Etiketë: ministria e shëndetësisë

  • Hyrja në fuqi e Listës së Çmimeve të Barnave, Oda e Farmacistëve të Kosovës kërkon zgjatjen e periudhës tranzitore

    Oda e Farmacistëve të Kosovës e ka quajtur të paimplementueshëm formën aktuale të Listës së Çmimeve të Barnave e cila pritet të hyjë në fuqi nesër (01.02.2025).

    OFK ka thënë se Ministria e Shëndetësisë nuk ka njoftuar barnatoret për mënyrën e zbatimit të këtij vendimi përkundër kërkesës nga ta për sqarime.

    “Ministria e Shëndetësisë edhe sot një ditë para implementimit të këtij vendimi, ende nuk ka njoftuar asnjë barnatore për mënyrën e zbatimit të këtij vendimi, duke bërë të pamundur implementimin e këtij procesi të përcaktimit të çmimit të barnave të kërkuar nga ana e farmacistëve tash e 20 vite”- thuhet në komunikatë.

    Oda e Farmacistëve të Kosovës ka kërkuar sqarime nga Ministria e Shëndetësisë në lidhje me “barnatoret të cilat nuk kanë deklaruar çmimin e produkteve apo mbi çfarë legjislacioni AKPPM do të bëjë shtypjen e banderolave të stokut aktual të barnatoreve dhe depove, dhe cilat dokumente duhet dorëzuar  nga barnatoret dhe se çfarë të veprohet me stokun aktual”.

    OFK ka ftuar Ministrinë e Shëndetësisë për zgjatjen e periudhës tranzitore për stokun farmaceutik.

    “OFK, fton Ministrin e Shëndetësisë të përmbahet nga veprimet të cilat mund të sjellin në ndërmarrjen e masave të padëshiruara nga ana e farmacistëve dhe barnatoreve për të cilat do të kenë përkrahjen e OFK-së në kundërshtim të paligjshmërisë së vendimet dhe dëmit që i shkaktohet me këtë vendim”-thuhet në komunikatën e Odës së Farmacistëve.

    Nga nesër, më 01.02.2025, në Kosovë do të hyjë në fuqi dhe do të nisë së zbatuari Lista e Çmimeve të Barnave në vend.

    Ministria e Shëndetësisë, më 23.12.2024, kishte publikuar Listën e Çmimeve të Barnave me detyrim të zbatimit në tregun e Kosovës, nga data 01.02.2025.

    Ministri i Shëndetësisë, Arben Vitia tha sot (31.01.2025) se pret një “tronditje të lehtë” të tregut, por që tha se janë të vendosur në zbatimin e Ligjit.

    Vitia përmendi se është një pjesë e kompanive, distributorëve dhe bartësve të Autorizim Marketingut të cilët nuk kanë paraqitur çmimet e barnave të tyre, për të cilët ministri tha se do të ketë sanksione.

    “Është interesant se ky shqetësim do të duhej të vinte nga Shoqata e Distributorëve më shumë sesa nga Oda e Farmacistëve. Po, është e vërtetë që një pjesë e kompanive, distributorëve, bartësve të Autorizimit të Marketingut nuk kanë aplikuar në Dritaren për aplikim për Çmimet e Barnave dhe natyrisht se do të merren masa adekuate sipas Ligjit në fuqi. Do të bëhen sanksione ndaj tyre, që nuk e kanë shfrytëzuar këtë të drejtë dhe hapjen e kësaj Dritareje. Por, në anën tjetër do të hapen Dritare të reja për të gjitha kompanitë, që të aplikojnë për Çmimet e Barnave të tyre” – tha ai.

    Kompanitë e distributorëve farmaceutikë ishin ankuar ndaj procesit të unifikimit të çmimit të barnave.

    Ata kishin thënë se me uljen – siç e quajnë ata – të tepërt të disa çmimeve, do ta kenë të vështirë të mbijetojnë në treg.

    Ismail Shurdhaj, kryetari i Shoqatës së Distributorëve Farmaceutikë të Kosovës, kishte renditur disa pasoja që ata parashohin nga mënyra se si po bëhet ky proces.

    Ndër to ishte rrezikimi i ekzistencës së veprimtarisë së tyre, duke rrezikuar kështu edhe furnizimin me barna për pacientët kosovarë dhe varfërim të tregut me produkte cilësore farmaceutike.

    Shurdhaj shtoi se shumica e distributorëve kanë nëpër depotë e tyre sasi barnash të cilat i kanë blerë me çmime më të larta, sesa ato që janë përcaktuar në listën e dytë nga Ministria e Shëndetësisë.

    Sipas tij, ky proces mund të sjellë edhe pasoja të tjera, siç janë: humbja e Kontratave me partnerët ndërkombëtarë të biznesit dhe humbja e stafit të Kompanisë.

    Ata e kishin cilësuar si të padrejtë edhe ndryshimin e Formularit për deklarim të çmimit, i cili më parë përfshinte: çmimin e importit CIP – përfshirë vlerën e marzhës së qarkullimit me shumicë dhe shpenzimeve të tjera vartëse, jo më shumë se 7.5%.

    https://kallxo.com/lajm/kompanite-e-distributoreve-farmaceutike-padisin-ministrine-e-shendetesise/

  • Hyrja në fuqi e Listës së Çmimeve të Barnave – Vitia thotë se janë të vendosur që ta zbatojnë këtë Ligj

    Nga nesër, më 01.02.2025, në Kosovë do të hyjë në fuqi dhe do të nisë së zbatuari Lista e Çmimeve të Barnave në vend.

    Ministria e Shëndetësisë, më 23.12.2024, kishte publikuar Listën e Çmimeve të Barnave me detyrim të zbatimit në tregun e Kosovës, nga data 01.02.2025.

    Ministri i Shëndetësisë, Arben Vitia tha se pret një “tronditje të lehtë” të tregut, por që tha se janë të vendosur në zbatimin e Ligjit.

    “E kuptoj që është sfidë dhe se në fillim do të ketë tronditje të lehtë të tregut, por ne jemi të vendosur që të zbatojmë këtë Ligj… muajt e parë pres tronditje të lehtë deri në stabilizimin e plotë.” – tha ai në Konferencë për media, pas mbledhjes së Qeverisë, më 31.01.2025.

    Vitia përmendi se është një pjesë e kompanive, distributorëve dhe bartësve të Autorizim Marketingut të cilët nuk kanë paraqitur çmimet e barnave të tyre, për të cilët Ministri tha se do të ketë sanksione.

    “Është interesant se ky shqetësim do të duhej të vinte nga Shoqata e Distributorëve më shumë sesa nga Oda e Farmacistëve. Po, është e vërtetë që një pjesë e kompanive, distributorëve, bartësve të Autorizimit të Marketingut nuk kanë aplikuar në Dritaren për aplikim për Çmimet e Barnave dhe natyrisht se do të merren masa adekuate sipas Ligjit në fuqi. Do të bëhen sanksione ndaj tyre, që nuk e kanë shfrytëzuar këtë të drejtë dhe hapjen e kësaj Dritareje. Por, në anën tjetër do të hapen Dritare të reja për të gjitha kompanitë, që të aplikojnë për Çmimet e Barnave të tyre.” – tha ai.

    Vitia u ka bërë thirrje për bashkëpunim të gjithë akterëve në këtë proces, ndërsa ka njoftuar se sot do të takohet me Inspektoratin Farmaceutik.

    Kompanitë e distributorëve farmaceutikë ishin ankuar ndaj procesit të unifikimit të çmimit të barnave.

    Ata kishin thënë se me uljen – siç e quajnë ata – të tepërt të disa çmimeve, do ta kenë të vështirë të mbijetojnë në treg.

    Ismail Shurdhaj, kryetari i Shoqatës së Distributorëve Farmaceutikë të Kosovës, kishte renditur disa pasoja që ata parashohin nga mënyra se si po bëhet ky proces.

    Ndër to ishte rrezikimi i ekzistencës së veprimtarisë së tyre, duke rrezikuar kështu edhe furnizimin me barna për pacientët kosovarë dhe varfërim të tregut me produkte cilësore farmaceutike.

    Shurdhaj shtoi se shumica e distributorëve kanë nëpër depotë e tyre sasi barnash të cilat i kanë blerë me çmime më të larta, sesa ato që janë përcaktuar në listën e dytë nga Ministria e Shëndetësisë.

    Sipas tij, ky proces mund të sjellë edhe pasoja të tjera, siç janë: humbja e Kontratave me partnerët ndërkombëtarë të biznesit dhe humbja e stafit të Kompanisë.

    Ata e kishin cilësuar si të padrejtë edhe ndryshimin e Formularit për deklarim të çmimit, i cili më parë përfshinte: çmimin e importit CIP – përfshirë vlerën e marzhës së qarkullimit me shumicë dhe shpenzimeve të tjera vartëse, jo më shumë se 7.5%.

    Pas anulimit të Listës së parë të Çmimeve të Barnave, Arben Vitia, ministri i Shëndetësisë, kishte vendosur që më 01.07.2024 ta korrigjojë Formularin, duke e lënë vetëm çmimin e importit CIP, i cili përfshin çmimin që këto Kompani paguajnë për t’i blerë produktet dhe për t’i transportuar deri në hyrjen e tyre në Kosovë, por jo më tutje.

     

    https://kallxo.com/lajm/kompanite-e-distributoreve-farmaceutike-padisin-ministrine-e-shendetesise/

    https://kallxo.com/lajm/shoqata-e-distributoreve-te-barnave-reagon-lidhur-me-unifikimin-e-cmimeve-vendimi-i-msh-se-rrezikon-tregun-e-barnave/

  • Lansohet Strategjia Sektoriale e Shëndetësisë 2025-2030

    Ministria e Shëndetësisë ka prezantuar Strategjinë Sektoriale të Shëndetësisë 2025-2030, e cila ishte miratuar nga Qeveria e Kosovës në nëntor të vitit 2024.

    Kreu i kësaj Ministrie Arben Vitia tha se përmes kësaj Strategjie synohet zhvillimi i vazhdueshëm i Sektorit të Shëndetësisë – duke theksuar Kujdesin Parësor Shëndetësor dhe efikasitetin e Spitaleve Rajonale.

    “Zbatimi i synimeve të kësaj Strategjie do të mundësojë kalimin e Sistemit në një zhvillim të vazhdueshëm. Rol kyç do të ketë mbështetja dhe zhvillimi i Kujdesit Parësor dhe investimi e rritja e efikasitetit të Spitaleve Rajonale. Si Ministër e kam për obligim që të siguroj që Shëndetësia të jetë prioritet në politikat tona. Sistemi shëndetësor që duam do të mundësohet në tërësi deri në 2030 – si parashihet në Strategji.” – tha Vitia gjatë prezantimit të kësaj Strategjie, më 30.01.2025.

    Sekretari i Ministrisë së Shëndetësisë, Naim Bardiqi, duke shpjeguar metodologjinë e ndjekur në hartimin e kësaj Strategjie tha se ajo do të luajë rol thelbësor në zhvillimin e Sektorit të Shëndetësisë.

    “Do të luajë rol thelbësor në zhvillimin e Sektorit të Shëndetësisë. Për të siguruar zbatimin e Strategjisë janë bërë edhe analizat për fondet, për periudhën e zbatimit të Strategjisë. Parashikimet financiare janë përgatitur duke marrë parasysh rreziqet dhe masat që mund të merren.” – tha ai.

    Strategjia Sektoriale e Shëndetësisë 2025-2030 ka dy objektiva strategjike: përmirësimin e cilësisë dhe qasjes në shërbime shëndetësore dhe ruajtjen e përparimin e shëndetit.

    Përmes kësaj Strategjie synohet që deri në vitin 2030 të rritet shfrytëzimi i shtretërve spitalorë, institucionet spitalore të kenë pajisje funksionale e të rritet qasja e qytetarëve në shërbimet shëndetësore.

    Ndër të tjera, në Strategji thuhet që deri në vitin 2030 të arrihet 100-përqindëshi i mbledhjes së kontributit për sigurim të detyrueshëm shëndetësor.

    Qytetarët kosovarë janë të vetmit në Ballkanin Perëndimor të cilët nuk kanë sigurime publike shëndetësore. Pavarësisht votimit të Projektligjit të ri për Sigurimin e Detyrueshëm të Kujdesit Shëndetësor nga Qeveria më 28.08.2024, funksionalizimi ende nuk është bërë.

    7% do të jetë shuma e të ardhurave që do të shkojnë për Fondin e Sigurimit Shëndetësor. Kjo vlerë do të ndahen mes punëmarrësit dhe punëdhënësit, me nga 3.5% secili.

    Kështu kishte njoftuar ministri i Shëndetësisë, Arben Vitia më 28.08.2024, pasi që Qeveria miratoi Projektligjin për Sigurimin e Detyrueshëm të Kujdesit Shëndetësor.

    “Kostoja shtesë për qytetarët do të jetë një mbledhje e kontributeve shtesë, në emër të solidaritetit, që të shtohet buxheti për Shëndetësi. 7% do të jenë të ardhurat të cilat do të arkëtohen në Fondin e Sigurimeve Shëndetësore, ku 3.5% do të jenë nga paga e qytetarëve dhe 3.5% nga punëdhënësi.” – deklaroi Vitia në një Konferencë për media.

    Në vitin 2007 ishte miratuar Ligji për Sigurimet Shëndetësore, por asnjëherë nuk hyri në fuqi, pasi Shefi i atëhershëm i Misionit të Kombeve të Bashkuara në Kosovë nuk e nënshkroi.

    Pas pavarësisë së Kosovës në vitin 2008, Qeveritë e Kosovës tërhoqën Ligjin, për shkak të implikimeve buxhetore.

    Ligji i ri për Sigurime Shëndetësore u miratua në vitin 2014, mirëpo as ai nuk u zbatua asnjëherë, pavarësisht premtimeve të të gjitha Qeverive.

    Zbatimit të tij u tha se do t’i paraprinte një periudhë prej gjashtë muajsh për mbledhjen e fondeve, e cila do të niste nga 1 korriku i vitit 2017.

    Funksionalizimi i Sigurimeve shëndetësore është premtim i dhënë e i paplotësuar, nga Qeveri të ndryshme për më shumë se një dekadë.

    Ministri Arben Vitia në fushatën zgjedhore të vitit 2019 kishte premtuar që Sigurimet shëndetësore do të funksionalizohen brenda katër vjetëve. Parakusht për funksionalizimin e tyre është zbatimi i Sistemit Informativ Shëndetësor (SISH), për të cilin Vitia pati thënë se merr optimalisht 2 vjet kohë.

    Të njëjtat fjalë Ministri i tha edhe më 26.04.2024. Atë ditë ai tha po ashtu se Projektligji do të procedohet në Kuvend, në fund të prillit ose në fillim të majit.

    Mosplotësimin e këtij premtimi që ai e pati dhënë në fushatën zgjedhore të vitit 2019, Arben Vitia e ka arsyetuar me pandeminë COVID-19, për të cilin tha se ka ndryshuar prioritetet.

    Sigurimi shëndetësor është sistem për financimin e shpenzimeve mjekësore me anë të kontributeve ose taksave të paguara në një fond të përbashkët, për të paguar të gjitha ose një pjesë të shërbimeve shëndetësore të përcaktuara me Ligj a politika të tjera.

    Premtime që nuk i përmbushën për sigurimet shëndetësore patën dhënë edhe tre ish-ministra të tjerë të Shëndetësisë: Imet Rrahmani, Alush Gashi dhe Ferid Agani.

    Ish-ministri i Shëndetësisë, Ferid Agani në vitin 2014 pati premtuar se në vitin 2015 do të fillojë mbledhja e premiumeve, të nevojshme për mbushjen e Fondit për Sigurimet shëndetësore. Ndërkaq, ish-ministri i Shëndetësisë, Imet Rrahmani pati thënë në korrik të vitit 2015 se po punojnë që sigurimet shëndetësore të bëhen në pjesën e dytë të 2016-tës.

    Edhe ish-kryeministri Isa Mustafa pati deklaruar se kanë përfunduar përgatitjet dhe nga 01.07.2017 do të fillojnë sigurimet shëndetësore.