{"id":3210388,"date":"2025-01-30T16:42:33","date_gmt":"2025-01-30T15:42:33","guid":{"rendered":"https:\/\/kallxo.com\/?p=3210388"},"modified":"2025-01-30T16:42:33","modified_gmt":"2025-01-30T15:42:33","slug":"kmshc-e-kthen-ne-pune-nexhat-fazliun-i-cili-ishte-pezulluar-nga-inspektorati-i-punes-me-arsyetimin-se-ishte-nen-hetime","status":"publish","type":"post","link":"https:\/\/www.drakonispahiu.com\/?p=3210388","title":{"rendered":"KMSHC e kthen n\u00eb pun\u00eb Nexhat Fazliun, i cili ishte pezulluar nga Inspektorati i Pun\u00ebs me arsyetimin se ishte n\u00ebn hetime"},"content":{"rendered":"

Nexhat Fazliu, i cili ishte pezulluar nga puna si koordinator rajonal n\u00eb Mitrovic\u00eb i Inspektoratit Qendror t\u00eb Pun\u00ebs, me vendim t\u00eb K\u00ebshillit t\u00eb Pavarur Mbik\u00ebqyr\u00ebs t\u00eb Sh\u00ebrbimit Civil (KPMSHC) \u00ebsht\u00eb kthyer n\u00eb vendin e tij t\u00eb pun\u00ebs.<\/p>\n

Fazliu ishte pezulluar nga puna n\u00eb Inspektoratin e Pun\u00ebs, pasi sipas t\u00eb parit t\u00eb k\u00ebtij institucioni, Hekuran Nik\u00e7i, kishin pranuar nj\u00eb e-mail nga Prokuroria n\u00eb t\u00eb cilin thuhej se Fazliu \u00ebsht\u00eb n\u00ebn hetime nga Prokuroria.<\/p>\n

KALLXO.com m\u00eb 18.11.2024 kishte k\u00ebrkuar informacione nga Prokuroria e Mitrovic\u00ebs p\u00ebr t\u00eb konfirmuar n\u00ebs\u00eb ndaj Nexhat Fazliut ka aktvendim p\u00ebr fillim t\u00eb hetimeve.<\/p>\n

“Referuar pyetjeve tuaja, njoftoheni se p\u00ebr personin N.F, n\u00eb nj\u00eb (1) rast ka aktvendim mbi fillimin e hetimeve p\u00ebr shkak t\u00eb veprave penale \u201cKeqp\u00ebrdorimi i pozit\u00ebs apo autoritetit zyrtar\u201d dhe \u201cRastet e posa\u00e7me te falsifikimit te dokumenteve\u201d. Nd\u00ebrsa nj\u00eb (1) rast tjet\u00ebr \u00ebsht\u00eb n\u00eb proces, p\u00ebr vepr\u00ebn penale \u201cMarrja apo asgj\u00ebsimi i vulave zyrtare ose i shkresave zyrtare\u201d- ishte p\u00ebrgjigjur Prokuroria e Mitrovic\u00ebs m\u00eb 11.22.2024<\/p>\n

K\u00ebt\u00eb vendim e ka marr\u00eb KPMSHC m\u00eb 29.01.2025, duke e anuluar vendimin e Inspektoratit Qendror t\u00eb Pun\u00ebs q\u00eb e kishte pezulluar nga puna Nexhat Fazliun.<\/p>\n

\u201cAprovohet si e bazuar ankesa e dat\u00ebs 21.11.2024, e parashtruar nga ankuesi Nexhat Fazliu. Shfuqizohet Vendimi p\u00ebr pezullim nga marr\u00ebdh\u00ebnia e pun\u00ebs i dat\u00ebs 13.11.2024. Obligohet Udh\u00ebheq\u00ebsi i Nj\u00ebsis\u00eb p\u00ebr Menaxhimin e Burimeve Njer\u00ebzore n\u00eb Inspektoratin e Pun\u00ebs t\u00eb zbatoj\u00eb Vendimin brenda 15 dit\u00ebsh nga dita e pranimit t\u00eb tij – duke e kthyer ankuesin n\u00eb vendin e pun\u00ebs.\u201d – thuhet n\u00eb Vendimin e KPMSHC-s\u00eb.<\/p>\n

\"\"<\/a><\/p>\n

KPMSHC ka konstatuar se pasi kishte pranuar ankes\u00ebn nga Fazliu i ishte drejtuar institucionit t\u00eb Inspektoratit t\u00eb Pun\u00ebs – duke i k\u00ebrkuar p\u00ebrgjigje n\u00eb ankes\u00eb.<\/p>\n

Inspektorati i Pun\u00ebs e kishte d\u00ebrguar p\u00ebrgjigjen m\u00eb 17.12.2024, dhe KPMSHC kishte konstatuar se kan\u00eb munguar prova ky\u00e7e n\u00eb vendimin p\u00ebr pezullimin e Fazliut.<\/p>\n

KPMSHC m\u00eb 14.01.2025 i ishte drejtuar me e-mail Inspektoratit t\u00eb Pun\u00ebs, p\u00ebr t’i k\u00ebrkuar provat q\u00eb mungojn\u00eb mbi baz\u00ebn e t\u00eb cilave ishte nxjerr\u00eb vendimi p\u00ebr pezullim.<\/p>\n

Pra, kolegji i KPMSHC-s\u00eb pas pranimit t\u00eb p\u00ebrgjigjes nga Inspektorati i Pun\u00ebs ka konstatuar, se bazuar n\u00eb shkresat e l\u00ebnd\u00ebs q\u00eb ishin d\u00ebrguar nga organi q\u00eb kishte marr\u00eb vendimin p\u00ebr pezullim kishin munguar provat ky\u00e7e p\u00ebr nxjerrjen e nj\u00eb vendimi t\u00eb till\u00eb.<\/p>\n

KALLXO.com i ka shkruar Nexhat Fazliut m\u00eb 30.01.2025 p\u00ebr t\u00eb marr\u00eb nj\u00eb koment lidhur me vendimin e fundit, q\u00eb ai t\u00eb kthehet n\u00eb vendin e tij t\u00eb pun\u00ebs dhe n\u00eb pozit\u00ebn q\u00eb mbante para se Inspektorati Qendror i Pun\u00ebs t\u00eb merrte vendimin p\u00ebr pezullim. Fazliu nuk ka komentuar vendimin e fundit p\u00ebr k\u00ebt\u00eb rast.<\/p>\n

P\u00ebr KALLXO.com, Kryeinspektori i Pun\u00ebs, Hekuran Nik\u00e7i, m\u00eb 15.11.2024 kishte th\u00ebn\u00eb<\/a> se lidhur me pun\u00ebn e Fazliut kishte pranuar me dhjet\u00ebra ankesa, por q\u00eb Fazliu k\u00ebto pretendime t\u00eb Kryeinspektorit i kishte quajtur t\u00eb fabrikuara. Madje, nj\u00ebra prej procedurave disiplinore q\u00eb ishte hapur ndaj tij, sipas t\u00eb pezulluarit ka pasur t\u00eb b\u00ebj\u00eb pik\u00ebrisht me k\u00ebt\u00eb \u00e7\u00ebshtje, por q\u00eb ka p\u00ebrfunduar n\u00eb favor t\u00eb tij.<\/p>\n

N\u00eb an\u00ebn tjet\u00ebr, KALLXO.com kishte intervistuar<\/a> edhe kryeinspektorin Hekuran Nik\u00e7i lidhur me pretendimet q\u00eb i kishte i pezulluari nga puna.<\/p>\n

Fazliu ishte pezulluar nga puna me vendimin e dat\u00ebs 13.11.2024 dhe paga do t\u2019i kompensohej me 50% t\u00eb pages\u00ebs deri n\u00eb p\u00ebrfundimin e periudh\u00ebs s\u00eb pezullimit.<\/p>\n

Nik\u00e7i p\u00ebr KALLXO.com m\u00eb 15.11.2024<\/a> kishte treguar pse \u00ebsht\u00eb pezulluar nga puna Nexhat Fazliu.<\/p>\n

\u201cInspektorati i Pun\u00ebs ka pranuar e-mail nga Prokuroria e Mitrovic\u00ebs, e cila e potencon qart\u00eb q\u00eb zyrtari n\u00eb fjal\u00eb \u00ebsht\u00eb duke u hetuar p\u00ebr vepra penale.\u201d – kishte th\u00ebn\u00eb Nik\u00e7i<\/a>.<\/p>\n

Nexhat Fazliu kishte th\u00ebn\u00eb se ka pasur presion nga kryeinspektori i Inspektoratit t\u00eb Pun\u00ebs, Hekuran Nik\u00e7i.<\/p>\n

Sipas Fazliut presioni nga Nik\u00e7i ka ardhur p\u00ebr shkak t\u00eb bashk\u00ebpunimit t\u00eb tij (Nexhat Fazliut) me Prokurorin\u00eb – lidhur me rastin e Millan Radoi\u00e7iqit p\u00ebr sekuestrimin dhe konfiskimin e pasuris\u00eb.<\/p>\n

\u201cP\u00ebr presione se kam bashk\u00ebpunuar me Prokurorin\u00eb – lidhur me rastin e Radoi\u00e7iqit – q\u00eb \u00ebsht\u00eb hetu p\u00ebr prejardhjen e pasuris\u00eb dhe konfiskimin e pasuris\u00eb.\u201d – kishte th\u00ebn\u00eb Fazliu, p\u00ebr KALLXO.com.<\/p>\n

Sipas tij aryseja p\u00ebr pezullim nga puna ishte p\u00ebr shkak t\u00eb nj\u00eb e-mail-i, q\u00eb ka ardhur nga Prokuroria gjoja se ai ishte i dyshuar se ka kryer vepra penale.<\/p>\n

Fazliu ka th\u00ebn\u00eb se pezullimi ka ndodhur pas nj\u00eb e-mail-i q\u00eb Prokuroria ia kishte d\u00ebrguar Kryeinspektorit se Fazliu \u00ebsht\u00eb n\u00ebn hetime, ndon\u00ebse sipas tij e-mail-i nuk ka ndonj\u00eb sqarim se p\u00ebr \u00e7far\u00eb vepre, por vet\u00ebm thuhet se kan\u00eb nisur hetimet ndaj tij.<\/p>\n

Fazliu kishte th\u00ebn\u00eb<\/a> se vendimi p\u00ebr pezullim nuk \u00ebsht\u00eb nxjerr\u00eb nga udh\u00ebheq\u00ebsi i menaxherit t\u00eb personelit, por Kryeinspektori e kishte em\u00ebruar \u201cnj\u00eb person paralel\u201d me menaxherin e personelit, q\u00eb t\u00eb nxjerr\u00eb k\u00ebt\u00eb vendim.<\/p>\n