces mësimor gjatë kohës që mbahet mbledhja e LVV-së, nuk kanë të drejtë të marrin pjesë në atë mbledhje.

    “Unë po besoj që nxënësit nuk marrin pjesë edhe nuk duhet të marrin pjesë në këto aktivitete, sepse ata janë, e para janë të mitur që nuk i takojnë moshës madhore për të votuar, e dyta – mund të jenë të manipuluar” – ka theksuar Llabjani.

    Zëvendësdrejtori Hashani ka treguar se çka kanë biseduar në mbledhjen që ka mbajtur Këshilli i Nxënësve të Gjimnazit.

    Sipas Hashanit, nxënësja është mashtruar prej Këshillit të Nxënësve në nivel komunal.

    Hashani tha se nxënëses i është kërkuar nga kryetari i Këshillit të Nxënësve të Ferizajt që ta shpërndajë mesazhin te nxënësit, i cili sipas tij edhe është shpërndarë te të gjithë nxënësit e Gjimnazit.

    “Kryetarja e ka sqaru se si ka rrjedhë çështja. U kanë kërkesë, kjo ka ra pre e mashtrimit me thanë edhe e ka shpërnda mesazhin. Nxënësit e mirëkuptuan edhe nuk pat naj kërkesë për naj masë diçka” – tha Hashani.

    “Ata kanë kërku ose ai ka kërku me shpërnda mesazhin tek kryetarët e klasëve, nëse dëshirojnë me shku në takim me kryeministrin… Ajo e pranoi që ka gabu, s’e ka mendu që është çështje politike edhe e ka shpërnda” – ka shtuar Hashani.

    Hashani tha se nxënësja vazhdon të jetë kryetare e Këshillit të Nxënësve të Gjimnazit, pasi nuk kishte kërkesë për ta shkarkuar nga kjo pozitë.

    Hashani pretendon se mesazhi që u është dërguar nxënësve të Gjimnazit “Kuvendi i Arbërit” është shpërndarë edhe në shkollat e tjera të Ferizajt.

    KALLXO.com ka kontaktuar me kryetarin e Këshillit të Nxënësve të Ferizajt. Ai është nxënës i Shkollës Ekonomike “Faik Konica” në Ferizaj dhe ka thënë se e ka parë në internet lajmin që Lëvizja Vetëvendosje do të jetë në Ferizaj më 09.01.2025.

    Ai tha se e ka dërguar mesazhin në mënyrë shoqërore në një grup në Viber në të cilin janë të gjithë kryetarët e këshillave të nxënësve të shkollave në Ferizaj.

    “Ia kam çu mesazhin, ata nuk e kanë kuptu, kanë shku te drejtorat, t’u mendu që jam t’u dashtë m’iu thanë – shkoni patjetër… Tani drejtorat më kanë kontaktu krejt mua përveç drejtorit të Arsimit, ama unë u kam tregu edhe drejtorave tjerë edhe drejtorit të shkollës tem që ai nuk u kanë tendencë, se na jena institucion, na s’kena drejt m’u përzi me parti politike hiç” – ka treguar nxënësi.

    Drejtori i Shkollës Ekonomike “Faik Konica” dhe Këshilli i Nxënësve të kësaj shkolle e kanë mbajtur një takim me kryetarin e Këshillit të Nxënësve në nivel komunal. Nxënësi tha se pritet që të merret ndonjë masë ndaj tij nga ana e Këshillit të shkollës.

    Ai e ka mohuar se do të shkojë në mbledhjen e Lëvizjes Vetëvendosje të enjten, më 09.01.2025.

    KALLXO.com ka kontaktuar edhe me Ditjon Fetahun, drejtor ekzekutiv i organizatës “Kosovo Youth Council (KYC)”.

    Në baza vullnetare KYC ndihmon në zgjedhjen e kryetarit të Këshillit të Nxënësve në nivel komunal.

    Fetahu përmes telefonit ka thënë se kanë dëgjuar për këtë rast dhe janë duke u frikësuar se nuk është vetëm në Ferizaj.

  • ECPMF i bën thirrje Kurtit ta anulojë vendimin për bojkotim të tri kanaleve televizive gjatë fushatës zgjedhore

    Qendra Europiane për Lirinë e Shtypit dhe Medias (ECPMF) i ka shkruar një letër të hapur liderit të Lëvizjes Vetëvendosje, njëherazi kryeministrit të Kosovës, Albin Kurtit, në lidhje me vendimin e partisë së tij që t’i bojkotojë tri kanale televizive në vend gjatë fushatës zgjedhore.

    Sipas Qendrës Europiane për Lirinë e Shtypit dhe Medias, nuk ka pasur një arsyetim formal rreth kanaleve televizive  T7, TV Dukagjini dhe Klan Kosova për vendimin e LVV-së.

    Në letrën e saj, Qendra Europiane për Lirinë e Shtypit dhe Medias i ka bërë thirrje kryeministrit Kurti që ta anulojë vendimin për bojkotimin e këtyre mediave dhe të sigurohet që Vetëvendosja të sigurojë qasje të barabartë në informacione publike për këto media. 

    “Të gjithë gazetarët duhet të jenë në gjendje të raportojnë lirisht dhe në mënyrë të drejtë për periudhën zgjedhore. Mbrojtja e lirive të medias dhe e drejta e publikut për një proces të informuar dhe demokratik duhet të jetë prioritet” – thuhet në letrën e ECPMF-së për Kurtin.

    ECPMF ka theksuar se duke i bojkotuar kanalet kryesore televizive, minohet e drejta e publikut për informacion dhe roli esencial i gazetarëve në promovimin e transparencës dhe llogaridhënies.

    Më tej, ECPMF i ka cituar në letër dy prej udhëheqësve të kanaleve televizive se si janë njoftuar për vendimin e bojkotimit të kanaleve të tyre nga LVV.

    “Zyrtarët nga Vetëvendosja më informuan se nuk do të marrin pjesë në programet e televizionit T7 gjatë fushatës zgjedhore. Ata nuk ofruan ndonjë arsyetim bindës për këtë vendim që më la të besoj se është një përpjekje për t’iu shmangur llogaridhënies publike” – ka shpjeguar drejtori i kanalit televiziv T7, Leonard Kerquki. 

    “Zyrtarët nga Vetëvendosja më informuan se nuk do të marrin pjesë në TV Dukagjini gjatë fushatës zgjedhore. Arsyetimi i tyre për këtë vendim gjatë takimit nuk ishte i qartë dhe ne kemi kërkuar sqarime të mëtejshme. Për ne, kjo reflekton frikën e partisë në pushtet për t’u ballafaquar me pyetjet e gazetarëve dhe komentatorët politikë në studio” – ka shtuar Ermal Panduri nga TV Dukagjini.

    Tutje, ECPMF ka përmendur edhe shembuj të tjerë që vlerëson se tregojnë një shembull shqetësues të rënies së lirisë së medias në Kosovë.

    ECPMF thotë se gjatë katër viteve të kaluara, derisa Reagimi i Shpejtë i Lirisë së Medias (MFRR) nga afër ka monitoruar zhvillimet në lirinë e medias, kanë qenë dëshmitarë të një rënie shqetësuese të lirisë së mediave në Kosovë. 

    “Në vitin 2022, partnerët e Platformës për Sigurinë e Gazetarëve të Këshillit të Europës vizituan Kosovën për të vlerësuar gjendjen e lirisë së medias dhe mbrojtjen e gazetarëve në vend. Derisa pak progres është vërejtur, misioni konstatoi se “retorikë toksike dhe fushatat e shpifjeve kundër medias, financimi i pamjaftueshëm i transmetuesit publik dhe mungesa e transparencës rrezikojnë të minojnë progresin” – ka thënë ECPMF.

    Më tej, ECPMF bazohet edhe në të dhënat e Asociacionit të Gazetarëve të Kosovës për sulmet dhe kërcënimet ndaj gazetarëve, të cilat thotë se janë dyfishuar.

    “Shumica e këtyre sulmeve përfshijnë sulme verbale nga anëtarë të partisë suaj, të cilët i kanë etiketuar gazetarët si “spiunë serbë” ose bashkëpuntorë dhe i kanë akuzuar që kanë lidhje me interesat serbe” – i ka adresuar ECPMF Kurtit.

    Qendra Europiane për Lirinë e Shtypit dhe Medias ia ka përmendur Kurtit edhe miratimin e Projektligjit për Komisionin e Pavarur për Media (KPM) në Kuvendin e Kosovës më 12.07.2024.

    Sipas Qendrës, ky ligj i ri për median dështoi të përfshijë rekomandimet kritike të Këshillit të Europës, Komisionit Europian dhe shoqërisë civile.

    “Ky ligj tashmë është në pritje të shqyrtimit nga Gjykata Kushtetuese. Zhvillime tjera alaramante përfshijnë një rënie në transparencë, mohimin e shpeshtë të qasjes në informacion dhe rritjen e ndërhyrjes politike në politikat editoriale të transmetuesve publikë. Këto veprime kanë kontribuar në rënien e Kosovës me 19 vende në Indeksin e Lirisë së Shtypit të Reporterëve pa Kufij dhe kanë tërhequr kritika të gjera nga organet ndërkombëtare, duke përfshirë Raportin Vjetor të Komisionit Evropian 2024 që pretendon përpjekjet e qeverisë për të kontrolluar median” – ka thënë Qendra Evropiane.

    “Kosova urgjentisht ka nevojë të marrë masa për të mbrojtur lirinë e medias, të promovojë transparencë dhe të sigurojë llogaridhënien e zyrtarëve publikë. Publiku, veçanërisht gjatë fushatave zgjedhore ka të drejtën themelore të qaset në informacione të ndryshme, të shqyrtojë me kujdes premtimet politike dhe t’i mbajë politikanët llogaridhënës” – ka potencuar ECPMF.

    Asociacioni i Gazetarëve të Kosovës kishte reaguar pas miratimit të Projektligjit për Komisionin e Pavarur të Mediave (KPM).

    Sipas AGK-së, votimi i Projektligjit për KPM është prej goditjeve më të mëdha që Qeveria e Kosovës dhe Vetëvendosje i ka bërë kundër lirisë së medias në Kosovë. Po ashtu sipas tyre ky është tentim për disiplinim e kontroll të mediave.

    “Partia politike në pushtet nuk i ka marrë parasysh vërejtjet e shoqërisë civile e mediave dhe ka shpërfillur Raportin e ekspertes së Këshillit të Europës, që ka konstatuar se pjesa më e madhe e Ligjit nuk i përmbushë standardet europiane, duke përfshirë ato të Këshillit të Europës ku Kosova synon anëtarësimin. Një gjë e tillë, u theksua para votimit edhe nga kryetari i Kuvendit, Glauk Konjufca”- thuhet në reagimin e AGK-së.

    Pas miratimit të këtij Projektligji ka reaguar edhe Misioni i OSBE-së në Kosovë.

    “Rekomandimet kryesore të ekspertëve që nuk janë marrë parasysh kanë nxitur shqetësime rreth dispozitave të reja të cilat do të kenë ndikim në përbërjen, rolin dhe përgjegjësitë e KPM-së, si dhe në procedurat për zgjedhjen e anëtarëve të rinj dhe kushtet e shërbimit për të zgjedhurit. Nuk janë marrë parasysh as rekomandimet për rolin dhe përgjegjësitë e KPM-së gjatë fushatave zgjedhore”- thuhet në deklaratën e OSBE-së, të lëshuar më 11.07.2024.