Etiketë: Albin Kurti

  • Kosova nënshkruan Marrëveshje për Tregti të Lirë me EFTA-n 

    Kosova ka nënshkruar Marrëveshje për Tregti të Lirë me shtetet e Asociacionit Evropian për Tregti të Lirë (EFTA), ku bëjnë pjesë Islanda, Lihtenshtajni, Norvegjia dhe Zvicra.

    Në ceremoninë e nënshkrimit në Davos të Zvicrës, anëtarët e EFTA-s dhe kryeministri i Kosovës, Albin Kurti, thanë se kjo marrëveshje do të sjellë përfitime të dyanshme.

    Marrëveshja ofron mundësi të shumta, përfshirë për importimin dhe eksportimin e mallrave. Produktet me origjinë nga Kosova do të mund të eksprotohen në vendet e EFTA-s dhe kompanitë vendore nuk do të kenë nevojë që të paguajnë tarifë doganore për to.

    Deri më tani, prodhuesit vendorë janë detyruar që të paguajë deri në 10 për qind tarifë shtesë doganore.

    Marrëveshja u arrit pas më shumë se dy vjetësh negociata dhe sipas kryesueses së EFTA-s, Cecilie Myrseth, Kosova është vendi i parë në rajonin e Ballkanit Perëndimor që në këtë marrëveshje, me kërkesë të saj, ka përfshirë edhe shërbimet.

    Kryeministri i Kosovës, Albin Kurti, tha se me këtë marrëveshje hapet kapitulli i përforcimit i raporteve ekonomike, por edhe i avancimit të raporteve tregtare mes shtetit të tij dhe anëtarëve të EFTA-s.

    “Marrëveshja që nënshkruajmë sot themelon një kornizë për marrëdhënie tregtare midis shteteve të EFTA-s dhe Kosovës si dhe do të krijojë mundësi të reja duke i dhënë Kosovës qasje në tregjet e EFTA-s. Këtu hapen mundësi të reja eksporti për bizneset tona dhe integrim më i thellë në kornizën ekonomike evropiane, duke na mundësuar që të garojmë në një shkallë të gjerë”, tha Kurti gjatë ceremonisë së nënshkrimit.

    Kryeministri kosovar tha se është i bindur se kjo marrëveshje do të sjellë përfitime për bizneset, industritë dhe qytetarët.

    Kryesuesja e EFTA-s, Cecilie Myrseth, tha se kjo marrëveshje është arritje e madhe për integrimin e Kosovës në sistemin global.

    “Jam e bindur se kjo do të shtyjë përpara rritjen ekonomike, duke krijuar mundësi për bizneset e reja dhe qytetarët në të dyja palët”, tha ajo.

    Vitin e kaluar, Kosova ka shënuar rritje ekonomike prej rreth 4 për qind dhe rënie të inflacionit. Por, shteti përballet me nivel të lartë të importit, krahasuar me atë të eksportit.

    Myrseth nga EFTA tha se viteve të fundit, tregtia mes shteteve të EFTA-s është rritur shumë dhe ka arritur në mbi 176 milionë euro.

    “Me lidhjen e Marrëveshjes për Tregti të Lirë mund të presim që tregtia të rritet edhe më shumë”, theksoi ajo.

    EFTA tha se përveç shërbimeve financiare janë përfshirë edhe të drejtat e pronësisë intelektuale.

    Kosova tha se me marrëveshja të tilla synon të tërheqë investitorët e huaj që të investojnë në vend.

    EFTA është krijuar më 1960 me synimin që të promovojë tregtinë e lirë.

    Marrëveshje për Tregti të Lirë Kosova ka nënshkruar edhe me vendet e Evropës Qendrore (CEFTA). Kjo marrëveshje, ku bëjnë pjesë shtetet e Ballkanit Perëndimor dhe Moldavia, synon rritjen e tregtisë së mallrave dhe shërbimeve, eliminimin e barrierave tregtare mes palëve dhe tërheqjen e investimeve./REL

  • Kurti takohet me Ministrin e Jashtëm të Norvegjisë – flitet për sigurinë e anëtarësimin në NATO

    Kryeministri kosovar, Albin Kurti u takua me ministrin e Punëve të Jashtme të Norvegjisë, Espen Barth Eide në Davos të Zvicrës.

    Ky takim u zhvillua në kuadër të Forumit Ekonomik Botëror që mbahet në Davos, nga 20 deri më 24.01.2025.

    “Sot do ta kemi nënshkrimin e Marrëveshjes për EFTA, e cila është një arritje e madhe. Ne kemi patur rritje të konsiderueshme në katër vjetët e fundit, 6% të BPV-së mesatarisht – duke mos shkuar asnjëherë poshtë 4%. Ne duam të vazhdojmë të rritemi, por eksportet janë shumë të rëndësishme. E, eksporti i të mirave dhe shërbimeve është i përfshirë tashmë në EFTA.” – citohet të ketë thënë Kryeministri në fillim të takimit.

    Sipas komunikatës për media të Zyrës së Kryeministrit, Kurti ka falënderuar Norvegjinë për mbështetjen ndaj Kosovës, me theks të veçantë në anëtarësimin në Organizata Ndërkombëtare dhe rrugëtimin drejt integrimit në BE.

    Në komunikatë thuhet se u bisedua rreth sfidave të përbashkëta të sigurisë dhe adresimit të tyre.

    Kurti ka folur për rëndësinë e anëtarësimit në NATO. Kjo krahas rreshtimit të Kosovës përkrah shteteve të BE-së dhe NATO-s në dënimin e agresionit rus në Ukrainë dhe mbështetjes së sanksioneve ndaj Rusisë.

    Kryeministri i Kosovës, Albin Kurti së bashku me dy ministret: atë të Industrisë, Ndërmarrësisë dhe Tregtisë, Rozeta Hajdari dhe të Ekonomisë, Artane Rizvanolli po marrin pjesë në Forumin Ekonomik Botëror në Davos.

    Shoqata Evropiane e Tregtisë së Lirë (EFTA) është një organizatë ndërkombëtare që promovon tregtinë e lirë dhe bashkëpunimin ekonomik ndërmjet shteteve të saj. EFTA ka si qëllim heqjen e barrierave tregtare dhe lehtësimin e fluksit të mallrave dhe shërbimeve midis vendeve anëtare. Organizata është e ndryshme nga Bashkimi Evropian (BE), megjithatë ajo bashkëpunon ngushtësisht me BE-në përmes Marrëveshjeve të ndryshme.

    Prej 20 deri më 24 janar 2024, derisa Konferenca e Davosit mbledh lojtarët kryesorë ekonomikë dhe përfaqësuesit qeveritarë, Kosova ka hapur hapësirën e saj “House of Kosovo”, kryesisht fal dy zhvilluesve të suksesshëm të patundshmërive, Esat Lika nga fshati Carrabreg në Kosovë dhe Ertion Axha nga Durrësi në Shqipëri.

    Këta dy merren me biznesin e patundshmërive dhe ia kanë dalë të sigurojnë një shesh prej 11.500 metrash katrorë të një ish-Sanatoriumi, që ndodhet rreth 800 metra larg prej Sallës së Kongresit të FEK-ut, me synim ta kthejë në një resort luksoz.

    https://kallxo.com/lajm/kurti-ne-forumin-ekonomik-ne-davos-do-te-nenshkruaje-marreveshjen-me-shtetet-e-efta/

  • Kurti takon në Davos kryeministrin e Lituanisë, flasin për bashkëpunimin mes dy vendeve

    Kryeministri e Kosovës, Albin Kurti, ka zhvilluar takim më 21.01.2025 me kryeministrin e Lituanisë, Gintautas Paluckas, me të cilin ka biseduar për thellimin e marrëdhënieve mes dy vendeve.

    Po ashtu, në Davos, kryeministri Kurti është takuar edhe me investitorë të mundshëm në sektorin e energjisë.

    “Në Davos, në margjina të Forumit Ekonomik Botëror si dhe në Shtëpinë e Kosovës, patëm bisedime e shkëmbime të frytshme me: Kryeministrin e Lituanisë Gintautas Paluckas për të thelluar më tej marrëdhëniet e bashkëpunimin dypalësh, e me investitorë potencialë e strategjikë për mundësitë e rritjes së investimeve në sektorin e energjisë”- thuhet në njoftimin e kryeministrit në Facebook.

    Ai shtoi se nesër, më 22.01.2025, pritet të nënshkruhet Marrëveshja e Tregtisë së Lirë me vendet anëtare të EFTA-s.

    Shënim: Artikulli është edituar më 22.01.2025, ora 11:12.