Etiketë: Pagat

  • Bedri Hamza në Gjakovë: Nëse dikush e humb vendin e punës, do të marrë 80% të pagës për 6 muaj

    Kandidati i PDK-së për kryeministër, Bedri Hamza, më 31.01.2025 ka mbajtur tubim me qytetarë në Gjakovë.

    Hamza ka thënë se qytetarët kanë vendosur për një qeveri që investon në Gjakovë.

    Ai ka thënë se nëse dikush e humb vendin e punës, do të marrë 80% të pagës së fundit për 6 muaj.

    “Qëllimi jonë është që t’i mbrojmë të punësuarit, që të kenë paga të dinjitetshme, të jetojnë dinjitetshëm me familjet e tyre dhe t’ju garantojmë të drejtat përmes themelimit të Gjykatës së Punës dhe themelimit të Fondit për Papunësinë. Në rast se dikush e humb vendin e punës, atëherë do të marrë 80% të pagës së fundit për 6 muaj” – ka thënë Hamza.

    Ai tutje është zotuar për përfundimin e rrugës Dollc – Gjakovë dhe projekte tjera.

    “Në Rrafshin e Dukagjinit, në Gjakovë, do të ketë investime. Do të përfundohet shpejt kjo rrugë që s’po dihet kur do të mbarojë, Dollc-Gjakovë. Do të ndërtohen rrugë dhe do të lidhen qytetet me rrugë me katër korsi: Istog, Pejë, Deçan, Gjakovë, Prizren dhe shumë projekte të tjera transformuese për Gjakovën dhe gjithë Kosovën”- ka thënë Hamza.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

     

  • Ahmetaj (PDK): Buxheti për Shëndetësinë do të dyfishohet, paga e mjekut do të rritet për 50%

    Kandidatja për deputete e Partisë Demokratike të Kosovës (PDK), Mimoza Ahmetaj, në emisionin “Debat Përnime”, më 22.01.2025, ka deklaruar se një nga vendimet e para që do të bëjë PDK-ja – nëse vjen në pushtet – është rishikimi i buxhetit për Shëndetësinë, e më pas edhe dyfishimi i tij.

    Ajo u zotua se dyfishim të buxhetit do të ketë edhe për Listën e barnave esenciale.

    “Ne në start, me rishikimin e buxhetit për vitin 2025, menjëherë do ta rrisim buxhetin në mënyrë që sadopak të ndihmojmë qytetarët. Siç ka thënë kryeministri në ardhje, Bedri Hamza do ta dyfishojmë buxhetin për Shëndetësinë dhe do ta dyfishojmë buxhetin për Listën esenciale për barna.” – tha Ahmetaj.

    Në kuadër të kësaj, PDK ka paraparë edhe rritjen e pagave për mjekët për 50%.

    “Do të rrisim pagat për mjekët 50% në vitin e parë, në mënyrë që sadopak ta mundësojmë qëndrimin e tyre në Kosovë. Mos të jetë paga arsyeja, pse ata ikin nga vendi.” – tha Ahmetaj.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Në hapje të Debatit të parë zgjedhor, në kuadër të “Debat Përnime”, Jeta Xharra ka deklaruar se askush në KALLXO.com nuk është pasanik, milioner, e le më oligark.

    “Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka theksuar ndër të tjera, Xharra.

    E, për kandidatët e LVV-së që kanë refuzuar të marrin pjesë në Debat, ajo e ka dhënë “diagnozën”: Politikus Arrogantis Totalis Mendjemadhijensis!

    Për më shumë, lexoni në linkun në vijim:

    https://kallxo.com/gjate/planet-e-pdk-se-digjitalizim-e-rritje-pagash-ne-shendetesi-dhe-memorial-te-gjenocidit-ne-prishtine/

  • Bedri Hamza premton rritje 50 për qind e pagave për sektorin publik

    Kandidati i Partisë Demokratike të Kosovës për kryeministër, Bedri Hamza, ka prezantuar masat që do t’i marrë në kuadër të zotimit të dytë të tij.

    Ai ka thënë se në muajt e parë të qeverisjes, pagat në sektorin publik do të rriten për 50%. Kjo rritje, sipas tij, garanton paga të dinjitetshme për të gjithë shërbyesit civilë dhe është shpërblim i duhur për shërbimin e tyre ndaj shtetit dhe qytetarëve.

    Hamza tha se nuk do të tatohet asnjë pagë nën 400 euro.

    Në zotimin e dytë, ai ka premtuar rritje të pagave dhe pensioneve.

    “50% rritje të pagave në sektorin publik. 70% rritje të pensionit bazik. Rriten pensionet kontributdhënëse dhe përshkallëzohen sipas viteve të përvojës së punës. 50% rritje të përfitimeve për familjet e dëshmorëve, invalidët e luftës dhe veteranët”- ka thënë Hamza.

    Në një tjetër postim në Facebook, Hamza ka thënë se kostoja e jetesës është bërë e papërballueshme dhe se s’do të ketë tatime për pagat deri në 400 euro.

    “Kostoja e jetesës është bërë e papërballueshme dhe Kosovës i duhet një qasje e re për ta përmirësuar mirëqenien e qytetarëve”- shkruan ai në Facebook.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.