Etiketë: gjermania

  • Scholz kritikon komentet “çoroditëse” të Muskut

    Kancelari gjerman, Olaf Scholz, i ka dënuar komentet “çoroditëse” të miliarderit Elon Musk, dhe mbështetjen e tij të hapur për partinë gjermane të ekstremit të djathtë, Alternativa për Gjermaninë (AFD).

    Musk, burri më i pasur në botë – që ka mes tjerash në pronësi edhe platformën X, të njohur më parë si Twitter – i ka sulmuar liderët evropianë përmes një serie postimesh në rrjetin social që kontrollon.

    I pyetur për ndërhyrjen e Muskut – i cili e ka quajtur Scholzin ‘budalla jokompetent’, ndërsa presidentin gjerman ‘tiran kundër demokracisë’ – kancelari gjerman ka thënë në fundjavë për revistën Stern se është e rëndësishme të ruhet qetësia para zgjedhjeve të parakohshme, që do të mbahen në Gjermani më 23 shkurt.

    “Në Gjermani, gjithçka po zhvillohet sipas dëshirave të qytetarëve tanë, dhe jo komenteve çoroditëse të një miliarderi amerikan”, ka thënë Scholz përgjatë intervistës.

    “Presidenti gjerman nuk është një tiran kundër demokracisë, dhe Gjermania është demokraci e fortë dhe stabile, pavarësisht se çfarë thotë Musku”.

    Scholz ka thënë se mbështetja e Muskut për AfD-në e ekstremit të djathtë është “shumë më problematike sesa këto ofendime”.

    Alternativa për Gjermaninë, që është duke dalë e dyta, pas konservatorëve, sipas sondazheve, “bën thirrje për lidhje më të ngushta me Rusinë dhe dëshiron dobësim të lidhjeve transatlantike”, ka thënë Scholz.

    AfD e ka pranuar këtë javë se është në kontakt të rregullt me Elon Muskun.

    Kancelari gjerman ka thënë se është takuar me Muskun në mars të vitit 2022, në hapjen e fabrikës së makinave Tesla në qytetin e Brandenburgut, “në kohën kur dega lokale e AfD-së protestonte kundër tij”.

    Gjermania nuk është shënjestra e vetme e Muskut në Evropë, kontinentin ku shumë qeveri veçse janë duke u përballur me rritje të popullzimit dhe të djathtës ekstreme.

    Këtë javë, Musk ka bërë thirrje për rrëzim të kryeministrit britanik, Keir Starmer nga pushteti.

    Ai ka diskutuar në dhjetor me kryeministrin hungarez, Viktor Orban dhe e ka quajtur Bashkimin Evropian si jodemokratik.

    Ai është mbështetës entuziast i kryeministres Giorgia Meloni, e cila njihet si liderja me qasjet më të djathta prej vitit 1945 në Itali.

    Ekspertët besojnë se iniciativat politike të Muskut janë krejtësisht të lidhura me interesat e tij politike./REL

  • Edhe pas 23 vjetëve të euros, gjermanët ende këmbejnë marka

    Edhe pas gati një gjysmë shekulli të prezantimit të valutës euro, gjermanët vazhdojnë të këmbejnë shuma të mëdha të parave të ish-valutës së tyre, markës, tregojnë të dhënat zyrtare.

    Sipas Bankës Qendrore të Gjermanisë, Bundesbank, rreth 53 milionë marka gjermane [rreth 27.2 milionë euro] janë këmbyer më 2024.

    Gjermania është një prej gjashtë shteteve – bashkë me Austrinë, Irlandën, Estoninë, Letoninë dhe Lituaninë – që u mundësojnë qytetarëve që valutat e mëparshme t’i këmbëjnë me euro.

    Valuta euro ka hyrë në fuqi zyrtarisht më 1 janar të vitit 2002 dhe 20 vende të Bashkimit Evropian kanë nisur ta përdorin.

    Kosova e përdor gjithashtu euron, ndonëse nuk është pjesë e Bashkimit Evropian.

    Ky vend ka aplikuar për anëtarësim në bllokun evropian më 2022, por aplikimi i saj nuk është shqyrtuar ende.

    Ndonëse kanë kaluar më shumë se 20 vjet, Bundesbank vlerëson se marka në vlerë të mbi 6 miliardë eurove kanë mbetur pa u këmbyer.

    Megjithatë, një pjesë e tyre është thënë se mund të mos këmbehen kurrë pasi janë në duart e koleksionistëve nëpër botë.

    “Marka gjermane është njohur ndërkombëtarisht si valutë, dhe është përdorur edhe jashtë Gjermanisë”, ka thënë anëtari i Bankës Qendrore Gjermane, Burkhard Balz, për agjencinë e lajmeve dpa.

    “Me siguri nëpër botë ekzistojnë sasi të mëdha të parave të gatshme në marka gjermane”, ka shtuar ai./ REL

  • Kryediplomatët e Gjermanisë dhe Francës vizitojnë Damaskun

    Ministrat e Jashtëm të Gjermanisë dhe Francës thanë se duan të krijojnë raporte të reja me Sirinë dhe bënë thirrje për tranzcion paqësor, teksa gjatë vizitës në Damask u takuan me liderin e ri de facto Ahmed al-Sharaa, në emër të Bashkimit Evropian.

    Kryediplomatja gjermane, Annalena Baerbock dhe ministri i Jashtëm francez, Jean-Noel Barrot janë ministrat e parë nga BE-ja që vizitojnë Sirinë, pasi rebelët morën kontrollin e Damaskut më 8 dhjetor dhe detyruan presidentin Bashar al-Assad të ikte për në Rusi pas më shumë se 13 vjetësh luftë civile – duke i dhënë fund sundimit dekadësh të familjes së tij.

    “Vizita ime sot… është mesazh i qartë për sirianët: se është i mundur një fillim i ri politik mes Evropës dhe Sirisë, mes Gjermanisë dhe Sirisë.” – tha Baerbock, para se të largohej nga Damasku.

    Barrot tha se shpreson për “për një Siri sovrane, të qëndrueshme dhe paqësore”. Ai në Damask, po ashtu, vizitoi Ambasadën franceze, e cila është e mbyllur që nga viti 2012.

    Që nga rrëzimi nga pushteti i Assadit, rebelët islamistë të udhëhequr nga Sharaa’s Hayat Tahrir al-Sham (HTS) – grup i shpallur organizatë terroriste nga Shtetet e Bashkuara – kanë kërkuar që të sigurojnë shtetet arabe dhe komunitetin ndërkombëtar se ata do të qeverisin në emër të të gjithë sirianëve.

    Qeveritë perëndimore kanë nisur gradualisht të hapin kanalet e komunikimit me Sharaa dhe HTS dhe po nisin debatin nëse duhet ta largojnë këtë grup nga lista e organizatave terroriste.

    Para vizitës në Siri, Baerbock tha se nga kjo vizitë kishte “pritje të qarta” nga sundimtarët e rinj, të cilët – sipas saj – do të gjykohen për veprimet e tyre.

    Qëllimi për Sirinë është që ky shtet të bëhet sërish një anëtar i respektuar i komunitetit ndërkombëtar – tha kryediplomatja gjermane.

    Ndërkaq, Barrot e cila u takua me patriarkun e Kishës Ortodokse Greke tha se Franca është e përkushtuar për një Siri, ku do të mbroheshin të drejtat e të gjithëve.

    Ai, po ashtu, qëndroi në ndërtesën e mbyllur të Ambasadës në Damask dhe tha se Parisi po punon drejt rivendosjes së pranisë diplomatike./REL.