Etiketë: dhunë në familje

  • Raportohen 6 raste të dhunës në familje në Kosovë në 24 orët e fundit

    Policia e Kosovës ka njoftuar se në 24 orët e fundit, më 21.01.2025, ka pranuar 6 raportime për raste të dhunës në familje.

    Sipas njoftimit, në Prishtinë një grua ka raportuar se kishte mosmarrëveshje me një person me të cilin kishte jetuar disa vite me të dhe kishte vendosur që të ndahet e të jetojë me djalin e saj.

    Sipas Policisë, i dyshuari e kishte kërcënuar përmes telefonit dhe i ka shkuar në vendin e saj të punës – duke e penguar. Pas intervistimit, me vendim të Prokurorit, rasti ka shkuar në procedurë të rregullt.

    Në një rast në Graçanicë dyshohet se djali nën ndikim të alkoolit dhe me probleme psikike e kishte sulmuar dhe e kishte ofenduar nënën e tij. I njëjti është arrestuar dhe është dërguar në mbajtje.

    Në një rast tjetër në Prishtinë, një person dyshohet se, më 19.01.2025, ka ushtruar dhunë fizike ndaj gruas së tij – duke e larguar atë nga shtëpia bashkë me fëmijët. I dyshuari, po ashtu, dyshohet se posedonte një armë. Policia gjatë kontrollit ka konfiskuar armën, ndërsa viktima ka kërkuar urdhër mbrojtje. Me vendim të Prokurorit, i dyshuari është vendosur në stop listë, ndërsa rasti vazhdon të jetë nën hetime.

    Në Gjakovë një person është arrestuar më 21.01.2025, pasi që dyshohet se kishte sulmuar fizikisht një grua – duke i shkaktuar lëndime trupore. Viktima ka refuzuar tretmanin mjekësor, ndërsa me vendim të Prokurorit i dyshuari është dërguar në mbajtje.

    Në një tjetër rast të raportuar në Gjakovë dyshohet se, më 21.01.2025, një person nën ndikim të alkoolit ka sulmuar fizikisht gruan e tij. Viktima nuk ka pranuar tretman mjekësor, ndërsa i dyshuari është dërguar në mbajtje.

    Në Skenderaj, Policia ka bërë të ditur se, më 20.01.2025, ka arrestuar një person, pasi që pas një mosmarrëveshje dyshohet se ka sulmuar fizikisht gruan e tij. I dyshuari me vendim të Prokurorit është dërguar në mbajtje.

    Kurse, në një rast tjetër në Zveçan, Policia ka bërë të ditur se, më 21.01.2025, është vetëdorëzuar në Stacionin Policor një person i dyshuar për “dhunë në familje” dhe “armëmbajtje pa leje”, që nga data 11.02.2024. Me vendim të Prokurorit, pas intervistimit i dyshuari është liruar në procedurë të rregullt.

     

  • Dy të arrestuar e një në kërkim për dhunë në familje

    Katër raste të dhunës në familje janë raportuar në 24 orët e fundit, teksa dy persona janë arrestuar dhe një tjetër është në kërkim nga Policia.

    Rastet e dhunës janë raportuar, më 20.01.2025, në Prishtinë, Malishevë, Pejë dhe Rahovec.

    Në Kryeqytet raportohet se pas një mosmarrëveshjeje dy të dyshuar: një femër dhe mashkull e kanë sulmuar fizikisht një mashkull tjetër.

    “Lidhur me rastin e dyshuara është arrestuar dhe dërguar në mbajtje, ndërsa i dyshuari ndodhet në kërkim policor.” – njoftoi Policia.

    Kurse në Pejë, një femër është sulmuar fizikisht nga një mashkull, teksa viktima ka pranuar tretman mjekësor. Policia bëri të ditur se rasti është në procedurë hetimore.

    Ndërkaq, në Malishevë personi i arrestuar pas intervistimit, me vendim të Prokurorit, u lirua me procedurë të rregullt. Sipas Policisë, i njëjti dyshohet se e ka sulmuar fizikisht një femër.

    Në Rahovec, personi i arrestuar për “dhunë në familje”, me vendim të Prokurorit, është dërguar në mbajtje.

  • Dy të arrestuar për dhunë në familje, njërit Policia i gjeti edhe armë zjarri

    Dy persona janë arrestuar, për shkak të dyshimit për dhunë  në familje, teksa rastet janë regjistruar në Podujevë dhe Pejë.

    Sipas Policisë, një person në Podujevë është arrestuar pasi i njëjti dyshohet se ka ushtruar dhunë psikike ndaj viktimës grua. Pas bastisjes, të njëjtit Policia i ka gjetur edhe një armë zjarri.

    “Lidhur me rastin në koordinim me Prokurorin është bastisur shtëpia e të dyshuarit, me ç’rast është gjetur dhe konfiskuar: 1 armë zjarri me një karikator dhe 82 fishekë. Pas intervistimit, me vendim të Prokurorit, i dyshuari është dërguar në mbajtje.” – bëri të ditur Policia.

    Kurse në Pejë, dyshohet se personi i arrestuar në gjendje të dehur e ka sulmuar fizikisht një grua.

    “Si pasojë e sulmit viktima ka pësuar lëndime të lehta trupore për çka dhe i është ofruar tretmani mjekësor. I dyshuari, me vendim të Prokurorit, është dërguar në mbajtje.” – njoftoi Policia.