Autor: Naser Sertolli

  • Shefi i NATO-s pret që zgjedhjet në Kosovë të mos ndikojnë në destabilizim të situatës

    Sekretari i përgjithshëm i NATO-s, Mark Rutte, tha se aleanca ushtarake perëndimore është në kontakt me Kosovën dhe Serbinë që të sigurohet që të mos ketë destabilizim në Kosovë gjatë zgjedhjeve parlamentare.

    Rutte e ka quajtur situatën në Bosnje e Hercegovinë dhe raportet mes Kosovës dhe Serbisë si çështje kyçë në rajonin e Ballkanit Perëndimor.

    Këto deklarata ai i bëri më 13 janar gjatë një debati që u zhvillua në Komisionin për Politikë të Jashtme dhe Mbrojtjes në Parlamentin Evropian në Bruksel.

    “Natyrisht, i kemi disa shqetësime atje, sidomos për situatën në Bosnje e Hercegovinë, por edhe raportet mes Serbisë dhe Kosovës”, tha shefi i NATO-s.

    Ai shtoi se aleanca nuk do të lejojë të ketë ndonjë vakum të sigurisë, as në Bosnje e Hercegovinë, e as diku tjetër në rajonin e Ballkanit Perëndimor.

    “Gjithsesi, ne jemi në kontakt me Kosovën, por edhe me Serbinë, për të siguruar që zgjedhjet që do të zhvillohen më vonë në Kosovë në shkurt të mos çojnë deri te destabilizimi. Kjo është kyç. Në rajonin e Ballkanit Perëndimor ne vërtetë duhet të mbetemi të angazhuar për së afërmi sepse është një fqinjësi kryesore për ne”, tha Rutte.

    Kosova do të mbajë zgjedhje të rregullta parlamentare më 9 shkurt.

    Mbajtja e votimeve po bëhet në kohën kur në dy vjetët e fundit tensionet kanë qenë të larta në pjesën veriore të vendit, të banuar me shumicë serbe.

    Në shtator të vitit 2023, në veri të Kosovës një grup i serbëve të armatosur sulmuan Policinë e Kosovës, duke vrarë një rreshter. Gjatë këmbimit të zjarrit që pasoi në Banjskë të Zveçanit, u vranë edhe tre sulmues serbë.

    Përgjegjsinë për sulmin, që Kosova e konsideron terrorist, e mori Millan Radoiçiq, ish-nënkryetar i Listës Serbe, partisë kryesore të serbëve në Kosovë që ka mbështetjen e Beogradit.

    Kosova ka fajësuar Serbinë për sulmin, por Beogradi ka mohuar se ka gisht në të.

    Ndërkaq, në nëntor të vitit të kaluar ndodhi një shpërthim në kanalin e Ibër-Lepencit në Zubin Potok.

    Ky kanal furnizon me ujë disa komuna të Kosovës dhe uji i tij përdoret për ftohjen e termocentraleve.

    Kosova sërish fajësoi Serbinë për sulmin, por Beogradi mohoi përfshirjen dhe tha se do të hetojë rastin.

    Ndërkaq, gjatë debatit në PE, shefi i aleancës tha se në këto kohëra të rrezikshme është e domosdoshme që Bashkimi Evropian dhe NATO-ja të forcojnë bashkëpunimin.

    Sipas tij, Rusia po bën përpjekje që të destabilizojë vendet anëtare të aleancës dhe të bllokut evropian.

    “Jemi thellësisht të shqetësuar për sigurinë në Evropë. Nuk jemi në luftë, por nuk jemi as në paqe”, tha ai duke kërkuar që të rriten investimet në siguri dhe mbrojtje nga vendet anëtare.

    Sipas planit të mëhershëm, të gjitha vendet anëtare të aleancës duhet të investojnë në mbrojtje më së paku 2 për qind të Bruto Prodhimit Vendor. Edhe pse pajtimi për këtë ishte bërë para më shumë se dhjetë vjetësh, këtë synim ende nuk e kanë arritur të gjitha vendet anëtare, pavarësisht se që nga nisja e luftës së Rusisë kundër Ukrainës, investimet në mbrojtje janë rritur.

    “Dy të tretat e vendeve anëtare të NATO-s tash shpenzojmë së paku 2 për qind të BPV-së për mbrojtje. Por, kjo nuk është as përafërsisht e mjaftueshme. Për një mbrojtje të duhur, duhet shumë më tepër”, theksoi shefi i NATO-s./REL

  • Vdes një nga të plagosurit në sulmin në Cetinjë, shkon në 13 numri i viktimave

    Një nga katër të plagosurit në sulmin e një janarit në Cetinë, vdiq të enjten në Qendrën Klinike të Malit të Zi. Dejan Kokotoviç, është viktima e trembëdhjetë e vrasjes masive të kryer nga Aco Martinoviç.

    Më 1 janar, Kokotoviç u transferua në spital ku iu nënshtrua një operacioni urgjent. Më pas mjekët njoftuan se ai kishte një plagë me armë zjarri në kokë dhe ishte në gjendje kritike.

    Qendra Klinike tha të enjten se 48 orë më parë Kokotoviç po shfaqte shenja të përmirësimit të lehtë, por gjendja e tij papritur u përkeqësua dhe ai vdiq.

    Dymbëdhjetë veta u vranë në sulmin e një janarit që nxiti protesta në Podgoricë dhe Cetinë kundër, siç u tha, mungesës së veprimeve të autoriteteve për ta parandaluar vrasjen e shumëfishtë.

    Ambasada amerikane tha të enjten se e “mbështet fuqimisht të drejtën për tubime paqësore, jo të dhunshme dhe lirinë e shprehjes, si vlera themelore të një shoqërie demokratike”.

    Ambasada amerikane, vuri në dukje, se qytetarët nuk duhet të vuajnë pasojat për ushtrimin e të drejtës së tyre për tubim paqësor dhe shprehje të mendimit.

    “U bëjmë thirrje të gjithë aktorëve politikë, shoqërisë civile dhe mediave që të tregojnë respekt për viktimat e ngjarjeve tragjike në Cetinë dhe familjet e tyre, të përqendrohen në rimëkëmbjen e komunitetit dhe të punojmë së bashku për të mësuar nga kjo tragjedi dhe për të garantuar siguri më të madhe për qytetarët”, thuhet në një reagim të ambasadës amerikane në Podgoricë.

    Mbi 100 profesorë të universitetit dhe asistentë mësimdhënës dërguan një letër mbështetjeje për studentët që themeluan grupin joformal studentor “Kamo Sutra” (Kah Nesër).

    Ata shprehim mbështetje për organizatën joformale studentore “Kamo śutra” dhe kërkesave të tyre për të sqaruar plotësisht përgjegjësinë për vrasjet masive në Cetinë.

    “Është koha e fundit që të gjithë ne të shqetësohemi për sigurinë e qytetarëve në Mal të Zi dhe, si bashkësi shoqërore, të kërkojmë llogari nga drejtuesit e institucioneve shtetërore përgjegjës për sigurinë e qytetarëve”, thuhet në letrën e profesorëve.

    Një letër të ngjashme dërguan edhe artistët dhe shkrimtarët nga Mali i Zi, të cilët mbështesin kërkesat e studentëve.

    “Me integritetin tonë profesional dhe personal, ne e vendosim veten në mbrojtjen e tyre, sepse studentët janë e ardhmja dhe perspektiva e çdo shoqërie përparimtare. Studentët përbëjnë rrezik dhe kërcënim vetëm për totalitarizmin dhe autokracinë!”, thuhet në reagimin e tyre.

    Vrasjet e një janarit paraqesin vrasjen e dytë në masë brenda më pak se tre vitesh në Cetinë, që gjendet 38 kilometra në perëndim të Podgoricës. Në gusht të vitit 2022, një persona i armatosur vrau 10 persona.

    Shumë banorë të Malit të Zi janë të zemëruar me ato që i konsiderojnë reforma të ngadalshme të policisë, e cila ka mungesë punonjësish dhe fondesh./VOA

  • Bashkësia Islame e Kosovës ua ndalon nëpunësve të saj pjesëmarrjen në fushata politike

    Bashkësia Islame e Kosovës ua ka ndaluar nëpunësve administrativë dhe fetarë të BIK-ut pjesëmarrjen në fushata politike zgjedhore apo që të jenë aktivistë të ndonjë partie politike.

    Në një letër drejtuar këshillave të BIK-ut nëpunësve administrativë dhe fetarë u tërhiqet vërejtja që të kenë kujdes të shtuar në paraqitjet e tyre publike mediale, përfshirë edhe postimet dhe komentet në rrjetet sociale.

    Në dokumentin, të cilin e ka siguruar KALLXO.com, që mban datën 08.01.2025, nëpunësve u ndalohet paraqitja e qëndrimeve zyrtare që i përkasin institucionit të Bashkësisë Islame të Kosovës dhe personave kompetentë të saj, u ndalohet dhënia e fetvave për çështje të ndryshme fetare pa autorizim, u ndalohet paraqitja e qëndrimeve të tyre personale politike dhe pjesëmarrja në fushata politike zgjedhore.

    Po ashtu, atyre u ndalohet të jenë aktivistë të ndonjë partie politike e të qenët kandidat në ndonjë nga listat e partive politike për pozita të caktuara në nivel lokal ose qendror, si dhe të manifestuarit publik me rastin e fitores së ndonjë partie të caktuar.

    Sipas dokumentit që mban nënshkrimin e myftiut Naim Tërnava, çdo veprim i tillë konsiderohet shkelje e Kushtetutës së BIK-ut, ligjeve dhe akteve të tjera normative, për çka edhe do të sanksionohen.

    Pjesëmarrja në tubime të natyrës politike u ka “kushtuar” dy zyrtarëve të lartë të Policisë së Kosovës.

    Inspektorati Policor i Kosovës ka rekomanduar suspendimin nga detyra të kolonelit Nexhmi Krasniqi, i cili u pa në një takim të thirrur nga kandidatë për deputetë të Partisë Demokratike të Kosovës.

    Fotografitë e këtij takimi u shpërndanë nga kanidati i PDK-së për deputet, Fatbardh Rexha, në llogarinë e tij në rrjetin social Facebook, më 06.01.2025.

    IPK ka iniciuar procedurë disiplinore ndaj majorit Isak Ejupi, i cili kishte marrë pjesë në një tubim politik të LDK-së.

    “Roli i Policisë është kyç në garantimin e rendit dhe sigurisë për të gjithë qytetarët pa dallim dhe çdo përfshirje apo perceptim i përfshirjes së zyrtarëve policorë në aktivitete politike mund të dëmtojë besimin e publikut në këtë institucion jetik.” – thuhet në njoftimin e IPK-së.