Etiketë: pdk

  • Hamza takohet më gratë e Krushës: Do ta zgjerojmë përkrahjen përmes subvencioneve

    Kandidati i PDK-së për kryeministër, Bedri Hamza, më 13.01.2025 është takuar me gratë e Krushës së Madhe, për të cilat ka thënë se ato janë simbol i guximit, punës dhe këmbënguljes.

    Sipas Hamzës, nga kultivimi i produkteve bujqësore që e filluan për mbijetesë, ato arritën të ndërtojnë një biznes shumë të suksesshëm.

    Ai është zotuar se do të zgjerojnë përkrahjen përmes subvencioneve dhe granteve investive për prodhimtarinë bujqësore.

    “Ne do ta zgjerojmë përkrahjen përmes subvencioneve dhe granteve investive për prodhimtarinë bujqësore, përpunimin, përmirësimin e teknologjisë dhe do të ndërtojmë qendra grumbulluese për ruajtjen, klasifikimin dhe shitjen e prodhimeve bujqësore. Edhe sigurimi i kulturave bujqësore është i domosdoshëm dhe do ta bëjmë! Puna e Fahrijes dhe e grave të Krushës nuk është thjesht një punë e zakonshme, por frymëzim për të gjithë ne”- ka shkruar ai në Facebook.

    Po ashtu, Hamza, në ditën e tretë të fushatës një mujore ka prezantuar projektet e tij në kuadër të Zotimit të Parë, nga gjithsej pesë zotimet e tij kryesore që i ka përmendur më herët.

    Zotimi i parë i Hamzës për qytetarët është më shumë zhvillim, më pak tatime.

    “Grante për bizneset për mbulimin e investimeve deri në 30%, zero tatim në fitim për bizneset që investojnë mbi 500 mijë euro ose punësojnë mbi 50 punëtorë, ndryshimi i Ligjit për Tatimin në Pronë, krijimi i Fondit për mbështetje gjatë papunësisë, ku 80% e pagës së fundit do u mbulohet atyre që i humbin vendet e punës deri në 6 muaj, si dhe eliminimi i tarifës doganore për veturat e reja elektrike”-është shprehur ai.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • PDK premton lehtësira fiskale, ulje të tatimit në pronë dhe ndërtim të Unazës së Jashtme të Kryeqytetit

    Një prej projekteve më madhore që Partia Demokratike e Kosovës e ka paraparë për Kryeqytetin është “Unaza e Jashtme e Prishtinës”.

    Sipas planifikimeve të kësaj partie, ky projekt pritet të kushtojë 400 milionë euro.

    Projekt tjetër, që PDK e sheh me interes për qytetarët e Prishtinës, sipas kandidatit për deputet të kësaj partie, Leutrim Retkoceri, do të jetë edhe subvencionimi i fëmijëve të cilët nuk mund të regjistrohen në Çerdhet publike.

    “Të gjithë fëmijët që nuk mund të regjistrohen në Çerdhet publike do të subvencionohen me nga 100 euro.” – theksoi Retkoceri.

    Kandidati i PDK-së për deputet, Leutrim Retkoceri. Foto: Naser Fejza/KALLXO.com

    Retkoceri premtoi edhe legalizimin e ndërtimeve dhe uljen e tatimit në pronë në rajonin e Prishtinës.

    Premtime për shumë projekte për rajonin e Prishtinës dha edhe ish-drejtori i Shërbimeve Publike në Komunën e Prishtinës, Ilirik Musliu, i cili tani po kandidon për deputet të Kosovës.

    Musliu përmendi disa lehtësime fiskale, që do të bëhen për sektorin privat në aspektin ekonomik.

    “Stimujt fiskalë janë shumë të rëndësishme për sektorin privat, për faktin që kemi me ba ndryshimin e pagesës së TVSH-së.” – ka thënë Musliu.

    Lirim nga tatimi në fitim për një periudhë të caktuar për biznese që punësojnë mbi 50 punëtorë apo që kanë qarkullim mbi 500 mijë euro është premtimi i radhës i PDK-së i prezantuar nga kandidati Musliu.

    Në Programin e PDK-së, 100 milionë euro janë paraparë për ndërtimin dhe modernizmin e hekurudhës Prishtinë-Fushë Kosovë.

    Kandidati i PDK-së për deputet, Ilirik Musliu. Foto: Naser Fejza/KALLXO.com

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

    Për më shumë, lexoni në linkun në vijim:

    https://kallxo.com/gjate/premtimet-e-pdk-se-per-reforma-ne-drejtesi-dhe-per-investime-ne-rajonin-e-prishtines/

  • PDK zotohet për krijimin e një Strategjie Kombëtare për Trajtimin e Krimeve të Luftës

    Partia Demokratike e Kosovës (PDK) zotohet se – nëse e merr mandatin për të qeverisur vendin – do të ndërtojë një Strategji Kombëtare për Trajtimin e Krimeve të Luftës.

    Përparim Gruda, kandidat për deputet nga radhët e PDK-së ka shpjeguar në “Debat Përnime”, më 13.01.2025, se si është menduar të realizohet kjo Strategji – për sa kohë që ka folur edhe për Institutin aktual që trajton këto raste.

    “Ne mendojmë që këtë Institut ta shndërrojmë në Qendër kërkimore dhe shkencore, siç është Instituti Albanologjik.” – ka theksuar Gruda.

    Gjithashtu, Gruda tha se do të shtohet numri i prokurorëve dhe bashkëpunëtorëve profesionalë të prokurorëve, të cilët do t’i trajtojnë këto raste.

    Ai u zotua se me “qeverisjen e PDK-së”, ky institucion do të ketë pavarësi buxhetore.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

    Për më shumë, lexoni në linkun në vijim:

    https://kallxo.com/gjate/premtimet-e-pdk-se-per-reforma-ne-drejtesi-dhe-per-investime-ne-rajonin-e-prishtines/